E Hoê Iteraa Papû, e hoê Fafauraa e e hoê Ite
Te faaite papû atu nei au e te Buka a Moromona e hoê ïa fafauraa apî, e hoê ite no te Fenua Apî i to te ao taatoa.
Te mau haapapûraa mo‘a ta’u i farii no ni‘a i te Faaora e Ta’na Ekalesia tei faaho‘ihia mai ua tae mai ïa ia’u nei ei taure‘are‘a a tai‘o ai au i te Buka a Moromona. Na roto i te tai‘oraa i teie buka mo‘a to’u ite faahou â raa i te parau riirii a te Varua Maitai i te parauraa i to’u varua te parau mau o teie buka.
Te tai‘oraa i te buka o te omuaraa ïa o to’u maramarama. O te tumu ïa o to’u haapapûraa varua matamua e te ora nei te Atua, e o Oia to’u Metua i te Ao ra, e ua faataahia te hoê opuaraa no te oaoa e a muri noa’tu no’u. Na te reira i arata‘i ia’u ia here i te Bibilia Mo‘a e te tahi atu mau papa‘iraa mo‘a a te Ekalesia. Na te reira i haapii ia’u ia here i te Fatu ra ia Iesu Mesia, ia hi‘o i To’na aroha rahi, e ia feruri i te maitai e te hananaha o Ta’na tusia Taraehara.
No te mea hoi e ua haapii au no’u iho e e ite mau te Buka a Moromona, te tahi faahou â ite e te hoê fafauraa apî e o Iesu te Mesia, ua haapii atoa mai au e ua riro na e e peropheta o Iosepha Semita na te Atua. Mai ta to’u tupuna i parau i te mau mahana matamua no te Faaho‘i-raa-hia mai, « Aita e taata iino e nehenehe e papa‘i i taua huru buka ra mai teie; e aita e taata maitai e papa‘i i te reira, maori râ e mea mau e ua faauehia oia e te Atua ia rave i te reira ».1
I to’u mau haapapûraa matamua ua amuihia mai te tahi atu mau taime faahiahia e te mau faaiteraa o tei faateitei e o tei horo‘a mai i teie mahana te auraa hohonu roa‘e i to’u mau mahana, te tumu i to’u oraraa, e te hoê niu pautuutu i to’u iteraa papû.
I teie nei, aita vau i fano atu na muri i te taea‘e no Iareda. Aita vau i faaroo i te Arii Beniamina i te horo‘a raa i ta’na a‘oraa tei horo‘ahia mai e te melahi. Aita vau i rotopu i te nunaa Ati Nephi tei fafa i te mau puta o te Fatu tei ti‘a-faahou, aita atoa vau i oto e o Moromona e o Moroni no te haamou-raa-hia te hoê nunaa taata. To’u râ iteraa papû no teie buka e te hau ta’na e afa‘i mai i te aau o te taata —tei horo‘ahia ia’u na roto i te parau riirii a te Varua Maitai mai tei horo‘ahia’tu ia outou —e mea puai ïa e e mea papû maitai ïa mai to ratou ra. Te faaite papû atu nei au no ni‘a i teie buka mai te mea ra, e na Ite Tootoru , ua ite au i te melahi Moroni aore râ, e na Ite Tootoru e na Ite Toova‘u, ua ite au e ua tape‘a vau i te mau api auro.
Te faaite papû nei au e aita roa te hoê o tatou e nehenehe e haere mai ma te faaroo hope i roto i teie ohipa no te mau mahana hopea nei e na roto i te reira ia ite i te faito hope no te hau e te tamahanahana i to tatou tau e tae noa’tu e farii oia i te hanahana o te Buka a Moromona e te Fatu ra ia Iesu Mesia, o ta’na hoi e faaite papû ra. Mai ta Moromona i parau ia Moroni i roto i te hoê o to raua mau taime fifi roa, no reira te parau nei au i to tatou nei tau fifi : « E haapa‘o maitai i ta te Mesia ra. … E ia oe te aroha o te Atua Metua tei te ra‘i teitei to’na ra terono, e o to tatou Fatu ra o Iesu Mesia, o te parahi i te rima atau o to’na ra mana… ei ia oe te reira i te vairaa e a muri noa’tu » (Moroni 9:25–26).
Te Buka a Moromona o te hoê ïa faaiteraa mo‘a no te fafauraa rahi hope‘a a te Fatu i te taata nei. E fafauraa apî, e ite apî no te Fenua Api i to te ao taatoa. Te maramarama ta’u i haere o To’na ïa maramarama. Ua arata‘i To’na aroha e to’na hanahana ia’u e ia outou i roto i to tatou ite No’na i to te ao nei.
Te Faaite Papû nei te Bibilia e te Buka a Moromona no te Mesia, na Greg K. Olsen