Napategkayo Kenkuana
Agusar ti Apo iti pagtimbangan a naidumduma unay iti pagtimbangan ti lubong tapno timbangenna ti pateg ti maysa a karuarua.
Ni Moises, maysa kadagiti kaindaklanan a propeta a naam-ammo iti lubong, ket pinadakkel ti babai nga anak ni Faraon ken nangbubos kadagiti umuna a 40 a tawen ti biagna iti naarian a palasio ti Egipto. Ammonan idi damo ti dayag ken kinangayed dayta nagkauna a pagarian.
Kalpasan dagiti tawen, iti tuktok ti adayo a bantay, adayo nga amang manipud iti kinangayed ken kinadayag ti nabileg nga Egipto, nagtakder ni Moises iti imatang ti Dios ket nakisao Kenkuana iti rupanrupa a kas iti pannakisao ti maysa a tao iti gayyemna.1 Kabayatan dayta nga isasarungkar, impakita ti Dios ken ni Moises ti aramid dagiti imana, a nangpalubos kenkuana a mangimatang iti aramid ken gloriana. Idi malpas ti parmata, nadalupo ni Moises iti daga iti las-ud ti adu nga oras. Idi nagsubli ti pigsana iti kamaudianan, naamirisna nga adda maysa a banag, iti amin a panawenna iti palasio ni Faraon, a saanna iti kaano man napanunot idi.
“Naammuak,” kinunana, “nga awan ti kaipasangan ti tao.”2
Nababbaba ti Pategtayo Ngem iti Panagkunatayo
No ad-adu ti masursurotayo maipapan iti lubong, ad-adda a maawatantayo—uray no sangkabassit laeng—iti naammuan ni Moises. Kasta unay ti kadakkel, kinadatdatlag, ken kinadayag ti lubong isu a saan a matukod ti panunot ti tao. “Saan a mabilang dagiti lubong ti pinarsuak,” kinuna ti Dios ken ni Moises.3 Dagiti nakaskasdaaw a makita iti tangatang iti rabii ket napintas a pammaneknek maipapan iti dayta a kinapudno.
Adda dagiti banag a namagsiddaaw unay kaniak kabayatan ti panagpatayab iti tangatang iti kasipngetan ti rabii nga agdaliasat kadagiti batog ti taaw ken kontinente ken panagbuyak iti ruar ti tawa iti batogko iti di mabilang a minilmilion a bituen iti tangatang.
Inkarigatan a bilangen dagiti astronomer dagiti bituen iti lubong. Pinattapatta ti maysa a grupo dagiti sientista a ti bilang dagiti bituen babaen kadagiti teleskoptayo ket maminsangapulo a kaadu iti amin a binukel ti darat kadagiti igid ti baybay ken disierto iti intero a lubong.4
Maipada unay daytoy a konklusion iti pakdaar ti nagkauna a propeta a ni Enoc: “Mabalin kadi a bilangen ti tao dagiti tinukel ti daga, wen, linaklaksa ti daga a kas iti daytoy, saan nga isu ti punganay ti bilang dagiti parsuam.”5
No panunotentayo ti kadakkel ken kalawa dagiti pinarsua ti Dios, saan a pagsiddaawan no apay a binalakadan ti naindaklan nga Ari Benjamin dagiti taona a “kanayon a laglagipenyo ti kinaindaklan ti Dios, ken ti kinanumoyo.”6
Napatpategtayo Ngem iti Panagkunatayo
Ngem uray no awan ti pateg ti tao, masmasdaawak a mangpampanunot a “napateg dagiti kararua iti imatang ti Dios.”7
Ket kabayatan ti panangmatmattayo iti kinalawa ti lubong ket kunatayo, “Ania ti pateg ti tao no idilig iti dayag ti panagparsua?” Kinuna ti Dios Mismo a datayo ti gapu ti panangparsuana iti lubong? Ti aramid ken gloriana—ti panggep para iti daytoy nangayed a lubong—ket tapno isalakan ken itan-ok ti sangkataw-an.8 Iti sabali a pannao, ti kinalawa ti kinaagnanayon, dagiti gloria ken misterio ti awan patinggana a lugar ken panawen ket nabangon amin para iti pagimbagan dagiti gagangay a mortal a kas kadatayo. Pinarsua ti Nailangitan nga Amatayo ti lubong tapno maragpattayo ti potensialtayo kas annakna a lallaki ken babbai.
Daytoy ti paradox ti tao: no maidilig iti Dios, awan ti pateg ti tao; ngem datayo ti kapatgan iti Dios. No maidiligtayo iti awan patinggana a panagparsua, maipadatayo iti awan pategna, maaddaantayo iti bassit a raniag ti agnanayon nga apoy a sumsumged iti kaunggantayo. Addaantayo iti di kabaelan a maawatan ti pannakaitan-ok—dagiti lubong nga awan patinggana—a magaw-attayo. Ken daytoy ti dakkel a tarigagay ti Dios a tulongannatayo a mangdanon iti daytoy.
Ti Kinamaag ti Kinatangig
Ammo ti nasikap a managallilaw a maysa kadagiti kasamayan a wagasna tapno mangyaw-awan dagiti annak ti Dios ket ti panangusar iti pagkapsutan ti tao. Kadagiti dadduma, usarenna dagiti natangig nga ugalida, gargarien ken al-allukoyennna ida nga agpannakkel ken mamati nga isuda laeng ti napateg ken nalaing. Ibagana kadakuada a saanda a gagangay a tao ken gapu iti kabaelanda, naarian a nagtaudan, wenno kasasaadda iti kagimongan, nalalaingda ngem kadagiti tao nga adda iti aglawlawda. Pinamatina ida a saanda ngarud a sakup dagiti annuroten ti asino man ken nasken a saanda a masinga kadagiti parikut ti asino man a tao.
Nakuna a nagustuan ni Abraham Lincoln ti maysa a daniw a mabasa:
O apay a nasken nga agpannakkel ti tao?
Kas iti umaw-awan a bullalayaw, iti napardas a panagawan ti ulep,
Kas iti dakkel a dalluyon, alisto a gurruod,
Pumusay ti tao nga agpatingga iti tanem.9
Maawatan dagiti disipulo ni Jesucristo a no maidilig iti kinaagnanayon, ti mortal a panagbiagtayo ket “ababa a kanito” laeng iti lugar ken panawen.10 Ammoda a ti pudno a pateg ti tao ket saan unay nga ik-ikkan-pateg ti lubong. Ammoda a mabalinyo a magun-od ti kinabaknang ti intero a lubong ngem daytoy ket saan a mabalin a mangbayad kadagiti parabur nga ited ti Dios.
Dagitinto “agtawid iti pagarian ti Dios”11 ket isu dagiti agbalin a “kasla ubing, natulnog, nadayaw, napakumbaba, naanus, napnuan ayat.”12 “Siasino man nga agpasindayaw maipababanto; ket ti agpakumbaba maitan-okto.”13 Maawatan pay dagiti disipulo “a no agserserbikayo iti padayo a tao, agserserbikayo laeng iti Diosyo.”14
Saantayo a Nalipatan
Sabali pay a wagas a pangallilaw ni Satanas ket babaen iti panangpakapsut iti pakinakem. Allukoyennatayo a mangipamaysa iti pasnektayo iti kinaawan pategtayo agingga a mangrugitayon nga agduadua iti kinapategtayo. Ibagana kadatayo a bassittayo unay tapno madlaw dagiti dadduma, a datayo ket nalipatanen—nangnangruna ti Dios.
Bay-andak a mangisalaysay kadakayo ti maysa a personal a padas a mabalin a makatulong kadagiti makarikna nga awan pategda, nalipatanen, wenno agmaymaysa.
Adun a tawen ti naglabas dimmar-ayak iti panagsanay dagiti piloto iti United States Air Force. Adayoak iti pagtaenganmi, maysaak nga agtutubo a soldado a taga-West Germany, nayanakak iti Czechoslovakia, a dimmakel iti East Germany ket marigatanak unay nga agsao iti Ingles. Silalawag a malagipko pay laeng ti panagbaniagak a mapan iti training basemi iti Texas. Nakaluganak iti eroplano, a katugawko ti maysa a pasahero a nalaing nga agsarita iti pagsasao dagiti taga-Abagatan. Dumani awan ti maawatak a balikas nga insaona. Napanunotko pay nga amangan ta saan a husto ti pagsasao a naisuro kaniak. Nagdanagak iti napanunotko a nasken a makibalubalak para iti tartarigagayan unay a nangato a posision iti training dagiti piloto kadagiti estudiante nga Ingles ti pagsasaoda.
Idi makasangpetak iti air base iti bassit nga ili ti Big Spring, Texas, sinapulko ket nasarakak ti sanga ti Simbaan a Santo iti Ud-udina nga aldaw, a buklen dagiti nasisingpet a miembro nga agtataripnong kadagiti maupaan a siled iti mismo nga air base. Dagiti miembro ket madama pay laeng idi nga agipatpatakder iti maysa a bassit a meetinghouse nga agpaay a permanente a lugar para iti Simbaan. Kadagita a panawen dagiti miembro ket dumani bubosenda ti amin a panawenda iti panagaramidda kadagiti baro a pasdek.
Inaldaw a dimmar-ayak iti training dagiti piloto ken nagadalak a nasayaat agingga iti kabaelak ket binubosko ti kaaduan a nawaya nga orasko iti panagtrabaho iti baro a meetinghouse. Idiay a naammuak a ti two-by-four ket saan a maysa a sala[dance step] no di ketdi maysa a pedaso ti kayo. Naammuak pay no kasano ti agannad tapno saan a matamaan ti tamudok no agipukpokak iti lansa.
Adu nga oras ti binubosko a panagtrabaho iti meetinghouse isu a ti branch president—nga isu ti maysa kadagiti flight instructormi—ket naseknan kaniak a kinunana a nasken a bubosek ti ad-adu pay nga oras iti panagadalko.
Addaan met dagiti gagayyemko ken padak nga estudiante a piloto iti nawaya nga oras para kadagiti aktibidad, nupay makunak a sumagmamano kadagiti aktibidad ti saan a mayannurot iti agdama a polieto a Para iti Pigsa dagiti Agtutubo. Para kaniak, naragsakak iti panagbalinko nga aktibo a paset daytoy bassit a sanga ti Texas iti laud, nga us-usarek ti nasursurok a baro a paglaingan iti panagkarpintero, ken panangpasayaatko iti panagsaritak iti Ingles kabayatan ti panangipatungpalko kadagiti pagrebbengak a mangisuro iti korum dagiti elder ken iti Sunday School.
Idi, ti Big Spring, iti baet ti nagan daytoy, ket maysa a bassit, awan pategna, ken saan nga ammo a lugar. Ket masansan a nariknak ti kasta met laeng maipapan iti bagik—awan pategna, di am-ammo, ken kasla agmaymaysa. Uray no kastoy, iti kaano man diak pinanunot a nalipatannakon ti Dios wenno masarakannak man idiay. Ammok a saan a napateg iti Nailangitan nga Ama no sadino ti ayanko, no ania ti ranggok iti klase iti training dagiti piloto, wenno no ania ti pagrebbengak iti Simbaan. Ti napateg Kenkuana ket ti panagaramidko iti amin a kabaelak, nga ipatpategko Isuna, ken natallugodak a tumulong kadagiti tao iti aglawlawko. Ammok a no aramidek ti amin a kabaelak, agbalin a nasayaat ti amin.
Ket nasayaat ti amin.15
Ti Maudi ti Umunanto
Saan a napateg iti Apo no bubosentayo dagiti aldawtayo nga agtartrabaho kadagiti pasdek a naaramid iti marmol wenno kayo. Ammona no sadino ti ayantayo, uray no kasano ti kanumo dagiti kasasaadtayo. Usarennanto—iti bukodna a wagas ken para kadagiti nasantuan a panggepna—dagitay tattao a mangipatpateg Kenkuana.
Ammo ti Apo a ti sumagmamano a kasayaatan a tattao a nagbiagen iti daytoy a daga ket isu dagiti saan a masarakan kadagiti kasuratan ti pakasaritaan. Isuda dagiti nagasat, napakumbaba a tattao a sumursurot iti pagwadan ti Mangisalakan ken nagbubos kadagiti aldaw ti panagbiagda nga agar-aramid iti kinaimbag.16
Maysa nga agassawa, nagannak ti gayyemko, ti nagbalin a nasayaat a pagwadan iti daytoy a pagbatayan. Nagtrabaho ti asawa a lalaki iti pagaramidan iti landok iti Utah. Kabayatan ti pangngaldaw alaenna no kua dagiti nasantuan a kasuratanna wenno ti magasin ti Simbaan ket basaenna. Idi makita dagiti sumagmamano a trabahador daytoy, kinatawaanda isuna ket sinubokda ti pammatina. Iti kanito nga aramidenda daytoy, kasaritana ida nga addaan iti kinaimbag ken panagtalek. Saan a nakagura wenno nagdanag isuna gapu iti kinaawan respetoda kenkuana.
Kalpasan dagiti tawen maysa kadagiti managdillaw unay ti nagsakit iti nakaro. Sakbay a pimmusay, kiniddawna nga agsarita daytoy managpakumbaba a lalaki iti pumponna—nga inaramidna met.
Daytoy napudno a miembro ti Simbaan ket saan a nabaknang wenno nalatak iti kagimongan, ngem naan-anay a naimpluwensiaanna ti amin a makaam-ammo kenkuana. Natay iti aksidente idi agsardeng tapno tulonganna ti maysa a katrabahuan a saan a makapagna iti niebe.
Iti uneg ti makatawen kinasapulan a maoperar iti utak ti asawana, a gapu ti saanna a pannakapagna. Ngem magustuan dagiti tao ti mapan kenkuana gapu ta dengdenggenna ida. Mananglagip isuna. Manangisakit isuna. Gapu ta saan a makasurat, inyulona dagiti numero ti telepono dagiti annakna ken appokona. Siaayat a lagipenna dagiti petsa ti panagkasangay ken anibersario.
Dagiti sumarsarungkar kenkuana ket pumanawda a nasaysayaat ti riknada maipapan iti biag ken iti bagbagida. Mariknada ti ayatna. Ammoda a manangisakit isuna. Saan a pulos nagdayengdeng ngem binubosna ti panawenna iti panangtulong kadagiti dadduma pay. Kinuna ti maysa kadagiti gagayyemna a daytoy a babai ti maysa kadagiti manmano a tattao nga am-ammona a pudno a pagwadan ti ayat ken biag ni Jesucristo.
Mabalin koma dagitoy nga agassawa ti umuna a mangibaga a saanda unay a napateg iti daytoy a lubong. Ngem agusar ti Apo iti pagtimbangan a naidumduma unay iti pagtimbangan ti lubong tapno timbangenna ti pateg ti maysa a kararua. Am-ammona dagitoy napudno nga agassawa; ay-ayatenna ida. Dagiti tignayda ti sibibiag a pammaneknek ti napigsa a pammatida Kenkuana.
Napategkayo Kenkuana
Kakabsatko, mabalin a pudno nga awan pateg ti tao no idilig iti kinadakkel ti lubong. No dadduma mabalin a mariknatayo ti kinaawan pateg, saan a panangikankano, panagmaymaysa, wenno nalipatanen. Ngem laglagipenyo a kanayon—napategkayo Kenkuana! No agduaduakayo iti dayta, ibilangyo dagitoy uppat a nadiosan a pagbatayan:
Umuna, ay-ayaten ti Dios dagiti napakumbaba ken naemma, gapu ta isuda ti “kadakkelan idiay pagarian ti langit.”17
Maikadua, italek ti Apo “nga ipakdaar dagiti nakapuy ken nanumo ti pakabuklan ti ebanghelio[na] agingga kadagiti suli ti lubong.”18 Pinilina dagiti “nakapsut a banag ti lubong [tapno] parmekenda dagiti maingel ken napigsa”19 ken ibabain dagiti “banag a napigsa.”20
Maikatlo, sadino man ti pagnaedam, nanumo man dagiti kasasaadmo, nababa man ti pagtrabahuam, limitado man dagiti kabaelam, simple man ti langam, ken saan man a nangato ti posisionmo iti Simbaan nga ipagarupmo, saannaka a malipatan ti Nailangitan nga Amam. Ay-ayatennakayo. Ammona ti managpakumbaba a pusoyo ken dagiti managayat ken manangngaasi a tignayyo. Sangkamaysa a buklen dagitoy ti manayon a pammaneknek maipapan iti napudno a panagtulnogyo ken pammatiyo.
Maikapat ken maudi, maawatanyo koma a no ania ti makita ken mapadasanyo ita ket awan iti kinaagnanayon. Saanyonto a marikna ti kinaliday, ladingit, saem, wenno pannakaupay iti agnanayon. Adda kadatayo ti napudno a kari ti Dios a saannanto pulos a lipaten wenno baybay-an dagitay mangipatpateg Kenkuana.21 Mangnamnama ken agtalekkayo iti dayta a kari. Sursuruenyo nga ayaten ti Nailangitan nga Amayo ket agbalinkayo a disipulona iti sao ken iti aramid.
Manamnamayo a no agibturkayo laeng, mamati Kenkuana, ket agtalinaed a napudno iti panagtungpal kadagiti bilin, mapadasanyonto mismo iti maysa nga aldaw dagiti kari nga impalgak ni Apostol Pablo: “Saan a nakita ti mata, ket saan a nangngeg ti lapayag, ket saan a simrek iti puso ti tao, dagiti bambanag nga insagana ti Dios kadagiti agayat kenkuana.”22
Kakabsatko, ti kabilgan a Kinatao iti lubong ket isu ti Ama ti espirituyo. Am-ammonakayo. Ay-ayatennakayo iti awan pagkuranganna nga ayatna.
Ibilangnakayo ti Dios saan laeng a kas mortal a tao iti bassit a planeta nga agbibiag iti ababa a panawen—ibilangnakayo a kas anakna. Ibilangnakayo kas ti parsua a kabaelanyo ken naisangrat kadakayo a pagbalinan. Kayatna a maammuanyo a napategkayo Kenkuana.
Mamatitayo koma, agtalektayo, ken pasayaatentayo ti biagtayo tapno maawatantayonto ti pudno nga agnanayon a pateg ken potensialtayo. Maikaritayo koma kadagiti napapateg a parabur ti Nailangitan nga Amatayo nga inlatangna para kadatayo. Daytoy ti kararagko iti nagan ti Anakna, a kas ken ni Jesucristo, amen.
© 2011 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/10. Pannakaanamongna a maipatarus: 6/10. Pannakaipatarus ti Visiting Teaching Message, November 2011. Ilokano. 09771 864