Poraus seni Fefin Chon Amwa, October 2011

Ika Sisap Tipemwaramwar

Julie B. Beck, Presetenin Fin Anisi unus.

Kopwe aneani ekkei mettoch, me nupwen mi och, kopwe aporausa ren ekkewe fefin ka churi. Kopwe aea ekkewe kapas eis epwe anisuk ne apochokuna ekkewe fefin ka churi me pwan aochu manauom ren aean Fin Anisi.

Nuku • Famini • Aninis

Non ewe Puken Mormon sia anneani usun anuon mi murino ir ra fakkun wenechar, pwara, me pochokun. “Ewer, ir mwan mi uren ennet me mosonoson, pwe ra kaeo ar repwe apwonueta ekkewe annukun Kot me fetan non wenechar fan mesan” (Alma 53:21). Ekkei anuon mi nukuchar ra meniniti iner kewe—pwe ar kewe nenien appiru me nour kewe sense.

Ekkewe inen noun Ilaman kewe sounfiu ra manau non fansoun mi wewefengen ngeni ach ei fansoun. Nonnomur mi weires me efeiengaw, me ekkewe serafo ra koko ngeni ar repwe wisen tutumunu ngaseno non pekin inis me non pekin ngun. Ikenai sia manau won eu fonufan ikkewe ia sise “maun ngeni futuk me chaa, nge fen ngeni muu, ngeni manaman, ngeni ekkewe sou nemenemen kirochen ei fonufan, ngeni föfförungawen ngun non neni mi tekia” (Ephesians 6:12).

Non fansoun osukosuk mi namwot sam me in me nenien appiru mi pochokun pwe repwe aiti ewe ennet noun Ilaman kewe sounfiu ra fen sinei: “Ika rese tipemwaramwar, Kot epwe angasereno”(Alma 56:47). Tumunuoch mi namwot ne aiti me pwarano ei ennet ikenai. Nge, sisap niuokus. Nupwen sia sinei kich io me Kot io me sia föri pwon mi pin ren I, sipwe—usun chok ekkei inen sounfiu—me epwe ach pochokunen efisata murino.

Mi pung pwe, emon me emon noun Ilaman kewe 2,060 sounfiu mi feioch ren emon in. Nge ekkei in rese uta won pwisin chok ar föfför. Fiti fengen ren pwan ekkoch mwan me fefin mi wenechar, ekkei in ra ochufengeni ar nuku me nenien appiru ne aiti ewe pochokunen pwon mi pin. Ekkewe serafon ena fansoun ra weweti ewe pwon mi pin semer kewe ra föri pwe resap fiti pekin maun. Iwe nupwen ita ese tufich, emon Sam won Nang a uren tong a suki eu anen ekkei sam me in ar repwe apwonueta ar pwon mi pin—me tumunu ngasenon manauer (nengeni Alma 56:5–9). Mi namwot sipwe pwan apwonueta ach kewe pwon mi pin pwe semirit me serafo—pwisin nouch kewe me ekkewe ir non ach kewe wart, pranch, neni, me fonu—repwe weweti me tipeu ngeni apwonuetan pwon mi pin.

Nupwen sia apwonueta ach kewe pwon, Semach won Nang a tongeni ammonata ewe an fan itach. Sipwe fakkun tichik ne manaueni ach kewe pwon mi pin. Ren awewe chok, sia tongeni tichik non iotek, non anneani pukfel, non amwochun echo taropwen mumuta non tempel, non ufouf ese pwarano inisich, non sufoniti ewe Raninfel. Nupwen sia föri iei usun, nouch kewe repwe sinei me repwe tongeni apasa, “Sise tipemwaramwar inach kewe mi sisinei” (Alma 56:48).

Fefin sounang non Fansoun Soponon ir mi esinna pwe ar pochokun a feito seni an ewe Samon Achasefan rese tongeni fangeta non fansoun weires me osukosuk. Kich chon apwonueta pwon mi pin, sia angoch ne apochokuna, aninis, me tumunu semirit me serafo pwe eu ran sipwe apasa usun ei pinon aramas, “Ute fen kuna ei ukukkun pochokun, ennet, ese mo fen wor nein meinisin” (Alma 56:45).

Seni ekkewe Pukfel

Alma 53; 56–58

© 2011 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/10. Kapungunon chiakun: 6/10. Chiakun Visiting Teaching Message, October 2011. Chuukese. 09770 901

Met Ua Tongeni Föri?

Ifa usun ngang mi tongeni anisi pwi kewe ar rewpwe esinna me anganga ewe manaman a nom rer ne anisi ei pinon aramas?
Ifa sokkun pwäratä upwe kuna non ewe Puken Mormon ne ponueni ekkewe weires ua kuna ikenai?