Te Buka a Moromona :
E hoê ite e te Bibilia
Mai te au i te ture a te bibilia e « tei te vaha o na ite toopiti e tootoru ra e riro ai te mau parau atoa ra ei parau mau » (2 Corinthians 13:1), te faaite papû toopiti nei te Buka a Moromon e te Bibilia no ni‘a ia Iesu Mesia e te haapii nei i te mau parau tumu no Ta’na evanelia. Ua haapii o Elder Russell M. Nelson no te Pŭpŭ no te Tino Ahuru ma Piti Aposetolo e « te haapapû nei te mau ite no te mau papa‘iraa mo‘a te tahi i te tahi. Ua tatarahia teie mana‘o e mea maoro i teie nei a papa‘i ai te hoê peropheta e ua papa‘ihia te Buka a Moromona ‘ia faaroo outou i [te Bibilia] : e ia faaroo outou i [te Bibilia], e faaroo atoa ïa outou i te [Buka a Moromona]’ [Moromona 7:9]. Te faahiti ra te tahi buka i te tahi. Te ti‘a nei na buka tata‘itahi ei haapapûraa e te ora nei e te paraparau nei te Atua i Ta’na mau tamarii na roto i te heheuraa i Ta’na mau peropheta ».1
Teie i raro nei te hoê tabula no te mau parau haapiiraa tumu tei haapiihia i roto i te Bibilia o ta te Buka a Moromona e haapapû faahou nei.
Te misioni a Iesu Mesia
Te faaite papû nei te Bibilia e te Buka a Moromona no ni‘a ia Iesu Mesia, te Tamaiti a te Atua, e Ta’na Taraehara. Te haapii nei raua e ua rave te Faaora i ni‘a Ia’na iho ta tatou mau hara e ua upooti‘a i ni‘a i te pohe.
Te Tamaiti Fanau Tahi Ana‘e a te Atua.
Bibilia: « I aroha mai te Atua i to te ao, e ua tae roa i te horo‘a mai i Ta’na Tamaiti Fanau Tahi, ia ore ia pohe te faaroo ia’na ra, ia roaa râ te ora mure ore » (Ioane 3:16); a hi‘o atoa Mataio 16:16; Ioane 6:69).
Buka a Moromona: « Ua ite au nei e, e tae mai Iesu Mesia ra, oia hoi te Tamaiti iti ra, te Tamaiti Fanau Tahi a te Metua ra, tei î i te maitai, e te aroha, e te parau mau » (Alama 5:48 ; a hi‘o atoa 1 Nephi 11:16–21 ; Mosia 3:5–8).
Aufau no ta Tatou mau Hara
Bibilia : « O to’u ïa toto, e toto no te faufaa apî, i haamaniihia no te taata e rave rahi ia matara te hara » (Mataio 26:28 ; a hi‘o atoa Hebera 9:28 ; 1 Petero 3:18).
Buka a Moromona : « Inaha, e pûpû oia ia’na iho ei taraehara, ia faati‘a i te titauraa a te ture i ni‘a ia ratou atoa tei noaa te aau paruparu e te oto » (2 Nephi 2:7 ; a hi‘o atoa 1 Nephi 11:33 ; Alama 34:8–10 ; 3 Nephi 11:14).
Hopoi ê i to tatou mau oto
Bibilia : « Ua rave mau râ oia i to tatou paruparu, e ua hopoi ê oia i to tatou oto » (Isaia 53:4 ; a hi‘o atoa Hebera 2:18).
Buka a Moromona : « E e haere atu oia ma te faaoroma‘i i te mauiui, e te ati, e te mau huru faahemaraa atoa ra… ia ite oia na roto i te tino i te rave‘a e faaora‘i i to’na mau taata i to ratou paruparuraa ra » (Alama 7:11–12 ; a hi‘o atoa Mosia 14:3–5).
Ua vî te pohe
Bibilia : « Ua ti‘a faahou mau ra te Mesia i te poheraa ra, e ua riro ei matamua no te feia i mairi te taoto ra » (1 Korinetia15:20 ; a hi‘o atoa Ioane 14:19; Te Ohipa 26:23).
Buka a Moromona : « Ia faaroo ia Iesu Mesia, o te Tamaiti oia na te Atua, o tei taparahihia e te ati Iuda, e ua tia faahou oia na roto i te mana o te Metua, i vî ai ia’na te apoo » (Moromona 7:5 ; a hi‘o atoa Mosia 16:7–8 ; Helamana 14:17).
Te faanahonahoraa a te Atua no tatou
Te haapii nei te Bibilia e te Buka a Moromona e o te Atua to tatou Metua i te Ao ra. No reira, Oia i faaineine ai i te hoê « rave‘a o te ora » (Alma 24:14) e nehenehe ai ia tatou ia faaorahia na roto i te Taraehara a Iesu Mesia.
Metua Here i te Ao ra
Bibilia : « No’na hoi to tatou ora, e i hahaere ai, e i parahi ai hoi ; mai ta ve toofanu o to outou mau rohipehe i parau maira e, e teie nei, e tamarii atoa tatou na’na » (Te Ohipa 17:28 ; a hi‘o atoa Salamo 82:6 ; Hebera 12:9).
Buka a Moromona : « Ua ite au e, ua aroha [te Atua] i ta’na mau tamarii » (1 Nephi 11:17 ; a hi‘o atoa 1 Nephi 17:36).
Te pohe e te ao varua
Bibilia : « Ei reira te repo e ho‘i ai i raro i te repo no reira oia ra, e ho‘i râ te varua i te Atua i horo‘a maira » (Koheleta 12:7 ; a hi‘o atoa 1 Petero 3:19–20 ; 4:6).
Buka a Moromona : « Te varua o te mau taata atoa ra, te taata maitai e te ino atoa hoi, ua afaihia ïa ratou i taua Atua ra o tei horo‘a mai i te ora ia ratou ra » (Alama 40:11 ; a hi‘o atoa i te mau irava 12–14).
Ti‘a-faahou-raa
Bibilia : « E ia pohe tau iri nei i teie nei ma‘i, e hi‘o â vau i te Atua i roto i tau tino nei » (Ioba 19:26 ; a hi‘o atoa Ezekiela 37:12 ; 1 Korinetia 6:14 ; 15:54).
Buka a Moromona : « E ite ai au e, ua ite outou e, pe noa’tu to tatou mau tino i te pohe, e hi‘o â tatou i te Atua i roto i to tatou tino nei » (2 Nephi 9:4 ; a hi‘o atoa 2 Nephi 9:12 ; Alama 11:43–45 ; 40:23).
E horo‘a te mau faaueraa i te hoê arata‘i
Te haapii nei te Bibilia e ua horo‘a te Atua i te mau faaueraa e e haamaitai ïa Oia ia tatou ia faaroo ana‘e tatou. Ua papa‘i e ua haapa‘o atoa te mau peropheta no te Buka a Moromona i te mau faaueraa.
Te mau haamaitairaa no te haapa‘oraa
Bibilia : « E ua parau mau Iehova ia tatou e, e haapa‘o i tau mau haapa‘oraa nei, e ia măta‘u tatou i to tatou Atua ia Iehova, ia maitai tatou e amuri noa’tu, ia faaora oia ia tatou. … Ia haapa‘o tatou, e ia rave i taua mau parau atoa nei, e riro ïa ei parau-ti‘a na tatou » (Deuteronomi 6:24–25 ; a hi‘o atoa Maseli 4:4 ; Ioane 14:21).
Buka a Moromona : « Ua parau mai hoi oia ia outou ra e, ia haapa‘o outou i ta’na mau faaue, e maitai ïa outou i te fenua nei ; aore roa hoi ta’na e faahuru-ê-raa i ta’na i parau maira ; e tena na, ia haapa‘o outou i ta’na ra mau faaue, e haamaitai, e e haamanuïa hoi oia ia outou » (Mosia 2:22 ; a hi‘o atoa 2 Nephi 1:20).
Na Ture Hoê Ahuru
Bibilia : Ua heheu mai te Fatu i Na Ture Hoê Ahuru ia Mose (a hi‘o Exodo 20:1–17).
Buka a Moromona : Ua haapii Abinadi i na Ture Hoê Ahuru i te mau tahu‘a o te arii Noa (a hi‘o Mosia 12:33–36 ; 13:12–24).
Te Tuhaa Ahuru
Bibilia : « Hopoi mai na outou i te ahuru atoa o te mau tao‘a i roto i te fare vairaa, ia maahia tau fare nei » (Malaki 3:10 : a hi‘o atoa Levitiko 27:30).
Buka a Moromona : « O taua iho Melehizedeka ta Aberahama i horo‘a’tu i te ahuru o te tao‘a na’na ra ; oia hoi ua horo‘atu to tatou metua ra o Aberahama i te ahuru o te tufaa o ta’na mau tao‘a atoa ra » (Alama 13:15 ; a hi‘o atoa 3 Nephi 24:8–10).
Bapetizoraa e te Varua Maitai
Bibilia : « Ia ore te taata ia fanau i te pape e te Varua, e ore oia e ô i te basileia o te Atua ra » (Ioane 3:5 ; a hi‘o atoa Mareko 16:16 ; Te Ohipa 2:36–38).
Buka a Moromona : « E tatarahapa, e o te mau oti‘a no te fenua, e haere mai ia’u, e bapetizohia i to’u i‘oa, ia mo‘a outou i te noaaraa mai te Varua Maitai, ia ti‘a outou ma te porao ore i mua ia’u i te mahana hopea ra » (3 Nephi 27:20 ; a hi‘o atoa 2 Nephi 9:23 ; 31:5–9).
Te Ekalesia a Iesu Mesia i mutaa iho ra
Ua haamau te Fatu i Ta’na Ekalesia i Ierusalema e i te fenua Amerika. E mau ite te Bibilia e te Buka a Moromona e ua faanaho e ua arata‘i Oia i to’na nunaa na roto i te mau peropheta e te mau aposetolo.
Mau peropheta
Bibilia : « Aita a te Fatu ra a Iehova e peu i rave, maori râ ia faaite i ta’na parau i moe i tana ra mau tavini i te mau peropheta » (Amosa 3:7 ; a hi‘o atoa Ieremia 1:7 ; 7:25).
Buka a Moromona : « Na roto hoi i te Varua, i faaitehia mai i te mau peropheta te mau mea atoa » (1 Nephi 22:2 ; a hi‘o atoa Iakoba 4:4–6).
Na Tino Ahuru ma Piti Aposetolo
Bibilia : « Ua parau atura oia i ta’na mau pĭpĭ e haere mai ia’na ra, ua maiti ihora oia i te tino ahuru e ma piti, o ta’na ïa i mairi i te i‘oa e aposetolo » (Luka 6:13 ; a hi‘o atoa Ephesia 2:19–20 ; 4:11–14).
Buka a Moromona : « E ao to outou ia haapa‘o i te mau parau a teie nei tino taata e hoê ahuru ma piti, o ta’u i maiti i rotopu ia outou ia tauturu ia outou » (3 Nephi 12:1 ; a hi‘o atoa 1 Nephi 11:29).
Mana autahu‘araa
Bibilia : « E ere outou tei hinaaro mai ia’u; o vau râ tei hinaaro atu ia outou, e ua haapa‘o ia outou ia haere outou e ia hotu i te huero, ei huero vaiiho taiata » (Ioane 15:16 ; a hi‘o atoa Mataio 16:19 ; Luka 9:1–2 ; Hebera 5:4).
Buka a Moromona : « Ua faatoroa ihora [Alama] i te mau tahu‘a e te mau peresibutero i te tuuraa i to’na rima mai te au i te haapa‘oraa a te Atua, ia faatere ratou e ia tiai i te ekalesia » (Alama 6:1 ; a hi‘o atoa 2 Nephi 6:2 ; Moroni 3).
Te tahi atu â tuatapaparaa
E ere teie tabula i te hoê tabula hope roa. Ei tufaa no ta outou iho tuatapaparaa aore râ tai‘oraa i te papa‘iraa mo‘a e te utuafare, e nehenehe ta outou e amui atu i teie nei tabula i te tahi atu mau faahororaa e ia imi i te tahi atu â mau parau haapiiraa tei haapiihia i roto i te Buka a Moromona e te Bibilia ma te faaohipa i te Arata‘i i te mau Parau Tumu aore râ te Arata‘i i te mau Papa‘iraa Mo‘a e te mau rave‘a i ni‘a i te itenati i scriptures.lds.org.
Hoho‘a no Harold B. Lee na Doyle Shaw, faati‘ahia e te Fare Anavaharau no te Ekalesia.