iVaqa ni Veisiko, Tiseba 2011
E Dua na iTutu Levu ni Cakacaka
Vulica na itukutuku oqo, ka me veivosakitaki vata kei ira na marama o sikova ena kena gauna donu. Vakayagataka na taro me vukea na nomu vaqaqacotaki ira na marama ka cakava me sa tiki kaukauwa ni nomu bula na iSoqosoqo ni Veivukei.
Vakabauta • Matavuvale • Veivukei
E gadreva tu na Turaga, na Nona Lotu, matavuvale, kei ira na itikotiko raraba na nodra veivakauqeti na marama yalododonu. Me vaka, a vakavulica o Elder M. Russell Ballard ena Kuoramu ni iApositolo Le Tinikarua ni “o ira na marama yadudua ena Lotu oqo era sa vakayacora oti na nodra veiyalayalati kei na Turaga ni sa nodra cakacaka tawamudu me ra vakabula na tamata. Me ra liutaki ira na marama ena vuravura oqo, vakaqaqacotaki ira na veiitikotiko e Saioni, ka tara cake na matanitu ni Kalou.”1
Eso na marama era na lomatarotarotaka beka na nodra rawa ni vakayacora na inakinaki cecere oqo. Ia a vakamacalataka vakaoqo o Eliza R. Snow (1804–87), na ikarua ni peresitedi raraba ni iSoqosoqo ni Veivukei, “E sega ni dua na marama e tu duadua ga, ka rabailailai na nona itutu ia sa rawa vua me vakayacora na cakacaka lelevu eso me tarai cake kina na Matanitu ni Kalou ena vuravura oqo.”2 A vakavulica talega vakakina o Sister Snow ni a tauyavutaki na iSoqosoqo ni Veivukei “me baleta na kena vakayacori rawa na veicakacaka vinaka ka dokai.”3
Na vakaitavi ena iSoqosoqo ni Veivukei ena vakarabailevutaka na noda itutu ni veivakauqeti ena noda solia na madigi vei ira yadudua na marama mera tara cake na vakabauta, me ra vaqaqacotaka na matavuvale kei na itikotiko, ka vakarautaka na veiqaravi ena noda vanua ka vakakina e vuravura raraba. E vinaka kina, ni sega ni gadrevi sara ki na noda sasaga yadudua vakakina ena iSoqosoqo ni Veivukei me vakaitamera sara ka veiulabaleti, ia e dodonu ga me nakiti ka vakaivakarau. Na itovo savasava me vakataka na masumasu ni tamata yadudua kei na matavuvale ena veisiga, na vuli ivolanikalou ena veisiga, kei na vakaivakarautaki na vakarabailevutaki ni veikacivi ni Lotu ena vukea na kena vakatorocaketaki na vakabauta ka tarai cake na matanitu ni Turaga.
Kivei ira na marama era lomatarotarotaka tiko beka ena kena rawa ni vakayaco veisau na cau lalai vinaka oqo, e kaya kina vakaoqo o Elder Ballard: “Na marama yadudua era tutaka na dina kei na ivalavala dodonu era na vakarusa laivi na veivakauqeti ni ivalavala ca. Na marama yadudua era vaqaqacotaka ka taqomaka na nona matavuvale sa vakayacora tiko na cakacaka ni Kalou. Na marama yadudua e bula voli me vaka na marama ni Kalou sa yaco me dua na bikeni me ra muria na tamata ka teivaka na sorenikau ni veivakauqeti dodonu ka na laki tamusuki ena veitabayabaki sa tu mai liu.”4
Mai na iVolanikalou
1 Korinica 12:4–18; 1 Timoci 6:18–19; Mosaia 4:27; Yavu ni Vakabauta 1:13
Mai na Keda iTukutuku Makawa
A veiqaravi taumada tiko o Eliza R. Snow, ena itutu ni sekeriteri ena gauna a tauyavutaki kina na iSoqosoqo ni Veivukei mai Nauvoo, ka sa mai kacivi koya kina o Peresitedi Brigham Young (1801–77) me sikova raraba yani na Lotu, ka me laki vukei ira na bisopi me ra tauyavutaka na iSoqosoqo ni Veivukei ena nodra dui tabanalevu.
A vakavulica vakaoqo o Sister Snow: “Kevaka e dua na goneyalewa kei na marama tina ni Isireli e vakila ni vakataotaki [yalani] tiko na nodra itutu ena gauna oqo, era na kunea ena gauna oqo na ituvatuva vakarautaki ni kaukauwa kei na gugumatua yadudua ni caka vinaka era sa na vakaedaumenitaki kina ena galala. … Sa mai dolava kina o Peresitedi Young e dua na itutu rabailevu ka levu ni cakacaka kei na kena yaga.”5
© 2011 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/10. Vakadonui me vakadewa: 6/10. iVakadewa ni Visiting Teaching Message, December 2011. Fijian. 09772 858