I te mau Reo e te mau Nunaa Atoa
I to te peropheta no te Buka a Moromona o Alama horo‘araa i te mau papaa parau o to’na nunaa i ta’na tamaiti o Helamana ra ua faaue oia ia’na ia haamana‘o e e « opuaraa paari » ta te Fatu i te faaherehereraa i te mau papa‘iraa mo‘a (Alama 37:12). Teie ta’na i parau no ni‘a i te mau papaa parau, « E e haapa‘ohia, e e tuuhia hoi te reira i tera ui i tera ui… e tae noa’tu i te tau e tuuhia’tu ai i to te mau fenua atoa, e to te mau re‘o atoa, e to te mau nunaa atoa, e to te mau opu atoa » (Alama 37:4).
I te matahiti 1827 ua farii Iosepha Semita i taua mau papaa parau ra e i te matahiti 1829 ua faaoti i to ratou itiraa i roto i te reo Paratane na roto i te horo‘araa e te mana o te Atua. Te buka, teie nene‘ihia i te matahiti 1830, e mauhaa misionare puai ïa no te faafariuraa i te feia tai‘o i te parau mau o te evanelia a Iesu Mesia. Ua nene‘i-matamua-hia e 5.000 buka, ua riro râ te haaponoraa i te Buka a Moromona, i « te mau fenua atoa, te mau opu atoa, te mau reo atoa e te mau nunaa atoa » e ohipa atea roa.
Ua haapapû râ te Fatu i teie tohuraa ia Iosepha Semita i te matahiti 1833, ma te tohu atu e i te hoê mahana i reira « e faaroo te taata atoa i te îraa no te evanelia i roto i to’na iho re‘o, e i to’na iho parau » (PH&PF 90:11). Te faatupu nei te Buka a Moromona, tei ‘roto hoi … te îraa no te evanelia a Iesu Mesia » (PH&PF 20:9) i teie nei tohuraa.
I te ropuraa o te mau matahiti 1800 ua afa‘i te mau misionare i te evanelia i Europa. Ua nene‘ihia te Buka a Moromona na roto i te reo Danemaka, ma te peehia’tu e te mau nene‘iraa na roto i te reo Farani, Helemani, Italia e Welsh i te matahiti 1852. I teie mahana te vai nei te Buka a Moromona i roto i na 82 reo, e te mau pene ma‘itihia i roto i te tahi atu â 25 reo. Te tupu ra te tohuraa e e faaroo te mau taata atoa i te evanelia i roto i to ratou iho reo i te mau matahiti atoa a haere ai te ohipa iritiraa e te ohipa misionare i mua.
Te Ohipa no te Iritiraa.
I te tahi mau taime e titauhia e rave rahi mau matahiti no te faahope i te iritiraa i te Buka a Moromona mai roto atu i te reo Paratane i te hoê reo apî. E haamata te reira ia faati‘a ana‘e mai te Peresideniraa Matamua e te Pŭpŭ no te Tino Ahuru ma Piti Aposetolo i te opuaraa e ua nava‘i ana‘e te mau melo o te parau i te reo no te tavini ei feia iriti parau. E horo‘ahia i te feia iriti e te feia hi‘opo‘a i te mau arata‘iraa e e faauehia ratou ia faaea piri atu i te Varua a iriti ai ratou. Ia oti ana‘e te iritiraa, e haere atu ïa te papa‘iraa na roto i te hoê faanahoraa hi‘opo‘a a te feia faatere no te ekalesia.
I muri a‘e i te nene‘iraa, e nehenehe ïa i te mau melo ia poro‘i i te nene‘iraa apî na roto atu i te mau Pŭ Opereraa Buka. E rave rahi o teie mau melo tei farii na mua’tu i te tahi noa mau pene no te Buka a Moroma i roto i to ratou iho reo tumu, aore râ, i te tahi mau taime, te iteraa papû noa a te mau misionare.
Te Buka a Moromona e te Ohipa Misionare
Ia matara ana‘e te hoê fenua no te taime matamua i te ohipa misionare, e nehenehe te reo e riro ei fifi rahi. No te mea e aita e materia a te Ekalesia i nene‘ihia i roto i te reo o taua tufaa fenua ra, e titauhia ïa i te mau misionare ia haapii mai i te reo e ia faaite i to ratou iteraa papû na roto i te Varua. I te tahi mau tufaa o te ao nei, e rave rahi mau taata e parau nei i te tahi atu reo, e e nehenehe i te mau misionare ia horo‘a’tu ia ratou te hoê Buka a Moromona i roto i taua reo ra. Ei hi‘oraa, hou te Buka a Moromona i iritihia‘i i te reo Mongolia e rave rahi mau melo tei tai‘o i te nene‘iraa na roto i te reo Rusia.
E taa-maitai-hia râ te evanelia i roto i te matauraa e te maramarama o to te hoê ihoa taata reo tumu. Ua ite mata roa o Eric Gemmell tei tavini i roto i te Misioni no Slovenia Ljubljana mai te matahiti 2001 e tae atu i te matahiti 2003 i te huru ê raa no te mau melo e te mau taata e imi ra ia farii i te Buka a Moromona i roto i to ratou iho reo tumu. Ua tavini oia i na ava‘e 18 matamua o ta’na misioni hou te Buka a Moromona i vai mai ai na roto i te reo Slovenia.
E mea fifi roa te ohipa. Ua haamauhia te amaa matamua a te Ekalesia e 10 matahiti noa na mua’tu. No tiamâ-noa-iho nei o Slovenia e te faatea ê ra ia ratou i te reo Serbo-Croatia o to ratou fenua tahito. Ua ta‘ita‘i haere te mau misionare i te mau Buka a Moromona na roto i te reo Serbo-Croatia e te Paratane, ta te rahiraa o te feia apî i haapii i te fare haapiiraa. Te rahiraa râ o te taime, aita te taata i farii i te buka no te mea aita i nehenehe ia ratou i taa i te hoê o na reo e piti. Te haamana‘o nei o Eric i to’na mana‘o taiâ ia faaite i to’na iteraa papû i te taata no ni‘a i te faahiahia e te faufaa rahi o te Buka a Moromona —e ia parau atu ia ratou i muri iho e aita ta’na e buka na roto i to ratou iho reo.
E ono ava‘e hou Eric a ho‘i ai i te fare, ua tae atu te haaponoraa matamua no te mau Buka a Moromona na roto i te reo Slovenia. Ua faatupu te amaa i te hoê rururaa i reira te mau melo tata‘itahi e te mau misionare fariiraa i te hoê buka. « Ua vai mai te hoê varua taaê » te haamana‘o ra o Eric. Ua papa‘i oia i roto i ta’na buka aamu i to’na mau mana‘o a tape‘a ai oia i te hoê buka faufaa rahi tei tia‘i-maoro-hia. « E au ra i te tape‘araa i te mau api auro iho », ua papa‘i oia. I muri a‘e i te rururaa, ua rave te mau misionare i te mau buka i toe mai no te faaohipa i roto i te ohipa misionare. No to raua oaoa rahi e i to raua taeraa’tu i to raua fare faaearaa ua iriti o Eric e to’na hoa i te mau afata, ua haapurara haere i te mau buka e ua pata i te mau hoho‘a no te haamana‘o i te ohipa tei tupu. Aita i nehenehe ia raua ia tia‘i no te opere i te mau buka i te mau taata. Ma te Buka a Moromona Slovenia e vai ra, ua manuia te mau misionare i te paraparauraa’tu i te mau taata, ua noaa atoa ia ratou te hoê rave‘a no te faaoraora faahou i te mau iteraa papû o te mau melo paruparu tei ore i haere i te pureraa e rave rahi mau matahiti i teie nei.
I roto i na ava‘e hope‘a e ono o ta’na misioni, ua ite o Eric i te mau iteraa papû o te mau melo no Slovenia i te u‘araa. Ua parau oia, « I te taime ua noaa ia ratou te Buka a Moromona na roto i to ratou iho reo tumu, ua taa maitai ia ratou te reira ». Ua tomo hohonu atu te reira i roto i to ratou mau aau ». Na mua’tu, ua titauhia ïa i te feia a‘o e te mau orometua haapii i roto i te mau pureraaa a te Ekalesia ia tai‘o i te mau papa‘iraa mo‘a na roto i te reo Serbo-Croatia e ia ani i te hoê taata ia auvaha e ia tatara i te auraa o te mau parau. Te haamana‘o nei Eric e « E au ra ia’u e te ou‘a nei matou na ni‘a’tu i te mau parau tei ravehia mai mai roto mai i te tahi atu reo ». I to te mau melo haamataraa i te tai‘o i te Buka a Moromona i roto i to ratou iho reo tumu, ua rahi oioi to ratou ite no te evanelia », te parau ra Eric.
Na Roto i To Ratou Iho Reo
O Mojca Zheleznikar te hoê o taua mau melo ra tei tomo atu i roto i te Ekalesia i Slovenia hou a vai mai ai te Buka a Moromona Slovenia. Ua tupu mai to’na iteraa papû no te evanelia na roto i te faarooraa i te mau misionare e te tai‘oraa i te Buka a Moromona na roto i te reo Croatia e Paratane. I muri a‘e i te otiraa te iritiraa Slovenia, ua tai‘o Mojca i te papa‘iraa tei iritihia e ua ite oia i te mana o te mau parau i roto i to’na iho reo tumu. « Ua ite au i te parau mau i te rahiraa i roto ia’u ma te ohie e te mâ rahi », te haamana‘o ra oia. « E au ra mai te reo o to’u Atua tei Hamani ia’u i te parauraa mai ia’u na roto i to’u iho reo, te reo ta to’u metua vahine i parau mai ia’u ».
Te ite nei te mau melo na te ao taatoa i te hoê â mau mana‘o ia farii ana‘e ratou i te Buka a Moromona na roto i to ratou iho reo. I te matahiti 2003, i muri a‘e i te iritiraa o te Buka Moromona i te reo Kekchi, te hoê reo tei parauhia e te nunaa Maya no Guatemala e Belize, ua hi‘opo‘a faahou te feia iriti i te iritiraa e te mau melo no taua mau vahi ra. Te haamana‘o nei te hoê taata iriti, « Ua haaputuputu matou i te hoê pŭpŭ no te mau melo matamua i te fare pureraa no Senahu no te tai‘o, e a faaoti ai matou i te mau tufaa atoa, ua vai mai te hoê varua tura i roto i te piha. Ua hope roa te maramaramama, e ua parahi puai mai te Varua. E ohipa mo‘a tei tupu ».
Te mauruuru nei te hoê o te mau melo i roto i taua apooraa ra, o Elvira Tzi, no te iritiraa Kekchi no te Buka a Moromona no te mau haamaitairaa ta te reira e hopoi mai i te u‘i apî. Te parau nei oia e e faati‘a te iritiraa i te mau melo apî ia « noaa te hoê iteraa maitai no te parau a te Fatu e te hoê faatura no te mea ta te Fatu e titau nei ».
No te mau melo no te Ekalesia, te tai‘oraa i te Buka a Moromona na roto i to ratou iho reo e tumu ïa no te mau haamaitairaa faito ore. Ua parau te Peresideniraa Matamua , « a haapii mai ai e a haapii ai te mau melo ma te pure mai roto mai i te mau papa‘iraa mo‘a, e tupu ïa to ratou mau iteraa papû, e rahi atu ïa to ratou ite, e e rahi ïa to ratou here i te utuafare e ia vetahi ê, e nanea’tu ïa to ratou aravihi i te tavini ia vetahi ê, e e farii ïa ratou i te puai rahi a‘e no te pato‘i i te faahemaraa e no te paruru i te parau mau e te parau-ti‘a.1
Te mau Haamaitairaa Atea Roa
Te mau haamaitairaa rahi ta te Buka a Moromona e hopoi mai i roto i te oraraa o te mau taata o te tai‘o i te reira o te hoê ïa tura‘iraa puai ia faaite i te buka ia vetahi ê, ma te faatupu i te tohuraa. I te mau matahiti atoa, fatata e maha milioni Buka a Moromona e operehia nei na te ao taatoa nei i roto e hau atu i te 100 reo a faaite tata‘itahi ai te mau melo e te mau misionare i to ratou iteraa papû no ni‘a Iesu Mesia. Te heheuhia ra ïa te « opuaraa paari » ta Alama i parau i tahito ra i roto i te taeraa o te Buka a Moromona na te ao taatoa nei e tei taui i te oraraa.
E 5.000 Buka a Moromona tei nene‘i-matamua-hia.
A haere ai te ohipa no te iritiraa i mua, te ite nei te mau melo na te ao nei, mai ia Lea e Flora Lotrič i Slovenia, i te oaoa no te tape‘araa no te taime matamua i te hoê Buka a Moromona i roto i to ratou iho reo tumu.
Hoho‘a na Eric Gemmell
Ia oti te hoê iritiraa, e anihia te mau melo no te Ekalesia o te parau i te reo ia hi‘opo‘a faahou i te papa‘iraa. Mai te aui : Te hi‘opo‘a nei o Walter Barillas Soto, Mike Peck, Sulenny Ruby Cucul Sierra, John Bringhurst, e Josefina Cucul Tiul i te Buka a Moromona Kekchi i Cobán, Guatemala.
Aui i ni‘a : hoho‘a na Busath Photography; i raro: hoho‘a na Tod Harris