Visiting Tijing Mesej, Disemba 2011

Wan Bigfala Wok we I No Gat En

Stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.

Fet• Famle • Help

Lod, Jos blong Hem, ol famle, mo ol komuniti oli nidim paoa blong ol woman we oli stret mo gud. I tru, Elda M. Rasel Balad blong Kworom blong Olgeta Twelef Aposol i tijim se “evri sista insaed long Jos we oli bin mekem ol kavenan wetem Lod oli gat wan tabu responsibiliti blong help blong sevem ol sol, blong lidim ol woman blong wol, blong mekem ol famle blong Saeon oli kam strong mo blong bildimap kingdom blong God.”¹

Sam sista oli save stap askem olgetawan sapos oli save kasem ol gol we oli hae. Be olsem we Ilaesa R. Sno (1804–87), nambatu Rilif Sosaeti jeneral presiden i bin eksplenem, “I no gat wan sista we i mas tingting se hem i stap hemwan tumas, mo i no gat wan sista we i mas tingting se paoa blong hem blong lidim man i no strong inaf, mekem se hem i no save wok tumas blong bildimap Kingdom blong God long wol ia.”² Sista Sno i bin tijtim tu se Rilif Sosaeti i bin oganaes “blong mekem i kam tru evri gud mo bigfala wok”.³

Fasin blong stap tekpat insaed long Rilif Sosaeti i mekem yumi gat paoa blong kasem moa pipol taem yumi givim, long wanwan sista, ol janis blong bildimap fet, blong mekem ol famle mo hom oli kam strong moa, mo blong givim seves, tugeta long hom mo raon long wol. Mo laki se ol hadwok blong yumi wanwan, mo tu olsem ol Rilif Sosaeti, oli no nid blong oli bigwan mo mekem ae i open, be oli mas mekem wetem tingting gud mo oli mas hapen oltaem. Ol praktis we oli stret mo gud olsem prea blong yuwan we yu mekem evri dei, mo famle prea, skripja stadi long evri dei, mo stap oltaem wok strong long ol koling blong jos bae i helpem fet i kam antap mo blong bildimap kingdom blong Lod.

Long ol sista we oli stap askem olgetawan sapos wanem oli givim i mekem wan samting i defren long laef, Elda Balad i talemaot se hemia i tru: “Evri sista we stanap from trutok mo fasin blong stap stret mo gud i mekem paoa blong devel i stap go daon. Evri sista we i stap mekem famle blong hem i kam strong moa mo i protektem famle blong hem, i stap mekem wok blong God. Evri sista we i laef olsem wan woman blong God, i stap kam olsem wan laet blong ol narawan oli folem mo i stap planem ol sid blong stret mo gud paoa we bae oli save havestem afta plante yia we oli stap kam yet.”⁴

I Kamaot long Ol Skripja

Fas Korin 12:4–18;Fas Timoti 6:18–19;Mosaea 4:27; Ol Toktok blong Bilif 1:13

I Kamaot long Histri blong Yumi

Ilaesa R. Sno i bin stap olsem sekreteri blong Rilif Sosaeti taem oli bin oganaesem long Nauvu mo Presiden Brigham Yang I bin singaotem hem (1801–77) blong travel raon long Jos blong helpem ol bisop blong oganaesem Rilif Sosaeti insaed long ol wod blong olgeta.

Sista Sno i bin tijim: “Sapos i gat eni gel mo mama long Isrel we i stap filim se hem i no inaf long ples we hem i stap long hem, nao bae hem i faenem se hem i gat moa paoa mo skil blong mekem gud; mo ol paoa mo skil ia, oli gat i stap wetem olgeta we oli bigwan. … Presisden Yang i bin openem mo mekem i posibol blong gat moa ples we i bigwan inaf blong tekem aksen mo blong man i mekem yus long yumi.”⁵

© 2011 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/10. Oli letem translesen: 6/10. Translesen blong Visiting Teaching Message, December 2011. Bislama. 09772 852

Wanem Mi Save Mekem?

Olsem wanem nao mi save helpem ol sista we mi visitim blong luksave mo tekem aksen wetem stret mo gud paoa ia we oli gat, blong lidim ol narafalawan?
Olsem wanem nao mi save yusum ol spesel presen mo talen blong mi blong blesem ol narafalawan?