Te Hoê Ohipa Mo‘a
Ua farii oia i te mau mea atoa ta maua i haapii. No reira no teaha ïa oia i ore ai i rave i te Buka a Moromona i to’u horo‘araa’tu ia’na ?
I te hoê pô ua patoto atu to’u hoa misionare e o vau nei i te opani no te hoê taure‘are‘a e piahi no te ara mai e haere ra i te hoê o te mau fare haapiiraa teitei no Ronedona. Ua farii mai oia ia maua ia tomo atu, e ua faaite atu maua e e mau misionare maua no te Ekalesia a Iesu Mesia i te Feia Mo‘a i te mau Mahana Hopea nei. E au ra ua anaanatae oia i te haapii atu â no ni‘a i te Faaho‘i-raa-hia mai te evanelia, no reira ua faaite atu maua i to maua iteraa papû no te Peropheta Iosepha Semita e ua parau atu ia’na no ni‘a i te hoê buka mo‘a a to tatou Metua i te Ao ra tei piihia te Buka a Moromona. Ua haapapû atu maua e e mea mo‘a te reira no te mea te faaite papû nei te reira no ni‘a ia Iesu Mesia.
Ua tatara maua e e nehenehe ia’na ia ite no’na iho no ni‘a i te parau mau no teie buka e ua ineine maua i te horo‘a i te hoê buka na’na. A horo‘a’tu ai au i te Buka a Moromona ia’na, ua ti‘a oia mai to’na ra parahiraa e ua haere atu i rapae au i te piha ma te ore e parau i te hoê parau. Ua tape‘a vau i te Buka a Moromona i roto i to’u rima maa taime iti, e ua hi‘o to’u hoa e o vau nei i te tahi e te tahi ma te mamu, ma te ui eaha ïa te rave. Ua tuu vau i te buka i ni‘a i te iri amuraa maa.
Ua nehenehe ia maua ia ite i to maua hoa apî i roto i te fare tunuraa maa e horoi ra e e tamarôraa i to’na rima i ni‘a i te hoê tauera api. Ua ho‘i mai oia i roto i te piha e ua rave a‘era i te Buka a Moromona mai nia’tu i te iri amuraa maa e parau noa maira « E horo‘i noa to’u nunaa i to ratou rima hou a tape‘a ai ratou i te tahi mea mo‘a ». Ua tahe mai te mau roimata i to’u mau mata a hi‘o ai au i teie taure‘are‘a i te tatararaa i te Buka a Moromona no te taime matamua e a huri ai to’na mau rima mâ i te mau api.
Ua haapii Alama e e mea mo‘a te mau papa‘iraa mo‘a e ua faahereherehia no te faahaere te mau varua i te faaoraraa. Ua parau oia i ta’na ra tamaiti o Helamana, « Na te Atua i tuu mai i teie nei mau mea mo‘a ia oe na, e na’na hoi ratou i haapa‘o, e i haamo‘a, e e riro â oia i te haapa‘o, e i te tiai i te reira no te opuaraa paari na’na ra, e tia‘i ia’na i te faaite mai i to’na ra mana i te mau ui a muri atu » (Alama 37:14).
Ua tonohia vau i te hoê misioni no te haapii i te evanelia a Iesu Mesia tei faaho‘ihia mai, e o vau ra tei haapiihia e teie taure‘are‘a e to’na mau rima mâ. I roto i te mau ta‘ere e rave rahi e tae noa’tu i to’u iho, e ere i te mea titauhia ia horoi i to tatou mau rima hou a tai‘o ai i te mau papa‘iraa mo‘a, teie râ ohipa ohie no te faatura o te hoê ïa faahaamana‘oraa tura e te puai no te mo‘araa o te Buka a Moromona.
Faahoho‘araa na Simon Jones