Ng Klou a Belkum er Ngii
A Rubak ousbech er a ngodech el olbedabel er a beluulechad el melebodeb er a ultutelel a chad.
A Moses, el tara ngarbab el profet lodengelii a beluulechad, a mlukeroul er a ngelekel a Pharaoh el redil a chiloit a okeual rak ra klengar er ngii el kiei ra ngarbab el blai ra Egypt. Ng kmal mededengelii a klebkellel ma klungiolel tial chuodel renged.
Betok el rak ruriul, ra bebul a cheroid el rois, el cheroid er tial klungiaol ma klebebekel a mesisiich el Egypt, ea Moses a dilchor ra medal a Dios e milngedecheduch er ngii re medal el di ua chad sel longedecheduk ra sechelil.1 Ngulekiu tial odingel, ea Dios a ulecholt ra Moses a rokui el lomeob ra imal, ulechotii rengii meng milsang a Urelel ma klebkellel. Ma bochal merek tial ues ra ngarmadad, ea Moses a mle kesbedechakl ra chutem el mlo ngara betok el sikang. A bocha lemesisiich eng mocha medengei el kmo, aikel rokui el rak er ngii ra lengara blil a Pharaoh, eng diarkak a tang mel dubech a uaisei el tekoi.
“Ak medengei,” ng millekoi, “a chad a diak el ngerang.”2
Ke de Ngariou er a Ikel Domdasou
Sel bo dodengei a betok el kirel a beluulechad ma eanged, eng mengai el mo klou a klemedengei er kid—ng locha di telkib—ra ikel ble lodengei a Moses. A beluulechad ma eanged a kmal klou, e ngodech, e klebokel e meringel bo dodengelii. A Dios a dilu ra Moses el kmo ng diak el mochur el Beluulechad a blak beob.3 A klebekelel a eanged ra le klebesei a olechotel tial klemerang.
Ngarngii a mekesai el tekoi el mla chosir a renguk el uaia sel ksebek ra milkolk a le klebesei loleong a daob ma beluu lomes er rikl ra diak a ulebengelel el klebokel el milion el bduch.
A re astonomer a mla melasem el omechur a bduch er a eanged. A tara chelechad ra re scientist a mla mellangech a bduch el ikel sebeched el mes lousbech a telescop el kmeed el ngara teruich el taem el betok ra rokui el chelechol ma desert el ngara beluulechad.4
Tial bla lochotii a kmeed el osisiu ngii ma tekingel a profet ra rechuodel el Enoch: Ng dilu el kmo alsekum meng mlo sebechel a chad el mechur a klekedellel a beluulechad, oi, ng milion el beluulechad el uaia tiang, eng dirrek el diak el uchelel a iidisel a blebelel a Dios.5
Me ngokiu a kmal klou el blebelel a Dios, ea King Benjamin a ulsisechakl er a rechedal el mo “blechoel el dobedebekii a klou el klisiichel a Dios, me kemiu el diak kom ngerang.”6
Kede Ngarbab ra Uldesued el Kired
Maltang ea chad a locha diak el ngerang, engdi ng mechas a renguk e chemat el omdasou el kmo a ultutelel a delbenged a ngarbab ra medal a Dios.7
Me sel domes er tial klou lomerk el beluulechad ma eanged e melekoi el kmo, “Ngerang a chad a domkesiu er ngii er a klebkellel a omeob?” Ngii el Dios a dilu el kmo kid a uchul meng Ng ulmeob er a beluulechad ma eanged! Ng urerel e klebkellel—a moktel er tial klebokel el beluulechad—a mo olsobel ra rechad.8 Malechub, tial klou el basio el diak a ulebengelel, ma klebkellel tial diak a ulebengelel el basio ma taem a rokui el mlo kdubech el kirir a rechad el kau me ngak. A Demad ra Babeluades a milebii a beluulechad me bol sebeched el mora ikel kot er bab el sebeched el ngelekel el sechal ma redil.
A denguu ra chad eng ngodech: e le dongaisisiu ra Dios, ea chad a diak el ngerang; eng di kid a rokui el klou a ultuteled el mora Dios. Mesel dengar medal a diak a ulebengelel el bleob e kede mocholt el diak de ngerang, ngarngii a telkib ra diak a ulebengelel klengar el ngar kid. Ke de urrekodel ra yaksok ra mo suobel—beluulechad el diak el ngemed—el sebeched el nguu. El ngii a kot el soal a Dios el ngosukid el mo nguu.
Kngtil a Ngarbab el Reng
Ng kel meduch el mengeuid a medengei el kmo sel kot el bedochel dongu er ngii a omekrael ra rengelekel a Dios el mo cheroid lokiu a mondelengir a rechad. Mora rebebil, eng ngolengibes ra klengarbab el reng, e melad er tir e oldubech er tir el mo oumerang a telingaol el kmo tir a klou a belkrir e mesisiich. Ng melekoi er tir el kmo te mla mo ngarbab el chad ele duch er tir a uchul, tir oungerachel a kebliil, deruchellir ra buai, e mla moterkokl el diak loltirakl a teletael el iliuekl er tir. Meng omekrael er tir el mo diak el loltirakl ra llechul a ngii dil chad ma diak longesang er tir er a mondai ra rebebil.
A Abraham Lincolm a lullekoi er ngii el kmo ng kmal soal tial llechulk el kmo:
Ngera uchul ma reng ra chad a ngar bab?
El di uaia mereched-el suebek el bduch, bekerurt-el suebek el iabed,
Dichel a bisebusech, ma iull ra daob,
Chad el merael er tial klengar el mora ulengull ra debull.9
A rultirakl er a Jesus Kristo mle medengei el kmo do ngaisisiu er a diak a ulebengelel, el mera klengar ra beluulechad ea klengar rekid er tial beluulechas a di kedeb el taem er tial basio ma temel.10 Te medengei el kmo a meral ultutelel a chad a diak el kangkester ra ikel beluulechad omes el meklou a ultutelel. Te medengei el kmo ke locha sebechem el chemudel a udoud er tial rokir el beluulechad engdi ng diak el sebechel el mecherar a chimol blauang er a babeluades.
Tirkel mo “nguu a rengedel a Dios”11 a tirkel di mo “ua ngalek, lolngesenges, ngariou a rengul, e medemedemek, klou a rengul, mui ra beltik el reng.”12 “Ea ngii dil chad el dingii el lobang el morbab a mo mengai el meriou; eng kel nguu a rengul el meriou a monguu sel kot el ngarbab.”13 A rultirakl e medengei el dirrek “el kmo sel om ngara omesiou er a rebebil e kau a ngara omesiou er a Dios.”14
Ng Diak El Bla Lobes Er Kid
A tara rael ea Diablong a mengeuid a okiu a mesaul a rengul. Ng melasem el rulid mekerdi omes er a ikel diak el sebeched ma lluut e kede mla mo ngarngii ra uldesued el kmo ngdiak a belkud. Ng melekoi er kid el kmo kid a kmal mekekerei, meng ngdiak a chad el mesekid, e kid a blal obes er kid—tokuni a Dios.
Me kuuchais er kemiu a tara blekeradel ngak a mlorngii el locha sebechel ngosuterir tirkel melchesuar er tir el diak a ultutelir, diak a melatk er tir, e sabisi.
Betok el rak ra mla memong eak mle ngara omesuub lomekall a skoki ra United States Air Force. Ak mle cheroid ra blik, e mle kekerei el soldau ra West Germany, e milechell ra Czechoslovakia, e mlukeroul er a East Germany e millekoi a tekoi ra meringel engdi mle meringel er ngak. Ak mal ungil medengelii a omerolam el mora basio ra omesuub el ngara Texas. Ak mlara skoki, e dilengchokl er a bitara chad el milngedecheduch el kmal ua chad ra South. Ng meral dimlak kudengei a tekoi el lolekoi. Ak mlo omdasou el kmo aikal kulsuub a locha ngodech el tekoi. Ak meral mle medakt sel kumdasou el kmo a kmo mengaidesachel el mor sel kot el ngarbab el dauch el obengterir a rengalk ra skuul el tekingir a tekoi ra Ngebard.
Ser ak bora olkerodel ra skoki ra kekerei el bleuu ra Big Spring, Texas, eak kulsiik e metik ra branch ra Uriul-klebesei el Santo, el mlarngii a mekesai e kmal ungil chad ra ikelesia el mle kldibel ra loleng el delmerab el mlar tial le ngarngii olkerodel ra skoki. Tirkal chad ra ikelesia a mlo omuchel el omekedechor ra kekerei el ikelesia el bo lousbech er ngii el meketeket el Ikelesia er tir. Seikid el taem ea rechad ra ikelesia a mle oumesingd er tir a uluureor el omekedechor aikal beches el Ikelesia.
Bek el sils eak mlora omesuub lomekall a skoki e milsuub el kmal mle blak a renguk e dirrek el chiloit a betok el temek el oureor er tial beches el mo ikelesia. E mlar tiang eak silubii el kmo a erung ma euang a diak el ochil a ngloik ng tebedechel a kerekar. Ak dirrek el mlo meduch el meleel a deel el diak tetii a bechos er a chimak.
Ak meral chiloit a betok el taem el oureor er tial ikelesia ma branch president—el dirrek el mle sensei ra mo omekall a skoki—a mlo bekikl meng milelekoi el kmo ng bai locha kirek el chemoit a betok el temek el mesuub.
A resechelik ma rebebil ra kimdak el mesuub e kuk mlarngii a loruul ra ikel diak el mechesang er ngii el taem, meng locha sebeched el kmo aikel luruul a diak el oltirakl ra babier ra Kirel a Klisichir a Rengeasek. Ea kuk denguu er ngak e ak kmal mle ungil a renguk el tebedechel tial kekerei el branch ra Texas, e melasem el ousbech aikal blak suub ra kldaiksang, e melasem el mo ungil ra tekoi ra Merikel lokiu okedong er ngak ra Ikelesia el olsisechakl ra chelechad ra remeklou el sechal ma Sandei Skuul.
Sel taem, ea Big Spring, meng uaisei a ngklel, a mle kekerei, diak el klou a belkul, ma diak a remedengelii. Sel bebil ea kmo melchesuar er ngak el uaisei—kal klou a belkuk, diak a remedengelekak, e mle sabisi. Meng uaisei, eng di dimlak a tang mebol rrau a renguk el kmo a Rubak kelel bla lobes er ngak malechub eng locha sebechel metik er ngak er tiang. Ak mle medengei el kmo ng dimlak a belkul ra Edam ra Babeluades a lodengei el kmo kngar ker, ak kirel ker ra omesubek ra klass ra omekall a skoki, malechub e ngeral okedong ak ngarngii ra Ikelesia. Aikel ngarngii a ultutelel er Ngii a kmo ak meruul aikel kot el tkul rebab el sebechek, ea renguk a ulbengkel, e dirrek el mle blak a renguk el olngeseu ra rengarbitar ngak. Ak mle medengei el kmo alsekum ak meruul el mor sel tkul rebab el sebechek, a rokui a di mo ungil besul.
Ma rokui a mle ungil.15
A Ngaruriul A Mo Kot
A Rubak a diak a belkul rengii a doureor ra blil a ungil bad malechub eng blil a charm. Maltang kmal diak a ngera er kid, eng di Ngii a medengei el kmo kede ngar ker. Ng mo ousbech—el ngar sel rolel ma chedaol moktek—tirkel tir a ngmai a rengrir el morngii.
A Dios a medengei el kmo a re kot el ngarbab a delbengir el mle ngar tirkel diak el mocholt ra llecheklel a reksi. Te mla mukngeltengat, ngariou a rengrir el oltirakl ra omerellel Osobel e chemoit a klengar er tir el meruul a ungil.16
A tar tirkal obekel, a delal ma demal a sechelik, el ulechotii tial osisechalk el mer ngak. Ngikal sechal a uluureor ra omeruul deel ra Utah. Sel temel a sueleb eng ngotebedii a chedaol llechukl malechub eng babier ra Ikelesia e menguiu. Tirkal bebil ra oureor lobengkel a ulemekakou er ngii e millasem ra loumerang er ngii. Sel tal uaisei, e ngii a milngedecheduch er tir loba delmedemek el reng ma kllou el reng. Ng dimlak el becherei a mekngit lomerellir mel relii el mo kesib ma lechub eng mekngit a rengul.
Bebil rak ra uriul ea imong er tirkal kmal mle blak a rengul omekakou a mlo imis el smecher. A uchei ra lemad eng ullengit er ngikal ngariou a rengul chad mel bo longedecheduch ra kemeldilel—me ng mlong.
Ng kal mesisiich a klaumerang er ngii el chad ra Ikelesia a dimlak el ngara belsachel ra buai malechub eng ilteet, engdi luruul a mle okesiu el mor tirkel mle medengelii. Ng mlad ra ureror ral terob a loruul el mo olngeseu ra ledak loureor el cheloit ra snow.
Chelsel a tal rak ea bechil a mlo ra botk ra no er a bdelul, ng mlo diak el sebechel merael ra bol merek ra botk. Ng di rechad a sorir el me omes er ngii eleng mle ungil lorrenges. Ng bekelatk. Ng omekerreu. Ng dimlak loluches, ngdi ng mlo medengei a lambang ra dengua ra rengelekel ma rengelekel a rengelekel. Ng dirk medengei a tanjiobi ma meklou a belkul sils.
Tirkel mlo oldingel er ngii sel bol merek e ngungil a rengrir el kirel a klengar me a tir. Te melchesiu ra beltik el reng er ngii. Te medengei el kmo ngomekerreu. Ng diak loumondai e bai chemoit a temel el lomekngeltengat ra rebebil. A tara sechelil el milsaod re ngkal dil a kmo ng tara mekesai el chad el lodengelii el meral ochotii ra blekerdellel a beltikereng ma klengar ra Jesus Kristo.
Tirkal obekel a locha ma kot el mo melekoi el kmo ng dimlak el sal meklou a ultutelir er tial beluulechad. Ng di Dios a lolebodeb a delbenged e ngodech ra olbedabel ra beluulechad. Ng medengelterir tirkal obekel; Ng betik a rengul er tir. A omerellir a sioning ra mesisiich el klaumerang er mor Ngii.
Ng Klou a Belkum er Ngii
Rodam ma rodos, ng locha meral klemerang el kmo a chad a diak el ngerang a dongaisisiu er ngii ra klou el beluulechad ma eanged. Bebil er a taem eke omelchesiu el diak a belkum, diak a mesekau, sabisi, malechub eng diak a melatk er kau. Engdi bo blechoel melbedebek—kau a klou a belkum er Ngii! Alsekum kou mededenger tiang e bo momes aikal klouang el osisechakl:
A kot, a Dios a betik a rengul ra ngariou e medemedemek a rengul, e le tir a “kot el ngarbab ra rengedel a babeluades”17
Ongerung, a Rubak a meskid “a cherrungel el evangkelio er [Ngii] [el] mo muchais lokiu a remechitechut ma redi hutsui el mora rokui el beluu.”18 Ng mla ngiltii “a remechitechut er tial beluulechad el [mo] tuobed e merrakl ra rengarbab e misisiich”19 e mo ngmai el meriou “a rokui el ngii a ngarbab.”20
Ongedei, ng diak el iior er a basio el mkiei er ngii, ma teletael er a klechad el mngarngii, ngariou el ureor, ngesonges a decham, malechub e kedi uaia rebek el chad, malechub a okedong el mngarngii er a Ikelesia, e kau a diak lak moues er a Chedam er a Babeluades. Ng betik a rengul er kau. Ng medengelii a ngariou el rengum ma beltik el reng ma blekokeuii el omerellem. Ma bol dak, eng mokdubech a mesisiich el blak el reng ma klaumerang.
A ongeuang e mong me ngulebongel, kulengit me bo modengei el kmo aikel om ues e meruul er chelechang a diak el dilmerko el uaisei. Kau a mo diak kom sabisi, ngara klengit el reng, ringel, e mesaul a rengum. Kid a obang a yaksok ra Dios el kmo Ngii a diak bolobes malechub el bechititerir tirkel rengrir a bedul Ngii.21 Bol ngarngii a urungulem ma klaumerang er kau er tial yaksok. Bo meduch el oubeltik el reng el mora Demam ra Babeluades e bom oltirakl er Ngii ra tekoi ma omeruul.
Bol klou a rengum el kmo a omesisiich el urrekodel, ra klaumerang er kau er Ngii, e molemolem el ngara klaumerang e olengesenges a llechul, ea tara klebesei e kau a mo medengei el ngara omeruul aikal yaksok el mla mocholt el mora Apostol el Paulus: “A mad a dirkak el ues, ma ding a dirkak el renges, malechub el siseb ra rengrir a rechad, aikel tekoi el Dios a mla kudmokl el mortirkel oubeltik el reng el morngii.”22
Rodam ma rodos, ng kel kot el mesisiich el Ngar ra beluulechad ma eanged a Demal a reng el ngar kau. Ng medengelekau. Ng betik a rengul er kau el obang a klikiid el beltikereng.
A Dios a mesekau el diak dim chad el ngar tial kekerei el beluu e kiei el ngarngii a temel—Ng mesekau el Ngelekel. Ng mesekeau el ngar el sebechem e ruul el mo ra ikel kirem. Ng soal obo modengei el kmo ng klou a ultutelem er Ngii.
Mei me de ngara klemerang, oumerang, ede ketmokl a klengar er kid mebo dodengei a meral diak a ulebengelel el belkud ma sebeched. Mei me de bo de klikiid el mo melai a mekreos el klengeltengat ra Demad ra Babeluades el mla kudmokl el kired a nglunguchek loba ngklel a Ngelekel, el Jesus Kristo, amen.
© 2011 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/10. Kengei er a oidel: 6/10. Oidel a Visiting Teaching Message, November 2011. Palauan. 09771 881