Poraus seni ewe Aewin Presetensi, December 2011
Ewe Finata ren Manauen Kinisou
Semach won Nang a annuku ngeni kich ach sipwe kinisou ren mettoch meinisin (nengeni 1 Thessalonian 5:18), me a mochen sipwe kinisou ren ach kewe feioch a fang ngeni kich (nengeni D&C 46:32). Sia sinei pwe meinisin An kewe annuk a awora ngeni kich pwapwa, me sia pwan sinei pwe ika sia atai an kewe annuk a awora ngeni kich netipechou.
Iwe ren ach sipwe pwapwa me kunu seni mi ngaw, siwpe fokkun kinisou non netipach. Sia kuna non manauach ewe chufengenin kinisou me pwapwa. Kich meinisin sia mochen mefi kinisou, nge ese fokkun mecheres ach sipwe kinisou non mettoch meinisin ren ekkewe sosotun ei manau. Samau, netipengaw, me manon ekkewe sia fokkun tonger epwe fis non manauach. Ach aurek a aweiresi kich ach sise kuna ach kewe feioch me kinisou ren ekkewe feioch Kot a isoni fanitach non ekan ran mwaach.
Mi weires ngeni kich ach sipwe aneani ach kewe feioch pokiten sia kan anamwotongawa met mi murrino. Nupwen ese chuen wor imwach, anach möngö, are ewe tongen chienach me ach kewe famini, sia esinna pwe mi namwot ach sipwe fen kinisou nupwen ra nom rech.
Napengeni, fan ekkoch a fokkun weires ngeni kich ach sipwe kinisou ren ekkewe niffang mi auchea sia angei: uputiwen Jises Kraist, An we Achasefan, ewe pwonen manausefan, ewe tufichin pwapwaiti manau ese much ren ach kewe famini, ewe Aniwinsefaniton ewe kapas allim ren ewe pristut fiti ekkewe kii. Seni chok aninisin ewe Ngun mi Fel sia tongeni poputa ne mefi auchean ekkana feioch ngeni kich me ekkewe sia men tonger. Iei chok atun sipwe tongeni epinukunuk ne kinisou non mettoch meinisin me kunu seni ewe tipisin ach sise kinisou ngeni Kot.
Mi namwot pwe sipwe tingor non iotek pwe Kot, seni manamanen ewe Ngun mi Fel, epwe anisi kich ach sipwe kunaochu ach kewe feioch ina mwo ika sia nom nukanapen ach kewe sosot. A tongeni anisi kich seni manamanen ewe Ngun mi Fel ach sipwe esinna me fokkun kinisou ren ekkewe feioch sia kan anamwotongawa. Met a wesen anisiei ena tingor ngeni Kot non iotek, “Kose mochen kopwe emweni ei ngeni emon upwe tongeni anisi fan itom?” Nupwen ua anisi Kot ne efeiochu ekkoch ua kunaochu pwisin ai kewe feioch.
Ai iotek a pwonu fan eu nupwen ruemon mi pupunu use sisineir ra etiwa ei ai upwe no ngeni eu pioing. Iwe ua kuna emon kukun monukon amen fokkun kukun ua tongeni komoch non pei. A chok keran ruu wikan, nge a wor an we samau a fen reirei ren fan fitu. Ekkewe tokter ra ereni seman me inan pwe mi namwot ar repwe fori pwan eu angangen reirei mi weires ika pwe foun ngasangasan epwe tongeni awora manau ngeni ena kukkun noun Kot.
Seni tingor an ekkewe sam me in, ua ngeni ewe monukon eu efeiochun pristut. Ewe efeioch a masou ngeni eu pwonen manau epwe soposopono. Me nukun ai ua fori ewe efeioch, Ua angei ewe feioch won pwisin inisi ren ai ennetin kinisou non netipei.
Ren an Semach aninis, kich meinisin sia tongeni finata ach sipwe manauen kinisou. Sia tongeni tingorei an epwe anisi kich ach sipwe kunaochu ach kewe feioch, ren mettoch meinisin. Ngang non na fansoun, ua fokkun ennetin kinisou ren ewe manamanen foun ngasangasei mi ngasangasoch. Ua fokkun kinisou nupwen ua niwino imwei we ren ekkewe feioch ngeni nei kewe semirit ua tongeni kuna ochu pwe manamanen kirekirochun Kot me seni ekkewe aramas mi murino ra chok nom unukur.
Napengeni, ua mefi ai kinisou ren ewe Achasefan a angang non manauei me manauen ekkewe sam me in. Ua kuna epinukunuk me ennetin tong an Kraist a asarama non meser, pwan tori non ar kewe riafoun sosot. Me ua mefi ewe manaman ka pwan tongeni mefi ika pwe ka tingor ngeni Kot an epwe pwari ngonuk ika pwe ewe Achasefan epwe anisuk om kopwe mefi epinukunuk me tong.
Kich meinisin sia tongeni finata ach sipwe kinisou non ach iotek me tingor ngeni Kot ren aninis ach sipwe anisi ekkoch—akkaewin non ei fansoun sia achema uputiwen ewe Chon Amanau. Kot ewe Sam a fang Noun we At, me Jises Kraist a fang ngeni kich ewe Achasefan, ewe auchean me nein niffang meinisin a fang ngeni kich (nengeni D&C 14:7).
Kinisou non iotek a tongeni anisi kich ach sipwe kuna auchean ekkei feioch me ekkewe ekkoch feioch me sia angei ewe niffangen anapanon kinisou non netipach.
© 2011 seni Intellectual Reserve, Inc. Meinisin pung mi kawor. A för non Amerika. Kapungunon non fasun Engenes: 6/10. Kapungunon chiakun: 6/10. Chiakun ewe First Presidency Message, December 2011. Chuukese. 09772 901
Afanafan seni Ei Poraus
Maketiwen met ekkewe a fis ngeni kich me ach kewe feioch a tongeni anisi kich ach sipwe chechemenir me a awora ngeni kich mettoch epwe achema ngeni kich. Kopwe ekiekin om kopwe tingorei ekkewe ka asukuner ar repwe maketiw met ekkewe ra kinisou ren—epwe anisir ar repwe chechemeni ekkewe feioch ra angei, esina ekkewe feiochun iei, me nikitu ngeni ekkewe feioch non ekan fansoun mwach.
Kopwe pwan pesei ngenir ar repwe tapweno an Preseten Eyring we nenien appiru ne tingor ngeni Semach won Nang an epwe emwenir ngeni emon repwe tongeni anisi are angang ngeni.