Fas Presidensi Mesej, Disemba 2011
Fasin blong Jusum blong Stap Talem Tankgyu
Papa blong yumi long Heven i komandem yumi blong stap talem tankgyu long saed blong evri samting (luk long Fas Tesalonaeka 5:18), mo Hem i askem yumi blong mas givim ol tankyu blong yumi from ol blesing we yumi kasem (luk long D&C 46:32). Yumi save se evriwan long ol komanmen blong Hem oli blong gud blong yumi blong mekem yumi hapi, mo tu, yumi save se blong brekem ol komanmen, i lidim yumi i go long bigfala harem nogud.
Mekem se, blong stap hapi mo blong stopem bigfala harem nogud, yumi mas gat wan hat we i stap talem tangkyu. Yumi bin luk long laef blong yumi, we fasin blong stap talem tangkyu mo hapines, tufala i joen tugeta. Yumi evriwan i wantem blong filim fasin ia blong talem tangkyu, be hem i no isi blong stap gat fasin blong stap talem tangkyu oltaem mo oltaem long saed blong evri samting, hemia long taem blong ol tes blong laef. Sik, fasin blong tingting i harem nogud mo taem yumi lusum ol pipol we yumi lavem, ol samting ia, oli kam long wanwan taem long laef blong yumi. Ol harem nogud blong yumi i mekem i had blong luksave ol blesing mo blong stap glad from ol blesing we God i putum i stap blong givim long yumi long fiuja.
Hem i wan jalenj blong stap kaontem ol blesing blong yumi, from yumi gat wan wei, we oltaem, yumi tekem ol gud samting oli blong nating. Taem yumi lusum wan haos, kaekae blong kakae, o gud frensip blong ol fren mo ol famle, nao yumi luksave olsem wanem yumi sud bin glad taem yumi bin gat olgeta.
Moa bitim evriwan, samtaem i had blong yumi stap glad inaf from ol bigfala presen we yumi stap kasem: olsem taem we Jisas Kraes i bon, Atonmen blong Hem, promes ia blong laef bakegen long ded, janis blong glad long wan laef we i no save finis wetem ol famle blong yumi, mo Restoresen blong gospel wetem prishud mo ol ki blong hem. Wetem help blong Tabu Spirit nomo, yumi save stat blong filim wanem ol blesing ia oli minim long yumi mo long olgeta we yumi lavem olgeta. Mo long taem ia nomo yumi save hop blong stap talem tangkyu long saed blong evri samting mo stop blong mekem God i no glad taem yumi no stap gat fasin blong talem ol tangkyu i go long Hem.
Yumi mas askem long prea se God, tru long Paoa blong Tabu Spirit bae i helpem yumi blong luk ol blesing blong yumi i klia iven long medel blong ol tes blong yumi. Hem i save helpem yumi tru long paoa blong Spirit blong luksave mo blong stap talem tangkyu from ol blesing we yumi tingting nating long olgeta. Wanem we i bin helpem mi plante, i blong askem God long prea, “Bae yu plis daerektem mi i go long wan man we mi save helpem, long bihaf blong Yu?” Hem i taem mi bin stap helpem God blong blesem ol narawan we mi bin luk kolosap moa long ol blesing blong miwan.
Ansa blong prea blong mi i bin kam, wan taem we wan kapol we mi no bin save bifo i bin invaetem mi blong go long wan hospital. Long ples ia, mi faenem wan smol bebi gel we i smol tumas we hem i save fit nomo insaed long han blong mi. Bebi gel ia i kam long laef sam wik nomo i pas, be hem i bin gotru long plante operesen. Ol dokta oli bin talem long papa mo mama blong bebi ia se bae oli nidim blong mekem sam operesen we i moa had blong hat mo lang blong sapotem laef insaed long smol pikinini ia blong God.
Long rikwes blong papa mo mama, mi bin givim wan prishud blesing long bebi gel ia. Blesing ia i bin gat wan promes se bae hem i gat wan laef we bae i stap gohed. Mi givim wan blesing be i moa long hemia; mi bin kasem blesing blong gat wan hat we i save talem tangkyu moa.
Wetem help blong Papa, yumi evriwan i save jusum blong filim moa, fasin ia blong talem tangkyu. Yumi save askem Hem blong helpem yumi blong yumi luksave ol blesing blong yumi i klia moa, nomata ol nogud samting i stap hapen. Blong mi, long dei ia, mi bin glad long wan glad we mi neva bin gat bifo from hat mo lang blong mi we tufala i stap wok gud. Mi givim ol tangkyu taem mi stap go long haos from ol blesing we oli bin kam long ol pikinini blong mi; mo mi bin save luk i klia moa se oli ol merikel blong kaen fasin we oli kam long God mo long ol gudfala pipol raon long ol pikinini blong mi.
Antap long hemia, mi bin filim fasin blong talem ol tangkyu from pruf ia blong Atonmen we i stap wok long laef blong ol papa mo ol mama ia we oli gat ol wari, mo long laef blong mi. Mi bin luk hop mo stret lav blong Kraes i stap saen long ol fes blong olgeta iven long ol nogud tes long laef ia. Mo mi bin filim pruf ia we yu save filim sapos yu askem God blong soem long yu we Atonmen i save letem yu filim hop mo lav.
Yumi evriwan i save mekem joes ia blong givim ol tangkyu long prea mo askem God long daereksen blong givim seves long ol narawan long bihaf blong Hem—speseli long taem ia blong yia, taem yumi stap selebretem taem we Sevya i bon. God we i Papa, i bin givim Pikinini blong Hem, mo Jisas Kraes i bin givim long yumi Atonmen we hem i presen we i moa bigwan long evri narafala presen, mo i moa bigwan long evri samting we yumi save givim (luk longD&C 14:7).
Blong stap givim ol tangkyu long prea i save letem yumi blong luk hamas nao ol blesing ia mo evri nara blesing blong yumi oli bigwan evriwan, mo long wei ia, kasem presen ia blong gat wan hat we i save talem tangkyu moa.
© 2011 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/10. Oli letem translesen: 6/10. Translesen blong First Presidency Message, December 2011. Bislama.. 09772 852
Yusum Mesej Ia blong Tij
Blong stap raetemdaon ol eksperiens mo blesing blong yumi, i save helpem yumi tingbaot olgeta, mo i givim yumi wan samting we yumi save lukluk i gobak long hem. Tingting gud blong stap askem long olgeta we yu stap tijim blong oli raetemdaon wanem oli stap talem tangkyu from—blong helpem olgeta blong tingbaot ol blesing we oli bin kasem, luksave ol blesing we oli jes kasem mo lukluk fored from ol blesing we oli stap kam long fiuja.
Yu save leftemap tingting tu blong olgeta we yu stap tijim blong folem eksampol blong Presiden Aering blong askem Papa long Heven blong daerektem olgeta i go long wan man we oli save helpem o mekem seves long olgeta.