2011
Eu Naponon Föfför
December 2011

Poraus seni Fefin Chon Amwa, December 2011

Eu Naponon Föfför

Kopwe aneani ekkei mettoch, me nupwen mi och, kopwe aporausa ren ekkewe fefin ka churi. Kopwe aea ekkewe kapas eis epwe anisuk ne apochokuna ekkewe fefin ka churi me pwan aochu manauom ren aean Fin Anisi.

Nuku • Famini • Aninis

Ewe Samon, An we Mwichefen, famini, me chon neniach kewe a auchea ngenir ekkewe fefin mi murino. Ewer pwe, Elder M. Russell Ballard seni ewe Mwichen Engon me Ruemon Aposel mi apasa, “Iteitan fefin me non ei Mwichefen mi pwon fengen ren ewe Samon a angei ewe wis ne aninis ne amanaua ngun, ne emweni ekkewe fefin me won ei fonufan, ne apochokuna ekkewe imwen Saion, me förata ewe muun Kot.”1

Ekkoch ekkewe fefin repwe ekieki ika repwe tongeni apwonueta wiser kewe mi auchea. Nge usun chok Eliza R. Snow (1804–87), Aruemonun presetenin Fin Anisi, a awewei, “Esap tiweno mwo emon fefin, me wisan we epwe wenewen pwe met a tongeni föri eu watten mettoch an epwe kouta ewe Muun Kot won ei fonufan.”2 Sister Snow a pwan afanafana pwe ewe mwichen Fin Anisi a foruta “ren apwonuetan iteiten föfför me angang mi murrino.”3

Achocho non mwichen Fin Anisi a awatteno ach we tufichin anisi emon me emon pwich kewe ne anapano ar nuku, apochokuna famini me imw, me awora aninis non imw me non unusen fonufan. Iwe sia kinisou pwe, achochon emon me emon neich chon Fin Anisi ese namwot an epwe watte me apekus, pwe a chok namwot an epwe feito seni netipach me epwe fis iteiten. Foforoch usun chok ach pwisin iotek me iotekin famini, aneani pukfel iteiten ran, me wenecharen föri wisach non Mwichefen epwe tongeni anisi kich ne anapano ach nuku me kouta muun ewe Samon.

Ngeni ekkewe fefin minne ra ekieki ika pwe ei angang a awora eu ekesiwin, Elder Ballard a apochokuna: “Ekkewe fefin ra fokkun wenechar me nukuchar ra tongeni kisikisino pochokunen ewe tefin. Meinisin ekkewe fefin ra apochokuna me tumunu ar famini ra föri an Kot we angang. Meinisin fefin a manau non Kot a winiti emon chon anisi ekkewe ekkoch ar repwe tapweno me fotuki ekkewe foun iran murino ren ar repwe kinikin uwa murino seni non ekan fansoun mwach.”4

Seni ekkewe Pukfel

1 Corinth 12:4–18; 1 Timothy 6:18–19; Mosaia 4:27; Ekkewe Nongonongun Achifoua 1:13

Seni Ach Uruo

Eliza R. Snow, ewe a wisen seketeri non ewe mwichen Fin Anisi non Nauvoo nupwen a keran föruta, a kokko seni Preseten Brigham Young (1801–77) an epwe feino ekkis meinisin non ewe Mwichefen, ne anisi ekkewe pisop ne forata ewe mwichen Fin Anisi non ar kewe wart.

Sister Snow a apasa: “Ika pwe emon me nein ekkewe fefin me nengin non Israel ra mefi akukkunano[mi kouk] non unusen manauer, iwe repwe sinei ifa sokkun ar repwe ekieki are angang murino fan iten ekkewe aramas ra fokkun tonger. … Preseten Young a isetiw ewe ki ngeni ewe watten me naponon föfför me namwot.”5

© 2011 seni Intellectual Reserve, Inc. Meinisin pung mi kawor. A för non Amerika. Kapungunon non fasun Engenes: 6/10. Kapungunon chiakun: 6/10. Chiakun Visiting Teaching Message, December 2011. Chuukese. 09772 901

Esinesin

  1. M. Russell Ballard, “Women of Righteousness,” Liahona, Dec. 2002, 39.

  2. Eliza R. Snow, “An Address,” Woman’s Exponent, Sept. 15, 1873, 62.

  3. Eliza R. Snow, “Female Relief Society,” Deseret News, Apr. 22, 1868, 81.

  4. M. Russell Ballard, Liahona, Dec. 2002, 39.

  5. Eliza R. Snow, Deseret News, Apr. 22, 1868, 81.

Met Ua Tongeni Föri?

  1. Ifa usun ai upwe tongeni anisi pwi kewe ua churir ar repwe esinna me anganga ar kewe tufichin ar repwe winiti eu nenien appiru mi murino?

  2. Ifa usun ai upwe tongeni aea niffangei kewe me ai kewe nipwakoch ne efeiochu ekkoch?