iTukutuku ni Mataveiliutaki Taumada, Tiseba 2011
Nomu Digitaka mo Vakavinavinaka
Sa vakaroti keda na Tamada mai Lomalagi meda dau vakavinavinakataka na veika kecega (raica na 1 Cesalonaika 5:18), ka sa gadreva kina o Koya meda dau vakavinavinakataka na veivakalougatataki eda sa ciqoma tiko (raica na V&V 46:32). Eda sa kila ni inaki ni Nona ivakaro taucoko sara o ya meda bula marau kina, ka da sa kila talega ni da na laki kune rarawa ke da voroka na ivakaro oqo.
Ke gadrevi meda na bula marau ka dro tani mai na rarawa, e dodonu me tiko vei keda na yalo ni vakavinavinaka. Eda raica ena noda bula ni rau sema tiko na vakavinavinaka kei na bula marau. Eda vinakata taucoko na yalo ni vakavinavinaka, ia e sega ni rawarawa me dau tudei tiko na noda vakavinavinakataka na veika kecega ena loma ni vakatovolei ni bula oqo. Na tauvimate, yalo rarawa, kei na nodra takali yani o ira na noda daulomani e dau yaco mai ena gauna ni noda bula. Na mosi ni yalo e dau vakadredretaka meda raica rawa na noda sa vakalougatataki tiko ka meda vakavinavinakataka na veivakalougatataki sa vakarautaka tu na Kalou ena noda veisiga ni mataka.
Eda sa qai bolei kina meda wilika mada na noda vakalougatataki baleta sa vaka me noda itovo tu na noda vakawalena na veika vinaka vakaoqo. Na gauna sa sega kina na noda vale, se kakana meda kania, se na nodra loloma na wekada kei na matavuvale, eda sa qai kila kina ni a dodonu sara meda a vakavinavinakataka ena gauna a tiko kina vei keda.
Na kena bibi duadua, ni so na gauna e dau dredre vei keda meda dau vakavinavinakataka mada ga na isolisoli cecere duadua eda sa mai ciqoma: o ya na sucu i Jisu Karisito, na Nona Veisorovaki, na yalayala ni tucaketale, na madigi meda marautaka na bula tawamudu vata kei na noda matavuvale, na Vakalesuimai ni kosipeli vata kei na matabete kei na kena idola. Ena veivuke walega ni Yalo Tabu eda sa tekivu vakila kina na kedra ibalebale na veivakalougatataki oqori vata kei ira eda sa daulomana. Sa qai rawa kina meda nuitaka meda sa na vakavinavinakataka na veika kecega ka drotani rawa mai na ca ni noda sega ni vakavinavinakataka na Kalou.
Sa dodonu kina meda kerea ena masu vua na Kalou, ena kaukauwa ni Yalo Tabu, me na vukei keda meda raica rawa na noda vakalougatataki ena gauna mada ga ni noda vakatovolei. Sa rawa me vukei keda o Koya ena kaukauwa ni Yalotabu meda raica rawa kina ka vakavinavinakataka na veivakalougatataki eda a dau vakawalena tu. Na ka sa dau vukei au sara vakabibi o ya na noqu kerea vua na Kalou ena masu, “Au sa kerei Kemuni mo ni vakauti au vua e dua meu vukei koya ena Vukumuni?” Ni gauna au vukea kina na Kalou me vakalougatataki ira kina eso au raica rawa sara kina vakavoleka na noqu kalougata.
E dua na gauna a saumi na noqu masu ena nodrau a sureti au e dua na veiwatini au se qai sotavi rau vakadua me keitou gole ki na dua na valenibula. Au a laki raica kina e dua na gonelailai e somidi sara ka rawa niu qumia tu ga e ligaqu. Ni se qai vakamacawa walega na nona bula, sa sele oti vakavica. E ratou kaya na vuniwai vei rau na itubutubu oqo ni na gadrevi eso tale na veisele e dredre sara, me rawa ni qai cakacaka kina na uto kei na yatevuso nei koya na luve ni Kalou lailai o ya.
Ena nodrau kerekere na itubutubu, au a qai solia vei gonelailai e dua na veivakalougatataki ni matabete. Na veivakalougatataki oqo a okati kina na yalayala me vakabalavutaki na nona bula. Sa mai uasivia na veivakalougatataki oqo, na noqu sa mai vakalougatataki vakakina ena dua na yalo ni vakavinavinaka.
Mai na veivuke nei Tamada, sa rawa vei keda taucoko meda digitaka na yalo sa dau vakavinavinaka vakalevu cake sara. Sa rawa meda kerei Koya me vukei keda meda raica rawa vakamatata sara na noda vakalougatataki, ena keda ituvaki cava ga. Vei au ena siga o ya, au sa qai bau vakavinavinakataka kina na cakamana ni kena cakacaka tiko na utoqu kei na noqu yatevuso. Niu lesu tiko i vale au a vakavinavinakataka na veivakalougatataki vei iratou na luvequ niu sa mai raica vakamatata sara na cakamana ni loloma mai vua na Kalou kei ira na tamata vinaka e wavoliti iratou.
Na kena bibi duadua, au sa vakavinavinakataka na ivakadinadina ni kena sa cakacaka tiko na Veisorovaki ki na nodrau bula lomabibi na itubutubu o ya ka vakakina vei au. Au raica rawa na ramase ni matadrau ena inuinui kei na loloma uasivi i Karisito, ena gauna ni nodrau vakatovolei vakatani o ya. Kau a vakila rawa na kena ivakadinadina o rawa ni vakila talega kevaka o kerea vua na Kalou me vakatakila vei iko ni sa rawa ki na Veisorovaki mo vakila e dua na inuinui kei na loloma.
Sa rawa vei keda taucoko meda digitaka na vakavinavinaka ena masu ka kerea vua na Kalou na veidusimaki meda qaravi ira eso ena Vukuna—vakabibi ena gauna vakaoqo ni yabaki ni da marautaka tiko na sucu ni iVakabula. Sa solia mai na Kalou na Luvena, ka sa solia mai vei keda o Jisu Karisito na Veisorovaki, na isolisoli cecere duadua kei na loloma kece sara (raica na V&V 14:7).
Sa rawa vei keda meda raica ni da vakavinavinakataka ena masu na vakaitamera ni veivakalougatataki kece oqo kei na veivakalougatataki taucoko tale eso ka da sa ciqoma vakakina na isolisoli ni dua na yalo sa dau vakavinavinaka.
© 2011 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/10. Vakadonui me vakadewa: 6/10. iVakadewa ni First Presidency Message, December 2011. Fijian. 09772 858