2011
Ko e Palōfita ko Siosefa Sāmitá: Naʻá ne Liliu ʻa e Tohi ʻa Molomoná
ʻOkatopa 2011

Ko e Palōfita ko Siosefa Sāmitá

Naʻá ne Liliu ʻa e Tohi ʻa Molomoná

Ko ha tohi folofola makehe ʻa e Tohi ʻa Molomoná. Neongo naʻe hiki ia ʻe ha kau palōfita he kuonga muʻá ka naʻe ʻikai ke tau maʻu ia ʻi he founga tatau mo e Tohi Tapú. Naʻe meimei ke hiki ʻa e Tohi Tapú ia ʻi ha ʻū takainga tohi ʻi he Maama Motuʻá, ʻa ia ko ha ʻū tohi kehekehe pea laui senituli hono hiki tatau ia ʻe ha kau tangata tohi. Ne toki aʻu mai ki he senituli hono faá talu meia Sīsū Kalaisí, ne toki fakatahaʻi ai e ngaahi tohi kehekehe ko ʻení pea hoko pē ko ha voliume ʻe taha ʻoku tau ui ko e Tohi Tapú.

Ka ko e Tohi ʻa Molomoná naʻe hiki ia ʻe ha kau palōfita ʻo e kuonga muʻá ʻi he Maama Foʻoú ʻi ha ʻū lauʻi peleti ukameʻa, ʻa ia naʻe meimei ke fakanounouʻi ia ʻe ha palōfita pē ʻe taha—ko Molomona (ʻo hangē ko e hingoa ʻo e tohí)—ʻi he senituli hono nimá a.d. ʻo fakatahaʻi ko ha lekooti pē ʻe taha ki ha ʻū lauʻi peleti koula. Naʻe hanga ʻe hono foha ko Molonaí ʻo tanu kimui ange ʻa e ʻū lauʻi peletí ʻo aʻu mai ki he 1827, ʻo toki foaki ia ai ʻe Molonai kuo toetuʻú, ki ha talavou ko Siosefa Sāmita.

ʻOku ʻoatu he talanoa hoko haké ʻa e founga naʻe maʻu, liliu mo pulusi ai ʻe Siosefa ʻa e lekooti ʻoku ui he taimí ni ko e Tohi ʻa Molomoná: Ko ha Fakamoʻoni ʻe Taha ʻo Sīsū Kalaisi. Naʻe fakamoʻoni tonu ʻa e Fakamoʻuí ki hono moʻoni ʻo e tohí (vakai, T&F 17:6).

  1. ʻI he 1820 naʻe nofo ai ha talavou taʻu 14 ko Siosefa Sāmita ʻo ofi atu ki Palemaila ʻi Niu ʻIoké. Neongo naʻá ne kei siʻi ka naʻá ne tokanga ki hono vā mo e ʻOtuá pea naʻá ne puputuʻu ʻi he fakamatala ʻa ha ngaahi kautaha lotu faka-Kalisitiane kehekehe, ʻi heʻenau feinga ke tokolahi ʻenau kau uluí, ʻo nau fakahalaki ai e fakamatala ʻa e ngaahi kautaha lotu kehé. Naʻe fakalotoa ʻa Siosefa ʻe heʻene ako ʻa e Tohi Tapú, ko ia naʻá ne fakakaukau ke ne fekumi ki he potó ʻaki ʻene fehuʻi ki he ʻOtuá, ʻa ia “ʻokú ne foaki lahi ki he kakai kotoa pē, pea ʻoku ʻikai valokiʻi” (Sēmisi 1:5). Naʻá ne ʻalu ai ki he vaoʻakau ofi atu ki hono ʻapí ʻo lotu.

  2. ʻI he tūʻulutui ʻa Siosefá, naʻe nofo mai kiate ia ha pou maama ngingila. Naʻá ne mamata ai ki ha toko ua. Naʻe folofola ange ʻa e Tamai Hēvaní ʻo pehē, “Ko hoku ʻAlo ʻOfaʻangá ʻeni. Fanongo kiate Ia!” (Siosefa Sāmita—Hisitōlia 1:17). Naʻe fakahā ange ʻe he ʻEikí kia Siosefa ke ʻoua naʻá ne kau ki ha taha ʻo e ngaahi siasí he ʻoku nau hala kotoa pea naʻe talaʻofa kiate ia “ʻe ʻi ai e taimi ʻi he kahaʻú ʻe fakahā ange kiate [ia] ʻa e kakato ʻo e Ongoongoleleí.”1

  3. Hili mei ai ha taʻu ʻe tolu, ʻa ia ne vahevahe ai ʻe Siosefa Sāmita ki he niʻihi kehé ʻa e meʻa naʻá ne aʻusiá—naʻe fakatangaʻi ai ia. Naʻá ne fakamatala: “Neongo naʻe fehiʻanekinaʻi mo fakatangaʻi au koeʻuhí ko ʻeku taukaveʻi kuó u mamata ki ha meʻa-hā-maí, ka naʻe moʻoni ia; pea … naʻe langaʻi ai ʻa ʻeku pehē ʻi hoku lotó: Ko e hā hono ʻuhinga ka fakatangaʻi ai au koeʻuhí ko ʻeku tala ʻa e moʻoní? Kuó u mamata moʻoni ki ha meʻa-hā-mai; pea ko hai au ke u fakafepaki ki he ʻOtuá, pe ko e hā ʻoku fakakaukau ai ʻa e māmaní ke fakamālohiʻi au ke u fakafisingaʻi ʻa e meʻa kuó u mamata moʻoni ki aí? He kuó u mamata ki ha meʻa-hā-mai; naʻá ku ʻiloʻi ia, peá u ʻiloʻi ʻoku ʻafioʻi ia ʻe he ʻOtuá, pea ʻe ʻikai te u lava ʻo fakaʻikaiʻi ia” (Siosefa Sāmita—Hisitōlia 1:25).

  4. ʻI he ʻaho 21 ʻo Sepitema 1823, ʻi he lolotonga ha lotu ʻa Siosefa, naʻe kāpui ʻa hono lokí ʻe ha maama pea hā ange ai kiate ia ha ʻāngelo ko Molonai. Naʻe fakamatala ʻa Molonai kia Siosefa ʻo kau ki he ngaahi tohi kuo hiki ʻe ha kau palōfita he kuonga muʻá. Naʻe tohitongi e lekōtí ʻi ha ʻū lauʻi peleti koula ʻo tanu ʻi ha moʻunga ofi atu pē. Naʻe fakahā ai kia Siosefa te ne liliu ʻa e lekōtí.

  5. Ne faifai pea foaki kia Siosefa ʻa e ʻū lauʻi peletí, ʻi he ʻaho 22 ʻo Sepitema 1827, ʻo ne toʻo hake ia mei ha puha naʻe faʻu ʻaki ha maka pea ʻufiʻufi ʻaki ha fuʻu maka ʻi ha moʻunga ofi pē ki Palemaila ʻi Niu ʻIoké.

  6. Hangē ko e meʻa angamaheni ne faʻa hoko he ngaahi feituʻu ʻutá he ngaahi ʻaho ko iá, naʻe ʻikai ako lelei ʻa Siosefa Sāmita. Naʻe ʻoange ʻe he ʻOtuá ha meʻangāue fakaliliu lea ʻo e kuonga muʻá naʻe ui ko e ʻŪlimí mo e Tūmemí ke tokoni ki heʻene fai e liliu leá. Naʻe faitāpuekina ia ʻaki e tokoni ʻa ha kau tangata tohi (sikalaipe) ʻo nau tohi ʻa e meʻa naʻá ne lea ʻakí ʻi heʻene liliú. Naʻe kau he kau tangata tohi ko ʻení ʻa hono uaifí ko ʻEma; Māteni Hālisi ko ha tangata faama koloaʻia; pea mo ha faiako ko ʻŌliva Kautele. Naʻe ʻosi e konga lahi ʻo e ngāue fakaliliu-leá ʻi loto he māhina ʻe tolu mei he kamata ngāue fakasikalaipe ʻa ʻŌlivá.

    Naʻe fakamatala ʻa ʻEma ki he ongo naʻá ne maʻu ʻi heʻene hoko ko ha sikalaipe kia Siosefá: “He ʻikai lava ʻe ha tangata ʻo liliu ʻa e ngaahi tohí kapau ne ʻikai ke ueʻi fakalaumālie ia; he ko e taimi [ne u hoko ai] ko ʻene sikalaipé, ʻe lau mai ʻe [Siosefa] ʻi ha ngaahi houa lahi ʻa e ngaahi meʻa ke u hikí; pea ʻi heʻene foki mai hili haʻane maʻumeʻatokoní, pe hili ha mālōlō, te ne toe kamata pē mei he feituʻu ko ia ne ngata aí, ʻo ʻikai toe vakai ki he tohí pe toe lau ange hano konga kiate ia.”2

    Naʻe fakamatalaʻi ʻe Siosefa ʻa e mahuʻinga ʻo hono ʻomi ʻo e Tohi ʻa Molomoná: “Naʻá ku liliu ʻi he mālohi ʻo e ʻOtuá ʻa e Tohi ʻa Molomoná mei ha tohi fakakuonga muʻa (hieroglyphics) naʻe ʻikai toe ʻilo ʻe māmani, pea naʻá ku tuʻu toko taha ai ʻi he meʻa fakaʻofoʻofá ni, ko ha talavou taʻe poto, ke fepaki mo e poto fakamāmaní pea mo e taʻe ʻilo lahi ʻo e kakai ʻo e senituli hongofulu mā valú, ʻaki ha fakahā foʻou.”3

  7. ʻI he lolotonga e māhina ʻe 18 ne maʻu ai ʻe Siosefa e ʻū lauʻi peletí, naʻe ʻikai ko ia toko taha pē naʻe mamata mo ala ki aí. Naʻe fai ʻe ha kau tangata ʻe toko tolu—ʻŌliva Kautele, Tēvita Uitemā pea mo Māteni Hālisi—ha fakamoʻoni totonu naʻe fakahaaʻi ange kiate kinautolu ʻe he ʻāngelo ko Molonaí ʻa e ʻū lauʻi peleti koulá pea naʻa nau ʻiloʻi ko e ʻū lauʻi peletí kuo “liliu ia ʻi he foaki mo e mafai ʻo e ʻOtuá, he kuo folofola ʻaki ia ʻe Hono leʻó kiate kimautolu.” Naʻe fakamoʻoni foki mo ha kau tangata kehe ʻe toko valu kuo nau mamata mo ala ki he ʻū lauʻi peleti koulá.4

  8. ʻI heʻene aʻu ki ʻAokosi 1829, naʻe aleapau ai ʻa Siosefa mo e tangata faipaaki ko ʻIkipeti B. Kalanitini ʻo Palemaila Niu ʻIoké, ke paaki e tohí ni. Naʻe mōkesi ʻe Māteni Hālisi ʻa hono fāmá ke totongi ʻaki ʻa hono paaki ʻo e tohí, pea ʻi he ʻaho 26 ʻo Māʻasi 1830, naʻe ʻatā ke fakatau atu ai e Tohi ʻa Molomoná.

  9. ʻI he ʻaho 6 ʻo ʻEpeleli 1830, ne fakafuofua ki ha kakai ʻe toko 60 ne nau fakataha mai ki ha kiʻi fale papa ʻi Feieti ʻi Niu ʻIoke. Pea fakatatau mo e fakahinohino ʻa e ʻEiki ko Sīsū Kalaisí, ne fokotuʻu ai ʻe Siosefa Sāmita ʻa e Siasi ʻo e Fakamoʻuí, ʻo toe fakafoki mai ai ia ʻo hangē tofu pē ko hono fuofua fokotuʻu mo tataki ʻe ha kau ʻaposetolo mo ha kau palōfita kuo fakamafaiʻi ke nau lea ʻo fakafofongaʻi ʻa e ʻOtuá. Naʻe toki ʻomi ha fakahā kimui ange kia Siosefa Sāmita ʻo fekauʻaki mo e hingoa ʻo e Siasí: Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní (vakai, T&F 115:4).

Maʻuʻanga Fakamatalá

  1. Joseph Smith, ʻi he History of the Church, 4:536.

  2. ʻInitaviu mo ʻEma Sāmita ne fakahoko ʻe Siosefa Sāmita ko e III, Fēpueli 1879, ʻi he Saints’ Herald, Oct. 1, 1879, 290.

  3. Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 70.

  4. Vakai, “Ko e Fakamoʻoni ʻa e Kau Fakamoʻoni ʻe Toko tolú” mo e “Ko e Fakamoʻoni ʻa e Kau Fakamoʻoni ʻe Toko Valú,” ʻi he talateu ki he Tohi ʻa Molomoná.

Mei toʻohemá: Ko Siosefa, tā ʻe David Lindsley © 1998; Ko e Fekumi ʻa Siosefa ki he Potó ʻi he Tohi Tapú, tā ʻe Dale Kilbourn © 1975 IRI; Ko e ʻUluaki Mata-meʻa-hā-mai ʻa Siosefa Sāmitá, tā ʻe Greg Olsen, ʻikai ngofua ke hiki hano tatau; faitaaʻi ʻo e ʻata mei he Siosefa Sāmita: Ko e Palōfita ʻo Hono Toe Fakafoki mai ʻo e Ongoongoleleí, ne tā ʻe Matthew Reier © IRI

Mei toʻohemá: Ko e Hā ʻa e ʻĀngelo ko Molonaí kia Siosefa Sāmitá, tā ʻe Tom Lovell © 2003 IRI; laʻitā ʻo e ʻata mei he Siosefa Sāmita: Ko e Palōfita ʻo Hono Toe Fakafoki mai ʻo e Ongoongoleleí, tā ʻe Matthew Reier © IRI; laʻitā ʻo e ʻata mei he Siosefa Sāmita: Ko e Palōfita ʻo Hono Toe Fakafoki mai ʻo e Ongoongoleleí, tā ʻe John Luke © IRI; ʻI he Foaki mo e Mālohi ʻo e ʻOtuá, tā ʻe Simon Dewey; fakaikiiki ʻo e tā valivali ʻa William Maughan © 1998; faitā ʻa Craig Dimond © IRI; laʻitā mei he Siosefa Sāmita: Ko e Palōfita ʻo Hono Toe Fakafoki mai ʻo e Ongoongoleleí, tā ʻe Matthew Reier © IRI