Poraus seni ewe Aewin Presetensi, October 2011
Pwon mi Auchea seni ewe Puken Mormon
Chommong ier rano ua uta nepekin eu pet an emon sam mi kukkun ierin non fansoun a fetan ngeni an epwene mano. Punuan mi netipechou me nour kewe ruemon semirit mi uta arapakkan. A angei pei non poun we, me a apasa ngeniei fan mesan mi uren noninen, “Pisop, ua sinei pwe ekiseno chok upwene mano. Kose mochen kopwe ereniei met epwe fis ngeni nguni nupwen ua mano.”
Ua apasa eu iotek non monomon faniten ewe emwenin nang me ua kuna noun kewe pukfel won ewe chepen. Ua angei ewe puk me kunnu ekkewe peich. Ua muttir ne kuna pwe ua kouno won sopun 40 non Alma seni ewe Puken Mormon, nge esap ren pwisin ai achocho. Ua anneani ekkei kapas ngeni i:
“Ewe chon nang a pwar ngeniei, pwe ngunun aramas meinisin, non ewe chok fansoun a tou seni ewe inis, … repwe niwinno ren ewe chok Kot a ngenir manauer.
“Iwe … ekkewe ngun mi murino ra feino non ewe nenien pwapwa me kinamwe, me non chok ei neni itan paratais, nenien ar asoso, kinamwe, repwe asoso seni ar kewe riaffou, me seni ar pekusun tumunuoch me weires” (Alma 40:11–12).
Non ai sopweno ne anneani usun ewe Manausefan, mesan ei mwan a titin me eu emenimen a pwa won awan. Nupwen ua asopwano ai churir, ua kapong ngeni ei famini mi murino.
Mwirin ua kuna ewe fefin me noun kewe atun ewe mi ma. Ua ekkiek usun ena pwinin nupwen emon mwan a titingor faniten ewe ennet me, a rongorong pwonuen an kapas eis seni ewe Puken Mormon.
Seni ewe Puken Mormon a feito pwan ekkoch pwon mi auchea, fiti pwonen kinamwe, ngaseno, me feioch ika sipwe “angang ngeni ewe Koten ewe fonu, ina Jises Kraist” (Ether 2:12).
Seni ekkei peich a feito ewe pwonen “pwapwa esemuch” ngeni “ekkewe ir mi apwonueta ekkewe annukun Kot. Pun nengeni, ra feioch ren mettoch meinisin, me non pekin inis pwan non pekin ngun” (Mosiah 2:41).
Seni ekkei peich a feito ewe pwonen “pwapwa chapur” ngeni ekkewe ir mi winiti “pisekin angang nepoun Kot” non amanauen Noun kewe at me fopun mi auchea (Alma 28:8; 29:9).
Seni ekkei peich a feito ewe pwon pwe Israel mi toropwaseno epwe chufengen—eu angang minne sia fiti ren napanapen ach angangen misineri ekkis meinisin won fonufan (nengeni 3 Nifai 16; 21–22).
Seni ekkei peich a feito ewe pwon pwe nupwen sia iotek ngeni ewe Sam non iten Jises Kraist mi pin, ach kewe famini repwe feioch (nengeni 3 Nifai 18:21).
Seni ach kaeo ngeni masouan a feito apwonuetan ewe pwon seni ewe soufos pwe “epwe feito non manauemi me imwemi anapanon Ngunun ewe Samon, eu mochen mi pochokuneno ne fetan non anneasochis ngeni An kewe annuk, eu kapasen pwäratä mi pochokuneno pwe ewe Noun Kot mi wesewesen manau.”1
Iwe seni ekkewe peichen ewe Puken Mormon a feito an Moroni pwon pwe ren ennetin iotek, seni netipach, me nuku non Kraist, sipwe tongeni sinei ennetin ekkei pwon “ren manamanen ewe Ngun mi Fel” (nengeni Moroni 10:4–5).
Ua fiti ekkewe ekkoch soufos non fansoun soponon, ne pwäratä usun ennetin ei “puk mi fakkun pung me nein puk meinisin me won ei fonufan,”2 ewer pwe ewe Puken Mormon, pwan eu kapasen pwäratä usun Jises Kraist. An poraus mi chou fetanei won fonufan me a uweato chon anneani ngeni ar sinei ewe ennet. Ai kapasen pwäratä pwe ewe Puken Mormon mi siwini manauen aramas. Amo emon me emon kich sipwe anneani me anneani sefanni. Iwe amo sipwe pwapwaiti ach sipwe aporausa ach kapasen pwäratän an kewe pwon mi auchea ren meinisin noun Kot kewe semirit.
© 2011 seni Intellectual Reserve, Inc. Meinisin pung mi kawor. A för non Merika. Kapungunon non fasun Engenes: 6/10. Kapungunon chiakun: 6/10. Chiakun ewe First Presidency Message, October 2011. Chuukese. 09770 901
Afanafan seni Ei Poraus
Non ekkewe pukfel “sia kuna nongonongen ennet minne epwe awesano iteiten osukosuk me iteiten weires me iteiten sosot mi tori chon fonufan” (Teaching, No Greater Call [1999], 51). Nupwen ka aporausa an Preseten Monson we poraus ren ewe famini, kopwe tingorer ar repwe ausening ren ekkewe “pwon mi auchea” a kapas usun non ewe Puken Mormon. Meni kopwe apasa eu pwon non ewe Puken Mormon mi auchea ngonuk.