Nahea i te tuatapapa i te Buka a Moromona
E piti ahuru ma pae matahiti i ma‘iri a‘e nei, ua tatara mai te peresideni Ezra Taft Benson (1899–1994) « e toru tumu rahi e ti‘a‘i i te feia mo‘a i te mau mahana hopea nei ia faariro i te tai‘oraa i te Buka a Moromona ei ohipa no te hoê oraraa taatoa ».1 Teie te mau tumu :
-
A tahi, te Buka a Moromona o te ofa‘i fana ïa no ta tatou haapa‘oraa, te ofa‘i fana no to tatou ite no Iesu Mesia, no ta tatou haapiiraa, e no to tatou iteraa papû.
-
Te piti, ua papa‘ihia te Buka a Moromona no to tatou anotau.
-
Te toru, e tauturu te Buka a Moromona ia tatou ia haafatata’tu i te Atua
Te horo‘a atoa mai nei teie mau tumu no te tuatapaparaa i te Buka a Moromona i te tahi mau rave‘a e nehenehe ta tatou e rave no te tai‘oraa i teie buka papa‘iraa mo‘a taa ê.
Te ofa‘i fana no ta tatou haapa‘oraa
No te mea hoi e e ofa‘i fana te Buka a Moromona no to tatou ite no te Mesia e te îraa o Ta’na evanelia, e mea faufaa rahi i roto i ta tatou tuatapaparaa ia haapa‘o maitai i te mau haapiiraa e i te iteraa papû e rave rahi no ni‘a i te Fatu e vai nei i roto. Ua rave te tahi i teie rave‘a na roto i te raveraa i te hoê Buka a Moromona apî e te mâmâ e te tapa‘oraa i te mau irava atoa o te faahiti aore râ o te haapii i te parau a te Faaora, Ta’na ohipa, e Ta’na misioni. E afa‘i mai te reira i te hoê iteraa hohonu a‘e no ni‘a ia Iesu ei Tamaiti na te Atua e te hoê mauruururaa apî no te mea Ta’na i rave e te tamau noa nei â i te rave no tatou.
Papa‘ihia no to tatou anotau
Ua papa‘i te feia papa‘i no te Buka a Moromona ma te feruri i te mau u‘i i mua, te mau mahana hopea ihoa râ. I to’na haapotoraa i te mau papaa parau a te Ati Nephi, ua parau o Moromona e eita e nehenehe ia’na ia tuu « te vahi hoê i roto i na vahi e hoê hanere » (a hi‘o 3 Nephi 5:8 ; a hi‘o atoa te mau Parau a Moromona 1:5). Ua parau Moroni, « te parau nei au mai te mea te ŏnei outou, aita râ ïa. Inaha râ, na Iesu Mesia outou i faaite mai ia’u nei, e ite ai au i ta outou ra mau ohipa » (Moromona 8:35). Ua papa‘i teie na taata papa‘i e te tahi atu â, i raro a‘e i te faaûruraa, i te mea e maitai rahi a‘e no tatou i teie mau mahana hopea nei.
No reira e ti‘a‘i ia tatou ia tuatapapa e teie mau uiraa i roto i te feruriraa : « No teaha teie i tuuhia‘i i roto ? Nahea teie e tano ai i teie mahana e ia’u ? » Ua parau te peresideni Benson, ei hi‘oraa, e i roto i te Buka a Moromona e ite tatou i te hoê hoho‘a no te faaineineraa no te Tae-Piti-raa mai o te Faaora. E haapii mai tatou nahea to te mau pĭpĭ a te Mesia oraraa i te tau tama‘i, i te faarururaa i te hamani-ino-raa e te taivaraa, i te raveraa i te ohipa misionare e i te pahonoraa i te mau ati no te oraraa tino.2 Mai ta Nephi i rave, ia tai‘o ana‘e tatou, e ti‘a ia tatou ia « faaau » te mau papa‘iraa mo‘a ia tatou iho—oia hoi, ia tamata i te ite nahea i te faaohipa i te mea ta tatou e ite i roto te Buka a Moromona (a hi‘o 1 Nephi 19:23).
Haafatata’tu i te Atua
Ma te faahiti faahou i te peresideni Benson : « E ere noa e te haapii mai nei te Buka a Moromona ia tatou i te parau mau te na reira mau nei oia. E ere noa e te faaite papû nei te Buka a Moromon no te Mesia, te faaite uana nei oia i te reira. … Tera râ, te vai ra te tahi mea hau atu. Te vai ra hoê mana i roto i te reira buka o te haamata i te tahe mai i roto i to outou oraraa i te taime a hamata ai outou i te tuatapapa i te reira buka.3
Oia mau, e titau te tai‘oraa i te Buka a Moromona i te Varua, e te Varua o te rave‘a ïa no te heheuraa. Te faaite nei te reira e e tai‘o tatou na roto i te mana‘ona‘oraa, te feruriraa, te tuatapaparaa, te pureraa e penei a‘e te papa‘iraa i te mau parau a tai‘o ai tatou. Na te reira e tuu ia tatou i roto i te hoê faanahoraa no te farii i te tahi atu â maramarama e te ite, no ni‘a i te mea ta tatou e tuatapapa nei e te tahi atu â mau tufaa. I te tahi mau taime e mea maitai ia tai‘o i te taato‘araa o te Buka a Moromona i roto i te hoê noa tau poto no te haru mai i te auraa o to’na aamu e ta’na parau poro‘i. I te rahiraa râ o te taime, e mea maitai a‘e ia haapuai i te faataa i te taime au i te mahana tata‘itahi no te tuatapapa i te buka eiaha râ ia tai‘o i te tahi rahiraa irava aore râ api i faataahia i te mahana hoê.
Mau tauturu no te tai‘oraa
Ua haamaitaihia tatou i teie mahana i te fana‘o i te tahi mau mauhaa e nehenehe e tauturu i ta tatou tai‘oraa i te Buka a Moromona. Ua tu‘atihia te tahi i ta tatou mau papa‘iraa mo‘a, Te Arata‘i i te mau Parau Tumu, Te Faatoro Parau a te Bibilia, e te tabula i roto i te mau papa‘iraa mo‘a Paratane e te Arata‘i i te mau Papa‘iraa Mo‘a na roto i te tahi atu mau reo. E te vai ra i roto i te mau papa‘iraa mo‘a nene‘ihia na te feia mo‘a i te mau mahana hopea nei e rave rahi mau faahororaa e te mau tu‘atiraa i te mau api atoa.
Te vai nei te tahi atu mau tauturu tei nene‘ihia, mai te Buka Arata‘i na te Piha Haapiiraa Sabati, te Buka Arata‘i na te Piahi no te Haapiiraa Evanelia, e te Buka a te Piahi no te Haapiiraa Evanelia na te Feia Apî Paari. Te mea apî i to tatou tau e te matahiti o te rahiraa ïa o te mau mauhaa roro uira, tei faaitehia i te hiti i te api 31.
Mauhaa no te faafariuraa
Ua riro te Buka a Moromona ei hoê tao‘a faito ore e ei mauhaa no te faafariuraa ta te Fatu i faataa e i horo‘a no to tatou nei tau tuuraa evanelia. Te ite nei au i te reira ei niu no to’u iho iteraa papû no Iesu Mesia, no te piiraa peropheta o Iosepha Semita, e no te Ekalesia a Iesu Mesia i te Feia Mo‘a i te Mau Mahana Hopea Nei ei « basileia a te Fatu tei haamau-faahou-hia i ni‘a i te fenua nei ».4 Te oaoa nei au i te apiti atu i to’u iteraa papû i to Iesu Mesia e « mai te au i te ora o to outou Fatu e to outou Atua mai te reira atoa te parau mau o taua mea ra » (PH&PF 17:6). Ia faahohonu ta outou tuatapaparaa i te Buka a Moromona, i roto i to outou oraraa taatoa, i to outou faafariuraa e ia arata‘i te reira ia outou i ni‘a i te hoê e‘a ti‘a e tae atu i te ora mure ore.
Hoho‘a faahoho‘araa na Craig Dimond