Thawj Pawg Thawj Tswj Hwm tsab Xov, Kaum Hlis Ntuj 2011
Tej Lus Cog Tseg uas Muaj Nuj Nqis Heev ntawm Phau Ntawv Maumoos
Ntau xyoo tas los lawm kuv tau sawv ntawm ntug txaj uas muaj ib leej txiv uas tseem hluas heev uas twb yuav tso ntiaj teb no tseg. Nws tus poj niam uas txhawj heev thiab nws ob tug me nyuam kuj nyob ze ntawd thiab. Nws tuav kuv txhais tes thiab ntsia kuv li nws xav thov, thiab hais rau kuv hais tias, “Npis sov, kuv paub hais tias kuv twb yuav tuag. Qhia rau kuv saib yuav ua li cas rau kuv tus ntsuj plig thaum kuv tuag lawm.”
Kuv tau ua twj ywm thov Vajtswv kom kuv tau kev pab uas los saum ntuj los thiab kuv pom tias nyob rau ntawm nws ib sab txaj muaj phau vaj lug kub. Kuv ncav tes muab phau ntawv thiab nthuav tsuag tsuag. Tos nco cia li nthuav phau Amas tshooj 40 hauv Phau Ntawv Maumoos. Kuv nyeem cov lus no rau nws:
“Saib seb, nws raug ua rau koj paub lawm los ntawm ib tug tim tswv, tiag tag nrho tej tib neeg tej ntsuj plig, thaum uas lawv ncaim ntawm lub cev uas txawj tuag, … tau raug coj mus tsev mus cuag Vajtswv tus uas tau muab txoj sia rau lawv”.
“Thiab … tej ntsuj plig ntawm cov uas ncaj ncees tau raug txais mus nyob rau hauv ib qho chaw zoo siab, uas hu uas yeeb tsheej, ib qho chaw uas tau so, ib qho chaw uas muaj kev thaj yeeb, qhov uas lawv yuav tau so tseg tag nrho lawv tej teeb meem thiab tseg tag nrho tej kev txawj, thiab tej kev tu siab” (Amas 40:11–12).
Thaum kuv nyeem ntxiv hais txog txoj kev Sawv Rov Los, ces tus txiv neej no lub ntsej muag tshiab me ntsis tuaj thiab nws thiaj li luag nyav. Thaum kuv xyuas lawv tag, ces kuv hais nyob zoo thiab ncaim tsev neeg no los mus lawm.
Kuv tau rov qab pom tus poj niam thiab cov me nyuam tom lub ntees tuag. Kuv rov qab xav txog hmo uas tus txiv neej hluas no tau thov kom paub qhov tseeb, ces thiaj li tau cov lus teb los ntawm Phau Ntawv Maumoos los.
Los ntawm Phau Ntawv Maumoos kuj muaj lwm cov lus cog tseg, xws li lus cog tseg ntawm kev thaj yeeb, kev nyob ywj siab, thiab tej koob hmoov yog tias peb “cia li ua hauj lwm rau tus Vajtswv ntawm daim av uas yog Yexus Khetos” (Ethaws 2:12).
Los ntawm phau ntawv no tej phab ntawv yeej muaj tej lus cog tseg txog “kev zoo siab uas tsis tu li” rau “cov uas ceev Vajtswv tej lus txib. Vim saib seb, lawv tau koob hmoov rau txhua txhia yam, tsis hais sab cev nqaij daim tawv los sis sab ntsuj plig” (Mauxiyas 2:41).
Los ntawm phau ntawv no tej phab ntawv yeej muaj tej lus cog tseg txog “kev xyiv fab uas loj heev” rau cov uas “yog Vajtswv tej tub txib” uas pab Nws tej tub ntxhais uas Nws hlub. (Amas 28:8; 29:9).
Los ntawm phau ntawv no tej phab ntawv yeej muaj lus cog tseg uas hais tias Ixayees uas tau tawg ri niab tag lawm yuav los sib sau ua ke —txoj hauj lwm uas peb yeej rau siab ua heev thoob plaws ntiaj teb no los ntawm kev ua tub txib (saib 3 Nifais 16; 21–22).
Los ntawm phau ntawv no tej phab ntawv muaj cov lus cog tseg uas hais tias thaum peb thov Leej Txiv los ntawm Yexus Khetos lub npe dawb huv, ces peb tsev neeg yuav tau koob hmoov (saib 3 Nifais 18:21).
Thaum peb kawm tej phab ntawv no ces yuav pom tau hais tias cov lus cog tseg uas hais txog tej uas yuav muaj los yav tom ntej uas hais tias, “yuav muaj tus Tswv tus Ntsuj Plig los rau hauv nej lub neej thiab nej tej tsev, yuav tau kev ntxiv dag zog kom thiaj li ua tau raws li Nws tej lus txib, thiab yuav muaj lus tim khawv ntxiv tias Vajtswv Leej Tub muaj siab nyob tiag tiag.”1
Thiab los ntawm Phau Ntawv Maumooos tej phab ntawv ces yuav muaj raws li Maulaunais cov lus cog tseg uas hais tias yog thaum thov Vajtswv nrog lub siab dawb paug, thiab kev ntseeg ntawm Khetos, ces peb yuav paub txog qhov tseeb ntawm tej lus cog tseg no “los ntawm lub hwj chim ntawm tus Vaj Ntsuj Plig Dawb Huv” (saib Maulaunais 10:4–5).
Ib yam li lwm cov yaj saub hauv hnub nyoog kawg twb tau hais lawm, kuv ua tim khawv tias qhov no muaj tseeb tiag “yog qhov uas raug tshaj txhua phau ntawv nyob hauv ntiaj teb,”2 hais txog Phau Ntawv Maumoos, uas yog ib zag ua tim khawv ntxiv txog Yexus Khetos. Phau ntawv no txoj lus tawm mus thoob plaws ntiaj teb no thiab ua rau cov neeg uas nyeem kom paub txog qhov tseeb. Kuv ua tim khawv hais tias Phau Ntawv Maumoos yeej hloov tau yus txoj kev ua neej. Vam hais tias peb txhua tus yuav nyeem phau ntawv thiab rov qab nyeem dua. Thiab vam hais tias peb yuav zoo siab hlo qhia txog peb tej lus tim khawv txog tej lus cog tseg uas zoo heev no rau tag nrho Vajtswv cov me nyuam.
© 2011 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/10. Pub txhais ua lus Hmoob: 6/10 Kev txhais First Presidency Message, October 2011. Hmong. 09770 295
Qhia los ntawm tsab Xov No
Nyob hauv tej vaj lug kub, “peb yuav nrhiav tau tej ntsiab cai uas yuav pab kho tau tag nrho txhua yam kev tsis sib to taub thiab tag nrho txhua qhov teeb meem uas tib neeg muaj hauv tsev neeg” (Teaching, No Greater Call [1999], 51). Thaum koj qhia txog Thawj Tswj Hwm Monson zaj lus rau ib tse neeg, caw kom lawv mloog zoo zoo txog tej lus cog tseg uas “zoo heev” uas nws tau hais txog hauv Phau Ntawv Maumoos. Tej zaum koj yuav tsum qhia txog ib qho kev cog lus tseg hauv Phau Ntawv Maumoos uas tseem ceeb rau koj.