1 Iwe iei non ewe fansoun pwe non ewe engon me wonuen ier seni ewe wareton Kraist, Lakonias, ewe kepinan ewe fonu, a angei echo toropwe seni ewe sou emmwen me ewe kepinan ei mwichen chon sona; iwe ikkei ekkewe kapas minne ra makketiw, ra apasa:

2 Lakonias, unusen tekia me kepina mi nap won ewe fonu, nengeni, ua makkei ei toropwe ngonuk, me ua ngonuk fokkun watten mwar pokiten om pochokun, me pwan pochokunen noum aramas, ne amwochu met minne oua ekieki pwe ami pung me ngaseno; ewer, oua angoch non nukuchar, usun ita ami mi aninis me ren poun emon kot, non eppetin ami ngaseno, me ami pisek, me fonuemi, are met minne oua apasa pwe ami.

3 Iwe a nikinikin ew attong ngeniei, unusen tekia Lakonias, pwe kopwe fokkun puch me namotmwan om ekieki pwe kopwe tongeni ungeni fokkun chommong mwan mi pwaracho ekkewe ra nom fan ai nemenem, ekkewe ra uta iei non ar pisekin maun, me awitiwiti ren ennetin mochen ewe kapas—Feitiw won ekkewe chon Nifai me nireno.

4 Iwe ngang, ua sinei usun ar pwaracho ese tongeni kuf, ua fen sotunir me non ewe nenien maun, iwe ua sinei usun ar koput ngenikemi esemuch pokiten ekkewe chommong muan minne oua fen fori ngeni ir, iei minne ika repwe feitiw ngenikemi repwe churikemi ren unusen kiteter.

5 Iei minne ua fen makkei ei toropwe, eppungano ren pwisin pei, pokiten ai aureki tufichimi, pokiten ami pochokun non met minne oua nuku pwe ami pung, me ngunumi mi pwaracho non ewe nenien maun.

6 Iei minne ua mak ngonuk, ua mochen pwe oupwe fangeta ngeni ekkei nei aramas, teninimwemi kewe, fonuemi kewe, me pisekimi kewe, nap seni ar repwe churikemi ren ewe ketinas me ena kiteter epwe fis womi.

7 Are non ekkoch kapas, oupwe fangeta inisimi ngenikem, me chungeni kem me kaeo usun am kewe angang mi monomon, me winiti pwim pwe oupwe usum chok—ousap noum slave, nge oupwe pwim me chiechiem ne pisekini pisekim kewe meinisin.

8 Iwe nengeni, ua akkapon ngonuk, ika oupwe fori ei, ren ew pwon oupwe akkaponu, ousap ninnino; nge ika ousap fori ei, ua akkapon ngonuk ren ew pwon ua akkaponu, pwe non ewe maram epwe feito upwe annuku pwe nei kewe sounfiu repwe feitiw ungenikemi, me resap amwochu pour me resap awora mi manau, nge repwe nikemino, me repwe aturatiw ewe ketinas womi pwan mwo tori ami ousap chiwen fis.

9 Iwe nengeni, ngang Kitianai; iwe ngang ewe kepinan ei mwichen Katianton mi monomon; minne mwich me angangan kewe ngang mi sinei pwe ir mi öch; iwe ir seni fansoun nom iwe ra fen keititiw ngenikem.

10 Iwe ua makkei ei toropwe ngonuk, Lakonias, me ua mochen pwe oupwe fangeta fonuemi kewe me pisekimi kewe, me nukun ewe assukun cha, pwe ekkei nei aramas repwe angei sefan ar kewe pung me government, ir ekkewe ra fen keimuno seni kemi pokiten ami fofforungaw ne amwochu seni ir ar pung me government, iwe tiwenon chok ika oupwe fori ei, upwe angei niwinin ar muan. Ngang Kitianai.

11 Iwe iei non ewe fansoun nupwen Lakonias a angei ei toropwe a fokkun ingeno, pokiten pwarachon Kitianai an eis non pochokun ewe nemenemen ewe fonuen ekkewe chon Nifai, me pwan an kapasen efeiengaw ngeni ekkewe aramas me an angei niwinin muanin ekkewe rese angei muan, tiwenon chok ar ra pwisin ammwani inisir ren ar rikino ngeni ekkena chon sona mi ngaw me anieput.

12 Iwe iei, ei Lakonias, ewe kepina, i emon mwan mi pung, me ese tongeni nuokus me ren ekkewe tingor me kapasen anuokus an emon chon sona; iei minne i ese ausening ngeni ewe toropwe noun Kitianai, ewe kepinan ekkewe chon sona, nge a annuku pwe noun kewe aramas repwe sio ngeni ewe Samon fan iten pochokun ne ungeni ewe fansoun ekkewe chon sona repwe feitiw ungeni ir.

13 Ewer, a tinano ew porous nein ekkewe aramas meinisin, pwe repwe ionfengeni nour kewe fefin, me nour kewe semirit, nour kewe penen man me nour kewe pwin man, me ar pisek meinisin, tiwenon chok fonuer we, ngeni ew neni.

14 Iwe a annuku pwe tittin eppet repwe kauuta ne rokopwanireno, me pochokunan epwe fokkun pochokun. Iwe a annuku pwe sounfiu, ekkewe chon Nifai me pwan ekkewe chon Leiman, are seni ir meinisin ekkewe mi anneanong nein ekkewe chon Nifai, repwe annomur ne rokopwanireno pwe chon mas pwe repwe tumunur, me maser seni ekkewe chon sona neran me nepwin.

15 Ewer, a apasa ngeni ir: Usun ewe Samon mi manau, tiwenon chok ika oupwe aier seni ami kewe angangangaw meinisin, me sio ngeni ewe Samon, esap wor aanen ami oupwe ngaseno seni ne poun ekkewe chon sonan Katianton.

16 Iwe fokkun auchea me amwarar ekkewe kapas me osini an Lakonias ina popun ra efisi nuokus an epwe feito won ekkewe aramas meinisin; iwe ra achochoi inisir non ar unusen pochokun ne fori anongonong won ekkewe kapas an Lakonias.

17 Iwe non ewe fansoun pwe Lakonias a kefinita kaptin mi nap me won ekkewe sounfiun ekkewe chon Nifai meinisin, pwe repwe emmweni ir atun ewe fansoun ekkewe chon sona repwe feitiw tou seni ewe fonu pon ne ungeni ir.

18 Iei ewe mi wesen nap me nein ekkewe kaptin mi nap meinisin me ewe mi wesen tekia chon emmwenin ekkewe sounfiun ekkewe chon Nifai meinisin a kefinita, iwe itan Kitkitonai.

19 Iwe iei ewe eereni me nein ekkewe chon Nifai meinisin pwe repwe finita pwe nour kaptin mi nap, (tiwenon chok non ar kewe fansoun angangangaw) emon mi wor ren ewe ngunun pwarata me pwan osini; iei minne, ei Kitkitonai a emon soufos mi napanap me neir, usun chok pwan ewe sou apung mi nap.

20 Iei ekkewe aramas ra apasa ngeni Kitkitonai: Iotek ngeni ewe Samon, me sipwe feita won ekkewe chuk me non ewe fonu pon, pwe sipwe tongeni turuta won ekkewe chon sona me nireno me non pwisin fonuer kewe.

21 Nge Kitkitonai a apasa ngeni ir: Ewe Samon a annuku pwe sisap fori; pun ika sipwe feita ungeni ir ewe Samon epwe fangeta kich ne pour; iei minne sipwe amonnata inisich nenukanapen fonuach kewe, iwe sipwe ionfengeni nouch kewe sounfiu meinisin, me sisap no ungeni ir, nge sipwe witiwit tori ar repwe feito ungenikich; iei minne usun ewe Samon mi manau, sipwe fori ei i epwe fangereto non pouch.

22 Iwe non ewe fansoun non ewe engon me fisuen ier, non soponon ewe ier, ewe porous an Lakonias a fen no fetan non unusen ewe fonu, iwe ra fen angei nour kewe oris, me war kewe chariot, me nour kewe man, me nour kewe penen man, me nour pwin man, me ar kewe grain, me ar pisek meinisin, me karis ren ukukun ngorow me ren chommongun engon ngorow, tori ar ra feino meinisin ngeni ewe neni minne a fen kefinita pwe repwe ionfengeni inisir ie, pwe repwe eppeti inisir seni ekkewe chon koum ngeni ir.

23 Iwe ewe fonu minne a kefinita ina ewe fonuen Saraemla, me ewe fonu minne a nom nefinen ewe fonu Saraemla me ewe fonu Fonuen ras, ewer, ngeni ewe kinikin minne a nom nefinen ewe fonu Fonuen ras me ewe fonu Tatakis.

24 Iwe a wor ew fokkun chommongun ngorow aramas ekkewe ra iteni chon Nifai, ekkewe ra ionfengeni inisir non ei fonu. Iei Lakonias a annuku pwe repwe ionifengeni inisir non ewe fonu eor, pokiten ewe weiresin ewe anumamau minne a nom won ewe fonu ennefen.

25 Iwe ra apochokunano inisir seni ekkewe chon koum ngeni ir; iwe ra nom won ewe fonu, me non ew mwicheich, iwe ra nuokusiti ekkewe kapas minne ra fen affateno me ren Lakonias, ina popun pwe ra aier seni ar kewe tipis meinisin; me ra wata ar iotek ngeni ewe Samon ar Kot, pwe i epwe angaser non ewe fansoun ekkewe chon koum ngeni ir repwe feitiw ungeni ir non maun.

26 Iwe ra fokkun uren netipechou pokiten ekkewe chon koum ngeni ir. Iwe Kitkitonai a annuku pwe repwe for pisekin maun seni sokopaten nikinik, me repwe pochokun ren fouten eppet, me ren pwonupwon, me ren kukkun foukukkumosun pwonupwon, anongonong won napanapen an aurour.