Te u Maʻu ʻi fē ʻa e Talí?

ʻOlokā ʻOvasalengikō, Sevelosikī ʻOpalasi, Lūsia

ʻI hoku taʻu 21, naʻe akoʻi ai ha kalasi he lea faka-Pilitāniá ʻe ha ongo faifekau ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ha feituʻu ʻi Lūsia. Naʻá ku kau he fuofua lēsoni ako lea fakafonuá, ka naʻe kamata ke toe lōloa atu ʻeku nofó he tuku ʻa e kalasí ke fanongo he ngaahi poupou fakalaumālié mo fai ha ngaahi fehuʻi ki he ongo faifekaú.

Ne u tupu hake ʻi he tefitoʻi tui fakalotu hoku fonuá, ka naʻe lahi e ngaahi fehuʻi fakalotu naʻe teʻeki ke talí. Naʻe lava ʻe he ongo faifekaú mo e kāingalotu honau Siasí ʻo tali e ngaahi fehuʻi naʻe teʻeki lava ʻe ha taha he kuohilí ʻo fai mai ki ai ha tali fakafiemālié.

Ne u ongoʻi loto-toʻa hili ha kalasi lea faka-Pilitānia ke kole ha tatau ʻo ʻena tohí, ʻa e Tohi ʻa Molomoná. Ka ʻi heʻeku aʻu ki ʻapí ne u hili taʻe lau pē ia he funga laupapá.

Ka naʻe ʻikai fuoloa ʻene tuku aí. Ne u fanongo ki he pehē ʻe he kāingalotu ʻo e Siasí ʻoku nau ʻalu ki he kalasi lea faka-Pilitāniá ʻoku hanga ʻe he folofolá ʻo fakaleleiʻi ʻa e ngaahi palopalemá. Ko ia ʻi he taimi ne u fehangahangai ai mo e ngaahi faingataʻa pe palopalema fakatāutahá, naʻá ku toʻo hifo leva ʻa e Tohi ʻa Molomoná mei he funga laupapá ʻo kamata lau ia. Naʻe maʻu mei ai e ngaahi talí—ʻa e faʻahinga tali naʻe tala totonu mai ai e meʻa ko ia naʻe fie maʻu ke u ʻiló.

Naʻe kamata leva he taimi ko iá ke u ongoʻi he ʻikai lava ke u moʻui taʻe kau ai e Siasí. Ko e feituʻu ia naʻe fie maʻu ke u ʻi aí. Ko e feituʻu ia naʻá ku ongoʻi ʻoku tali ai aú.

Ka naʻá ku loto pē ke fakapapauʻi ʻi hano fehuʻi ki he ʻOtuá. Ko e palopalemá he naʻá ku nofo ʻi ha fale nofo totongi loki taha fakataha pē mo e fefine matuʻotuʻa ko ia naʻe haʻana e falé, pea ʻikai ha feituʻu fakatāutaha ia ai ke fai ai ʻeku lotú. Ka ʻi ha efiafi ʻe taha naʻá ku hū atu ki peito—ʻoku kiʻi mavahe atu ia mei he toenga ʻo e falé—peá u tautapa ki he Tamai Hēvaní pe ʻoku moʻoni e Siasí. Ne u maʻu ha ongo mālohi moʻoni pea ʻiloʻi ʻa e meʻa ʻoku fie maʻu ke u faí.

Hili mei ai ha taimi nounou naʻe papitaiso au, pea ko e taimi fakafiefia taha ia heʻeku moʻuí ʻeku hoko ko ha mēmipa ʻo e Siasí. Naʻe ʻi ai ʻeku ngaahi fehuʻi kimuʻa, ka ʻi he taimi ní kuó u maʻu e talí. Naʻá ku ongoʻi taumuʻavalea kimuʻa, ka ʻoku ou ongoʻi mahutafea he taimí ni.

ʻOku hounga kiate au ʻa e ʻikai tuku kitautolu ʻe he Tamai Hēvaní taʻe ʻi ai ha tali. ʻOku ou ʻiloʻi te Ne folofola mai kiate kitautolu, ʻo fakafou fakatouʻosi mai he lotú pea mo e folofolá.