1 Iwe ennet, ennet, ua apasa ngenikemi pwe me wor nei ekkoch siip, minne esap ir seni ei fonu, esap pwan ir seni ewe fonuen Jerusalem, esap pwan non ew kinikinin ena fonu unukun ikewe ua fen no ngeni ne angang.

2 Pun ir ekkewe ua kapas usun ir ekkewe resamo rongorong neuwei; are esap mwo fan ew ua pwarano inisi ngeni ir.

3 Nge ua fen angei ew annuk seni ewe Sam pwe upwe feino rer, iwe pwe repwe rongorong neuwei, me repwe anneanong nein nei kewe siip, pwe epwe wor ew chok mwicheich me emon chon masen siip; iei minne ua no pwe upwe pwarano inisi ngeni ir.

4 Iwe ua annuku ngenikemi pwe oupwe makkei ekkei kapas mwirin ai upwe feino, pwe ika pwe nei kewe aramas non Jerusalem, ir ekkewe ra fen kunaei me nonnom rei non ai angang, rese tingor seni ewe Sam non itei, pwe repwe tongeni angei mirit usumi me ren ewe Ngun mi Fel, me pwan usun ekkewe ekkoch einang rese sinei usur, pwe ekkei kapas minne oupwe makkei repwe soposopono me pwano ngeni ekkewe chon Gentile, pwe ren unusochun ekkewe chon Gentile, nussun mwirimwirir kewe, ekkewe repwe toropas fetan won unungen ewe fonufan pokiten ar nukunukumang, repwe tongeni emmwenito, are repwe tongeni emmwen ngeni ew mirit usun ngang, ar Chon Angasano.

5 Iwe mwirin upwe ionfengenir seni ekkewe ruanu kinikinin ewe fonufan; iwe mwirin upwe apwonueta ewe pwon mi pin minne ewe Sam a fen fori ngeni ekkewe aramasen ewe imwen Israel meinisin.

6 Iwe ra feioch ekkewe chon Gentile, pokiten ar nuku non ngang, non me ren ewe Ngun mi Fel, minne a pwarata ngeni ir usun ngang me usun ewe Sam.

7 Nengeni, pokiten ar nuku non ngang, anon ewe Sam, me pokiten ewe nukunukumang ami, O imwen Israel, non ewe ranin soponon ewe ennet epwe feito ngeni ekkewe chon Gentile, pwe unusochun ekkei mettoch repwe pwano ngeni ir.

8 Nge riaffou, anon ewe Sam, ngeni nukunukumangen ekkewe chon Gentile—pun ina mwo ra fen feito won unungen ei fonu, me ra fen atoropasa nei kewe aramas ekkewe ir seni ewe imwen Israel; iwe nei kewe aramas ir seni ewe imwen Israel ra fen katuruu seni me neir, me ra fen chapapetiw me fan peche me rer;

9 Iwe pokiten umoumochun ewe Sam ngeni ekkewe chon Gentile, me pwan ekkewe kapung an ewe Sam won nei kewe aramas ir ekkewe seni ewe imwen Israel, ennet, ennet, ua apasa ngenikemi, pwe mwirin ekkei meinisin, me ua fen annuku nei kewe aramas ekkewe ir seni ewe imwen Israel pwe repwe wichiwich, me repwe riaffou, me repwe ninnino, me repwe katuruu me neir, me repwe koput me rer, me repwe winiti ew eisis me minen atakirikir me neir—

10 Iwe iei ewe Sam a annuku pwe upwe apasa ngenikemi: Atun ena ran nupwen ekkewe chon Gentile repwe tipis ngeni ai we kapas allim, me resap etiwa unusochun ai we kapas allim, me repwe nuapas non namanam tekian netiper nap seni muu meinisin, me nap seni ekkewe aramasen unusen fonufan meinisin, me repwe uren sokopaten chofona meinisin, me nikatupotup, me uren nukumach, me sokopaten nikatupotup meinisin, me nii manau, me mwokutukutun pris, me nisou, me uren anieput mi monomon; iwe ika repwe fori ekkena mettoch meinisin, me resap etiwa unusochun ai we kapas allim, nengeni, anon ewe Sam, upwe angei unusochun ai we kapas allim seni me neir.

11 Iwe mwirin upwe chechemeni ai we pwon mi pin minne ua fen fori ngeni nei kewe aramas, O imwen Israel, iwe upwe uwei ai we kapas allim ngeni ir.

12 Iwe upwe pwar ngenikemi, O imwen Israel, pwe ekkewe chon Gentile esap wor ar nemenem womi; nge upwe chechemeni ai we pwon mi pin ngenikemi, O imwen Israel, iwe oupwe emmwen ngeni miritin unusochun ai we kapas allim.

13 Nge ika ekkewe chon Gentile repwe aier me niwin ngeniei, anon ewe Sam, nengeni repwe anneanong nein nei kewe aramas, O imwen Israel.

14 Iwe usap mutata nei kewe aramas, ekkewe ir seni ewe imwen Israel, pwe repwe feino me neir, me puriretiw, anon ewe Sam.

15 Nge are resap kun ngeniei, me ausening ngeni neuwei, upwe mutireta, ewer, upwe mutata nei kewe aramas, O imwen Israel, pwe repwe feino me neir, me repwe puriretiw, iwe repwe usun salt a nepatapateno, minne seni ena fansoun ese chiwen öch ngeni och mettoch nge epwene katuruu, me chapapetiw me fan pechen nei kewe aramas, O imwen Israel.

16 Ennet, ennet, ua apasa ngenikemi, iei ewe Sam a annuku ngeniei—pwe upwe ngeni ekkei aramas ei fonu pwe nenien ar nonnom.

17 Iwe mwirin ekkewe kapas an ewe soufos Isaiah repwe pwonueta, minne ra apasa:

18 Noumi kewe chon mas repwe sachetai neuwer; fiti ewe mongungu repwe kön fengen, pun repwe kuna ren meser nupwen ewe Samon epwe uweiato sefan Zion.

19 Puchoruu non pwapwa, kon fengen, ami neni mi pon non Jerusalem; pun ewe Samon a fen ekinamwei noun kewe aramas, i a fen angeisefani Jerusalem.

20 Ewe Samon a fen pwarano poun mi fel me ne mesen ekkewe muu meinisin; me unusen nesopun ewe fonufan meinisin repwe kuna ewe amanauen Kot.