Ua paraparau mai te Buka a Moromona ia’u
Gina Baird, Utah, Fenua Marite
I te pitiraa o te matahiti o ta maua tamahine hope‘a o Amanda, ua itehia i roto ia’na te ma‘i mariri aitaata i roto i te toto. E mea fifi roa to’na huru, e aita to’na ma‘i mariri ai taata i ora i muri a‘e i te rapaauraa « chimiothérapie ». I muri mai ua ti‘a ïa ia iritihia te hoê puo ivi.
A faaea ai ta’u tane faaipoipo e na tamaroa e piti i te fare i Utaha, ua faaea vau e o Amanda i te tahi atu oire mai te ava‘e Setepa e tae atu i te tufaa matamua no Tenuare. Ua ma‘iri matou i te faahanahana-amui-raa i te Noela, i te hope‘a râ o te hi‘opo‘araa, ua ho‘i atu maua i te fare.
I to maua tere matamua i te fare ma‘i no te hoê hi‘opo‘araa i muri a‘e i te ho‘iraa’tu i te fare, ua ite faahou te mau taote i te ma‘i mariri ai taata i roto i te toto o Amanda. Aita te iritiraa i manuia. I to’u faarooraa i te parau apî, e au ra te mo‘e atu ra vau na roto atu i te tahua. Ua haere na to matou utuafare na roto i te pe‘ape‘a rahi, te ohipa, te faataa-ê-raa e te mau tau fifi. I teie nei e pohe ihoa ta matou nei tamahine.
Ua ho‘i atu vau i te fare i taua avatea ra i piha‘iho i ta’u na tamaiti e piti. A tia‘i noa ai matou ia ho‘i mai ta’u tane faaipoipo i te fare na te ohipa mai, ua rave matou i ta matou mau Buka a Moromona e ua haamata i te tai‘o. Tei roto matou i te 2 Nephi 9. A tai‘o ai matou, ua paraparau mai teie mau parau ia’u:
« Ua parau atu vau ia outou i taua mau mea ra, ia oaoa e ia faateitei outou i to outou upoo e a muri noa’tu, no te haamaitai ta te Fatu, ta te Atua, e horo‘a mai i to outou mau tamarii.
« Ua ite hoi au e, ua imi maite te tahi pae o outou ia ite i te mau mea e tupu i muri nei; e ite ai au e, ua ite outou e, pe noa’tu to tatou mau tino i te pohe, e hi‘o â tatou i te Atua i roto i to tatou tino nei. …
« E no te mea ua tae mai te pohe i nia iho i te taata atoa ra, ia faatia i te ravea aroha a Tei hamani i te mau mea atoa ra, ia tae mai te mana o te tia-faahou-raa e tia‘i. …
« E te rahi o te maitai o to tatou Atua e, o tei faatupu i te ravea e ora‘i tatou i te haruraa a taua mea rahi ri‘ari‘a ra; oia ïa taua mea rahi ra, o te pohe. …
« E tae mai oia i te ao nei ia ora te taata atoa ia’na, ia haapa‘o ratou i to’na ra re‘o; inaha hoi, ua faaoromai oia i te mauiui o te taata atoa, oia ïa, te mauiui o te mau taata atoa, te mau tane atoa, e te mau vahine atoa, e te mau tamarii atoa hoi, i roto i te fetii o Adamu ra.
« Ua faaoromai oia i te reira, ia tae te tia-faahou-raa i nia i te taata atoa, ia tia ratou atoa i mua i to’na ra aro i te mahana rahi o te haavaraa ra » (2 Nephi 9:3–4, 6, 10, 21–22).
A tai‘o ai au i teie mau parau, ua î te piha i te Varua Maitai. Ua ite au e ua ite to’u Metua i te Ao ra i te parau apî ta’u i farii i taua mahana ra. Ua ite au e te mau parau ta te peropheta Iakoba i papa‘i hau atu i te 2.000 matahiti na mua’tu ua papa‘ihia ïa no’u no taua mahana ra e ua tae ti‘a roa mai te Faaora mai. Ua ite oia i te mauiui e te oto ta’u i ite i muri a‘e i te faarooraa e e pohe ta maua tamahine. E tei reira Oia no te tamahanahana i to matou utuafare e Ta’na fafauraa e ua faaineine Oia i te hoê e‘a e i te hoê mahana, na roto i te mana o te Tia-faahou-raa « e hi‘o â tatou i te Atua i roto i to tatou tino nei ».
Ua ora o Amanda fatata e hoê faahou â matahiti, aita râ e mo‘ehia ia’u taua mahana ra a parau mai ai te mau parau a te Buka a Moromona ia’u i roto i to’u hinaaro e ua horo‘a mai te Fatu ia’u te ti‘aturi, te tamahanahana, e te iteraa i Ta’na opuaraa.