Importante Ka sa Iya

Ni Pangulong Dieter F. Uchtdorf

Ika-duhang Manuglaygay sa Unang Panguluhan

Ang Ginuo nagagamit sang timbangan nga tuhay kaayo sa iya sang kalibutan sa pagtimbang sang bili sang isa ka kalag.

Si Moises, isa sang pinakahalangdon nga mga propeta nga nakilal-an sang kalibutan, ginpadako sang anak nga babayi sang Faraon kag naghinguyang sang una nga 40 katuig sang iya kabuhi sa mga palasyo sang Egipto. Sia mismo nakahibalo sang kahimaya kag kaharianon sinang dumaan nga ginharian.

Pagkaligad sang pila ka tuig, sa ibabaw sang isa ka malayo nga bukid nga napa-in gikan sa pagkahalangdon kag pagkahimaya sang makagagahum nga Egipto, si Moises nagtindog sa presensya sang Dios kag nagpakighambal sa Iya nawong sa nawong subong nga ang isa ka tawo nagapakighambal sa iya abyan.¹ Sa tunga sinang pagduaw, ginpakita sang Dios kay Moises ang ginbuhat sang Iya mga kamot nga ginatugutan sia nga makita ang Iya buhat kag himaya. Sang matapos ang palanan-awon, si Moises natumba sa duta sing pila ka oras. Sang magbalik ang iya kusog, may narealisar sia, nga sa bug-os nga tinuig sang iya pagtiner sa palasyo sang Faraon, wala pa natabo sa iya sang una.

“Nakahibalo ako,” siling niya, “nga ang tawo wala-wala.”²

Mas Kubos Kita Sangsa Aton Ginahunahuna

Mas madamo kita sing nahibaloan parte sa uniberso, mas mahangpan naton—sing bisan diutay lang—ang nahibaloan ni Moises. Ang uniberso tuman kadako, misteryoso, kag mahimayaon nga indi ini matungkad sang hunahuna sang tawo. “Mga kalibutan nga indi maisip ang akon gintuga,” siling sang Dios kay Moises.³ Ang katanhaga sang kalangitan sa kagab-ihon matahum nga panaksihon sinang kamatuoran.

Diutay lang nga mga butang ang nagpuno sa akon sang subong nga pagkahalawhaw pareho sang paglupad sa kagab-ihon patabok sa mga kadagatan kag mga kontinente kag nagatamwa sa bentana sang akon ginapungkuan (sa eroplano) sa wala’y katapusan nga himaya sang minilyon ka mga bituon.

Gintinguhaan sang mga astronomer (siyentipiko nga nagatuon parte sa uniberso) nga isipon ang kadamuon sang mga bituon sa uniberso. Isa ka grupo sang mga siyentipiko nagbulobanta nga ang kadamuon sang mga bituon nga malab-ot sang aton mga teleskopyo 10 ka beses nga mas madamo sangsa tanan nga balas sa mga baybayon kag mga disyerto sang kalibutan.⁴

Ining konklusyon may dako nga kaangid sa deklarasyon sang dumaan nga propetang si Enoc: “Kon nangin posible nga ang tawo makaisip sang mga elemento sang duta, huo, minilyon nga mga duta pareho sini, indi ini ang panugod sang kadamuon sang imo mga gintuga.”⁵

Nahanungod sa kasangkad sang mga gintuga sang Dios, indi makatilingala nga ang halangdong si Haring Benjamin naglaygay sa iya katawhan nga “dalayon nga huptan sa panumduman, ang pagkawala’y tupong sang Dios, kag ang inyo kaugalingon nga pagkawala-wala.”⁶

Mas Dako Kita Sangsa Aton Ginahunahuna

Apang bisan pa nga ang tawo wala-wala, nalipay ako sa paghunahuna kag pagkahalawhaw nga “ang bili sang mga kalag mangin dako sa atubang sang Dios.”⁷

Kag samtang makatulok kita sa wala’y katapusan nga kasangkad sang uniberso kag makasiling, “Ano ang tawo ikomparar sa himaya sang pagtuga?” Ang Dios mismo nagsiling nga kita ang rason nga gintuga Niya ang uniberso! Ang iya buhat kag himaya—ang katuyuan para sining halangdon nga uniberso—amo nga luwason kag ipahitaas ang katawhan.⁸ Sa malip-ot, ang wala’y katapusan nga kasangkad sang katubtuban, ang mga himaya kag mga misteryo sang wala’y katapusan nga uniberso ginpasad tanan para sa benepisyo sang ordinaryo nga mga mortal pareho sa imo kag sa akon. Ang aton Amay nga Langitnon nagtuga sang uniberso agud mahimo naton malab-ot ang aton potensyal bilang Iya nga mga anak.

Ini isa ka kabaliskaran sang tawo: kon ikomparar sa Dios, ang tawo wala-wala; apang importante kita sa Dios. Bisan pa nga kon ikomparar sa walay katapusan nga pagtuga ayhan daw wala-wala kita, may ara sa aton nagakirab nga walay katapusan nga kalayo nga nagadabdab sa sulod sang aton dughan. May yara kita sang di-matungkad nga promisa sang pang-kahitaasan—mga kalibutan nga wala’y katapusan—nga sarang naton malab-ot. Kag ini ang dakong handum sang Dios nga buligan kita nga malab-ot ini.

Ang Kabuangan sang Bugal

Ang dakong manuglimbong nakahibalo nga isa sang iya pinakaepektibo nga kasangkapan sa pagpatalang sang mga anak sang Dios amo ang pagsulay sing tuman sang mga kabaliskaran sang tawo. Sa iban, ginasulay niya ang ila bugalon nga mga huyog, nga ginapahambog sila kag ginapaisog sila nga magpati sa pantasya sang ila kaugalingon nga pagkaimportante kag kabakod. Ginasugiran niya sila nga nagapangibabaw sila sa sinang ordinaryo kag nga bangod sang ikasarang, panublion, ukon estado sa sosyedad, napa-in sila gikan sa kinaandan nga talaksan sang tanan nga nagapalibot sa ila. Ginatuytuyan niya sila sa pagpamat-od nga sila, sa amo nga rason, wala napaidalom sa pagdumala sang bisan kay sin-o nga mga layi kag indi matublag sang bisan kay sin-o nga mga problema.

Ginasiling nga si Abraham Lincoln nanamian sang ini nga binalaybay:

O ngaa dapat bala magpabugal ang espiritu sang mortal?
Kasubong sang madasig-maglabay nga bulalakaw, madasig-maglupad nga panganod,
Kasanag sang kilat, paghanot sang balod,
Ang tawo nagaagi gikan sa kabuhi padulong sa iya nahamtangan sa lulubngan.9

Ang mga disipulo ni Jesucristo nakahangop nga ikomparar sa katubtuban, ang aton pagluntad sa sining mortal nga kapalibutan “gamay lamang nga tion” sa uniberso.¹⁰ Nakahibalo sila nga ang matuod-tuod nga bili sang isa ka tawo wala masyado labot sa kon ano ang labing ginapasulabi sang kalibutan. Nakahibalo sila nga matangkas ninyo ang natipon nga kuwarta sang bilog nga kalibutan kag indi man lang ini makabakal sang isa ka bareta sang tinapay sa ekonomiya sang langit.

Ang yadtong “makapanubli sang ginharian sang Dios”¹¹ amo yadtong mangin “subong sang isa ka bata, nga masinulundon, mapailubon, mapainubuson, mapainumuron, puno sang gugma.”¹² “Kay ang tagsa-tagsa nga nagapakataas sang iya kaugalingon paubson; apang ang nagapaubos sang iya kaugalingon pataason.”¹³ Ang subong nga mga disipulo nakahangop man “nga kon yara kamo sa pag-alagad sang inyo mga isigkatinuga yara lamang kamo sa pag-alagad sang inyo Dios.”¹⁴

Wala Kita Nalipatan

Isa pa ka paagi nga nagapanglimbong si Satanas amo ang paagi sa pagpalas-ay ukon pagpatalaw sang buot. Ginatinguhaan niya nga isentro ang aton panan-aw sa aton kaugalingon nga pagkawala’y-pulos tubtob nga magsugod kita sa pagduhaduha sa aton kapuslanan. Ginasugiran niya kita nga tuman kita kagamay para matalupangdan sang bisan sin-o, nga nalipatan na kita—labi na sang Dios.

Luyag ko magpaambit sa inyo sang isa ka personal nga eksperiyensya nga mahimo makabulig sa sinang nagabatyag nga daw walay-pulos, nalipatan, ukon nagaisahanon.

Madamo na nga tinuig ang nagligad nagtambong ako sa pilot training sa United States Air Force. Malayo ako sa akon puluy-an, isa ka lamharon nga soldado sang West Germany, natawo sa Czechoslovakia nga nagdako sa East Germany kag makahambal sang Ingles apang sing may kabudlayan. Madumduman ko pa sing maayo ang akon pagbiyahe pakadto sa amon training base sa Texas. Nagasakay ako sa eroplano nga nagapungko sa tupad sang isa ka pasahero nga nagahambal sa mabug-at nga Bagatnan nga asento. Haluson ako makaintiendi sang iya ginahambal. Naghunahuna ako kon basi bala gintudluan ako sang sayop nga lengguahe. Kinulbaan ako sa pagpamensar nga kinahanglan ko magkompetensya para sa ginalauman nga mga matag-as nga posisyon sa pilot training batok sa mga estudyante nga tubong-taghambal sang Ingles.

Pag-abot ko sa air base sa gamay nga banwa sang Big Spring, Texas, ginpangita kag nakit-an ko ang branch sang Santos sa Ulihing mga adlaw nga ginatapoan sang pila lamang ka manami nga mga miyembro nga nagamiting sa ginaarkilahan nga mga kuwarto sa air base mismo. Ang mga miyembro yara sa proseso sang pagpasad sang gamay nga meetinghouse nga magaserbe bilang permanente nga duog para sa Simbahan. Sadto nga mga panahon ang mga miyembro ang nagapatigayon sang kalabanan sang obra sa bag-o nga mga bilding.

Nagtambong ako adlaw-adlaw sa akon pilot training kag nagtuon sing todo kag dayon naghinguyang sang kalabanan sang akon bakante nga oras sa pagpasad sang bag-o nga meetinghouse. Didto natun-an ko nga ang dos-por-kuwatro indi isa ka tikang sa saot kundi isa ka panid sang kahoy. Natun-an ko man ang importante nga survival skill sa paglikaw sa akon kamalagko kon nagamartilyo sang lansang.

Naghinguyang ako sing dako nga tiempo sa pagpasad sang meetinghouse nga ang branch president—nga isa man sang amon flight instructors—nagkabalaka nga ayhan dapat ako maghinguyang sing mas dako nga tiempo sa pagtuon.

Ang akon mga abyan kag kaupod nga estudyante nga mga piloto nagsako man sang ila mga kaugalingon sa mga kahiwatan sa ila bakante nga oras, apang siguro gid ako nga ang pila sadtong mga kahiwatan indi santo sa karon nga polyeto sang For the Strength of Youth. Sa akon kaugalingon, nalipay ako nga mangin aktibo nga bahin sining gamay nga branch sa nakatundan sang Texas nga ginapraktis ang akon bag-o natun-an nga kabatid sa pagpamanday kag ginapasanyog ang akon Ingles samtang ginatuman ko ang akon mga calling sa pagtudlo sa elders quorum kag sa Sunday School.

Sadto nga panahon, ang Big Spring, wala’y sapayan sang ngalan sini, isa ka gamay, di-importante, kag di-kilala nga lugar. Kag sa masami nakabatyag ako sang subong gid parte sa akon kaugalingon—di-importante, di-kilala, kag medyo nagaisahanon. Bisan pa, wala gid ako bisan kis-a naghunahuna kon nalipatan ako sang Ginuo o kon makita gid man Niya ako didto. Nakahibalo ako nga indi importante sa Amay nga Langitnon kon diin ako, kon ano ang akon posisyon upod sa iban sa akon pilot training class, ukon ano ang akon calling sa Simbahan. Ang importante sa Iya amo nga ginahimo ko ang labing maayo sa akon masarangan, nga ang akon tagipusuon nagapalapit sa Iya, kag nga sugot ako nga magbulig sinang yara sa palibot ko. Nakahibalo ako nga kon himuon ko ang labing maayo sa akon masarangan, ang tanan-tanan mangin maayo lang.

Kag ang tanan-tanan nangin maayo lang.¹⁵

Ang Katapusan Mangin Una

Wala pakialam ang Ginuo kon ginahinguyang naton ang aton mga oras sa pag-obra sa marmol nga mga edipisyo ukon mga kwadra sang kabayo. Nakahibalo Sia kon diin kita bisan ano pa kakubos sang aton mga sirkumstansya. Gamiton Niya—sa Iya kaugalingon nga paagi kag para sa Iya balaan nga mga katuyuan—inang nagapalapit sang ila mga tagipusuon sa Iya.

Nakahibalo ang Dios nga pila sang dalagko nga mga kalag nga nagkabuhi amo yadtong indi makita sa mga rekord sang maragtas. Ini sila balaan, mapainubuson nga mga kalag nga nagasunod sang ehemplo sang Manluluwas kag nagahinguyang sang ila kabuhi sa paghimo sang maayo.¹⁶

Isa ka subong nga mag-asawa, nga mga ginikanan sang akon abyan, ang nagapakita sining prinsipyo para sa akon. Ang bana nagtrabaho sa isa ka paktorya sang salsalon sa Utah. Magtigpalanyaga, iya ginapagwa ang iya balaan nga mga kasulatan ukon isa ka magasin sang Simbahan kag magbasa. Sang makita ini sang iban nga trabahador, ginsuyaan nila sia kag ginkuwestyon ang iya mga pagpati. Sa kada bes nga ginahimo nila ini sa iya, nagahambal sia sa ila nga may kaayo kag pagsalig. Wala niya gintugutan ang ila pagkawala’y respeto nga magpaakig sa iya.

Pila ka tuig ang nagligad isa sang mahilig kaayo manuya nagbalatianon. Antes sia mapatay, nagpangabay sia nga ining mapainubuson nga lalaki maghambal sa iya lubong—kag ginhimo niya ini.

Ining matutom nga miyembro sang Simbahan wala gid man sang posisyon sa sosyedad ukon manggad, apang ang iya impluwensya nagdab-ot gid sa tanan nga nakakilala sa iya. Napatay sia sa isa ka aksidente sa ulobrahan samtang nagpundo agud buligan ang isa ka trabahador nga indi makahalin sa isnow.

Sa sulod sang isa ka tuig ang iya balo ginkinahanglan nga mapaidalom sa operasyon sa utok nga nangin kabangdanan sang iya pagkalupog. Apang ang mga tawo nanamian magkadto kag maghinguyang sang ila tion upod sa iya bangod nagapamati sia. Makadumdom sia. Nagapalangga sia. Bangod indi sia makasulat, ginasaulo niya ang mga numero sang telepono sang iya kabataan kag mga apo. Mapinalanggaon niya nga ginadumdom ang mga kaadlawan kag mga anibersaryo.

Ang mga nagabisita sa iya nagapauli nga mas nalipay parte sa kabuhi kag parte sa ila mga kaugalingon. Mabatyagan nila ang iya pagpalangga. Nakahibalo sila nga nagaulikid sia. Wala gid sia nagareklamo kundi nagahinguyang sang iya kabuhi sa pagpakamaayo sang kabuhi sang iban. Isa sang iya mga abyan nagsiling nga ining babayi isa sang pila lamang ka tawo nga iya nakilal-an nga matuod nga nagapakita sang pagpalangga kag kabuhi ni Jesucristo.

Ining mag-asawa amo kuntani ang una nga nakahambal nga indi sila importante gid sa sining kalibutan. Apang ang Ginuo nagagamit sang timbangan nga tuhay kaayo sa iya sang kalibutan sa pagtimbang sang bili sang isa ka kalag. Kilala niya ining matutom nga mag-asawa; palangga Niya sila. Ang ila mga buhat buhi nga saksi sang ila mabaskog nga pagtuo sa Iya.

Importante Ka sa Iya

Pinalangga kong mga kauturan, ayhan matuod nga ang tawo wala-wala ikomparar sa kahalangdon sang uniberso. Sa panalagsa mahimo kita makabatyag nga daw di-importante, bale-wala, nagaisahanon, ukon nalipatan. Apang dumduma pirme—importante ka sa Iya! Kon nagaduda ka sina, binagbinaga ining apat ka diosnon nga mga prinsipyo:

Una, palangga sang Dios ang mapainubuson, bangod sila ang “labing dako sa ginharian sang langit.”¹⁷

Ikaduha, ang Ginuo nagatugyan “sang kabug-usan sang [Iya] ebanghelyo [nga] maproklamar sang maluya kag sang simple sa mga dulonan sang kalibutan.”¹⁸ Iya ginpili “ang maluya sa kalibutan [sa] pagpakahuya sang makusog”¹⁹ kag sa pagpakahuya “sang makusog.”²⁰

Ikatatlo, bisan sa diin man kamo nagapuyo, ano man kakubos sang inyo mga sirkumstansya, ano man kagamay sang inyo suweldo, ano man kalimitado sang inyo mga abilidad, ano man kaordinaryo sang inyo dagway, ukon ano man kagamay sang inyo calling sa Simbahan para sa inyo, wala kamo ginabale-wala sang inyo Amay nga Langitnon. Palangga Niya kamo. Nakahibalo sia sang inyo mapainubuson nga tagipusuon kag sang inyo mga buhat sang gugma kag kaayo. Alangay ini makahimo sang wala’y katapusan nga panaksihon parte sa inyo katampad kag pagtuo.

Ikaapat kag pinakakatapusan, palihog intiendiha nga ang inyo makita kag maeksperiyensya sa karon indi mangin wala’y katapusan. Indi kamo makabatyag sang pagkaisahanon, kasubo, kasakit, ukon pagkatalaw sang buot sing wala’y katapusan. May yara kita sang matuod-tuod nga promisa sang Dios nga indi Niya pagkalipatan ukon pagsikwayon inang nagapalapit sang ila mga tagipusuon sa Iya.²¹ Mag-angkon sang paglaum kag pagtuo sa sina nga promisa. Tun-i nga palanggaon ang inyo Amay nga Langitnon kag mangin Iya disipulo sa pulong kag buhat.

Magsalig nga kon kamo magpadayon, magpati sa Iya, kag magpabilin nga matutom sa pagtuman sang mga kasuguan, pila ka adlaw inyo maeksperiyensyahan sa inyo mga kaugalingon ang mga promisa nga ginpahayag sa Apostoles nga si Pablo: “Ang wala makit-i sang mata, kag wala mabatii sang idulungog, ukon wala mapaino-ino sa hunahuna sang tawo, ini gin-aman sang Dios sa nagahigugma sa iya.”²²

Mga kauturan, ang labing gamhanan nga Tinuga sa uniberso amo ang Amay sang inyo espiritu. Kilala Niya kamo. Palangga Niya kamo sing may himpit nga pagpalangga.

Ginakabig kamo sang Dios indi lamang bilang isa ka mortal nga tinuga sa isa ka gamay nga planeta nga nagakabuhi sa malip-ot nga tion—Ginakabig Niya kamo nga bilang Iya anak. Ginakabig Niya kamo bilang ang tinuga nga sarang kag gintuyo nga mangin. Luyag Niya nga mabal-an ninyo nga importante kamo sa Iya.

Kabay nga magpati kita, magsalig, kag magtadlong sang aton kabuhi agud nga aton mahangpan ang aton matuod-tuod nga wala’y katapusan nga bili kag potensyal. Kabay nga mangin takos kita sa importante nga mga bugay nga ginatigana sang aton Amay nga Langitnon para sa aton amo ang akon pangamuyo sa ngalan sang Iya Anak, nga si Jesucristo, amen.

© 2011 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/10. Petsa sang pagtugot sa paglubad: 6/10. Paglubad sang Visiting Teaching Message, November 2011. Hiligaynon. 09771 861