Ko ha Ngāue Toputapu
Naʻá ne tali ʻa e meʻa kotoa pē naʻá ma akoʻí. Ka ko e hā ʻoku ʻikai ai ke ne toʻo ʻa e Tohi ʻa Molomoná heʻeku ʻoange ki aí?
Naʻá ku tukituki atu mo hoku hoa faifekaú ʻi ha efiafi ʻe taha ʻi he matapā ʻo ha talavou ko ha tamasiʻi ako fakavahaʻapuleʻanga ʻoku ako he taha ʻo e ngaahi ʻunivēsiti ʻo Lonitoní. Naʻá ne fakaafeʻi kimaua ki loto, peá ma fakamatalaʻi ange ko e ongo faifekau kimaua ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne vekeveke ke ako lahi ange ki hono Toe Fakafoki Mai ʻo e Ongoongoleleí, peá ma fakamoʻoni ange ʻo kau ki he Palōfita ko Siosefa Sāmitá pea fakamatalaʻi kiate ia ha tohi mei heʻetau Tamai Hēvaní naʻe ui ko e Tohi ʻa Molomoná. Naʻá ma fakamamafaʻi ange ʻoku toputapu koeʻuhí he ʻoku fakamoʻoni ia kia Sīsū Kalaisi.
Naʻá ma fakamatalaʻi ange te ne lava ke ʻilo hono moʻoní pea ʻoange kiate ia ha tatau. ʻI heʻeku ʻoange ʻa e Tohi ʻa Molomoná kiate iá, naʻá ne tuʻu mei hono seá ʻo mavahe mei he lokí ʻo ʻikai foaki mai ha lea. Naʻá ku kei pukepuke pē ʻa e Tohi ʻa Molomoná, peá ma fesiofaki fakalongolongo pē mo hoku hoá mo ongoʻi puputuʻu, ʻo fakakaukau pe ko e hā e meʻa ʻe faí. Naʻá ku hili ʻa e tohí he funga tēpilé.
Naʻe lava ke ma sio atu ki homa kaungāmeʻa talavoú ʻi he peitó ʻokú ne fanofano pea holoholo hono nimá he konga taueli foʻou. Naʻá ne toe foki mai ki he lokí ʻo toʻo hake ʻa e Tohi ʻa Molomoná mei he tēpilé mo pehē mai, “ʻOku fufulu maʻu pē ʻe hoku kakaí honau nimá kimuʻa pea nau ala ki ha meʻa ʻoku toputapu.” Naʻá ku tangi heʻeku mamata atu ki hono fuofua fakaava hake ʻe he talavoú ni ʻa e Tohi ʻa Molomoná pea huke hono ngaahi pēsí ʻaki ha nima ʻoku maʻa.
Naʻe akoʻi ʻe ʻAlamā ʻoku toputapu ʻa e ngaahi folofolá pea naʻe fakatolonga ia ke fakamoʻui ai ʻa e ngaahi laumālié. Naʻá ne tala ki hono foha ko Hilamaní, “Kuo tuku ʻe he ʻOtuá kiate koe ʻa hono tauhi ʻo e ngaahi meʻá ni, ʻa ia ʻoku toputapu, ʻa ia kuó ne tauhi ke toputapu, kae ʻumaʻā foki ia te ne maluʻi mo fakatolonga foki koeʻuhi ko ha taumuʻa ʻoku fakapotopoto kiate ia, koeʻuhi ke ne fakahā atu ʻa hono māfimafí ki he ngaahi toʻu tangata ʻamuí” (ʻAlamā 37:14).
Naʻá ku ʻalú ke akoʻi ʻa e ongoongolelei ʻo Sīsū Kalaisi naʻe toe fakafoki maí, ka ko au ia naʻe akoʻi ʻe he talavou ko ʻení ʻaki hono nima maʻá. ʻOku lahi e ngaahi ʻulungāanga fakafonua—kau ai hoku fonuá—ʻoku ʻikai fie maʻu ia ke fanofano kimuʻa pea lau e folofolá, ka ko ʻene tōʻonga faingofua ʻo e fakaʻapaʻapá, ko ha fakamanatu mālohi mo ʻapasia ia ʻo e toputapu fau e Tohi ʻa Molomoná.
Tā fakatātaaʻi ʻo e ʻatá ʻe Simon Jones