Rongorongo man te Moan Beretitentii, Ritembwa 2011
Te Rinerine ni KanKakaaitau
Tamara are i Karawa e tuangiira bwa ti na kakaaitau ibukin bwaai ni kabane (taraa 1 I-Tetaronike 5:18), ao E tangiriira bwa ti na anga ara kakaaitau ibukin kakabwaia ake ti karekei (taraa D&C 46:32). Ti ataia bwa ni kabanea Ana tua a nanonaki bwa a na kakukureira, ao ti ataia naba bwa uruakan te tua e na kairiira nakon te nanokaawaki.
N te aro are ti aonga ni kukurei ao n totokoa te nanokaawaki, ti riai ni iai nanora ae kakaaitau. Ti a tia n nooria inanon maiura te reitaki imarenan te kakaaitau ao te kukurei. Ngaira ni kabane ti tangiria n namakina te kakaaitau, ma e bon aki beebete te teimatoa ni kakaaitau ni bwaai ni kabane inanon kataakira ni maiura. Te Aoraki, te nanobuaka, ao buaia aomata ake ti tangiriia a roko n taai aika bati inanon mauira. Nanokaawakira e kona ni karawawata nooran kakabwaia ao te karabwarabwa ibukin kakabwaia ake e a tia te Atua ni kaawakin ibukira inanon taai aika a na roko.
Bon te kakaewenako bwa ti na warekii ara kakabwaia ibukina bwa iai iroura te konabwai ni butimwaai bwaai aika tamaroa n akea te karabwarabwa iai. Ngkana arona bwa akea mweengara, amarake ake ti na kanna, ke aia akoi raoraora ao ara utu, ti ataia bwa ti riai n rangi ni kakaaitau ngke arona bwa iai bwaikai iroura.
Ai moaraara riki, n tabetai e bon kangaanga iroura bwa e na tau ara kakaaitau ibukin te bwaintangira ae moan te kakannato are ti karekea: bungiakin Iesu Kristo, Ana Mwakuri ni Kamaiu, te berita ibukin te mangauti, reken te tai ni kukurei ma ara utu n te maiu are akea tokina, Kaokakin te euangkerio ma te nakoanibonga ma kiingina. Tii man ana ibuobuoki te Tamnei ae Raoiroi are ti na kona ni moana namakinan nanon kakabwaia akanne ibukira ao ibukiia te koraki ake ti tangiriia. Ao ibukin anne are ti kona iai ni kantaningaia ni karabwarabwa ibukin bwaai ni kabane ao n totokoa unin te Atua ibukin te aki kakaaitau.
Ti riai ni bubuti rinanon te tataro bwa te Atua, man mwaakan te Tamnei ae Raoiroi, e na buokiira ni kamataatai n noori ara kakabwaia ibuakon kataakira. E kona ni buokiira man mwaakan te Tamnei ni kinai ao ni kakaaitau ibukin kakabwaia ake ti butimwaai n akea ara karabwarabwa. Tera are e a tia n rangi ni buokai bon butiian te Atua n te tataro, “Ko kona n taiaoka ni kairai nakon temanna are I kona ni buokia Ibukim?” Bon inanon te ibuobuoki te Atua e kakabwaiaia tabeman are I a tia n noora oin kakabwaiakiu n te aro ae rangi ni mataata.
Au tataro e kaekaaki n te taina ngke te taangana aika I aki kinaia mai mwaaina a kaoai n nakon te onaoraki. Ikekei I kunea te tei ae rangi ni uarereke are e a kona n tau inanon baiu. Inanon tii tabeua wiikin maiuna, e a tia ni karaoaki nakoina korokoro aika bati. Taokita a tia n tuangiia ana karo bwa a na rawata riki korokoro aika kangaanga aika kainanoaki ibukin te buroo ao mamaana ni kateimatoa te maiu inanon natin te Atua ae uarereke anne.
Man aia bubuti ana karo, I angan te teei te kakabwaia n te nakoanibonga. Te kakabwaia e airi ma te berita ibukin maiuna bwa e na kabwabwakaki. Riki nakon anganakina te kakabwaia, I karekea te kakabwaia n te nano ni kakaaitau.
Ma ana ibuobuoki Tamara, ngaira ni kabane ti kona n rineia n namakina te kakaaitau riki. Ti kona ni bubuti Nakoina bwa e na buokiira n noora ara kakabwaia n te aro ae mataata riki, n aki tabe bwa tera arora are ti mena iai. Irou n te bong anne, I karabwarabwa n aron are I tuai ni karaoia mai mwaaina kamimiin mwakurin buroou ao mamaau. I anga au karabwarabwa iaon kawaiu nakon mweengau ibukin kakabwaia nakoia natiu are I a kona n nooria raoi riki bon kamimiin ana akoi te Atua ao mai irouia aomata aika tamaroa ake irarikiia.
Iaoia ni kabane, I namakina te kakaaitau ibukin te kakoaua n ana Mwakuri ni Kamaiu are e mwakuri inanon maiuia kaaro ake a ingainga ao ngai. I a tia n noora te kantaninga ao ana tangira Kristo ae itiaki n raneanea imataia, inanon naba kataakiia ae korakora. Ao I namakina te kakoaua are ko kona n namakinna ngkana ko bubutiia te Atua bwa e na kaotia nakoim bwa te Mwakuri ni Kamaiu e kona n anganiko namakinan te kantaninga ao te tangira.
Ti kona ni kabane ni karaoa te rinerine n anga ara kakaaitau n te tataro ao ni butiia te Atua ibukin ana kairiiri ni beku ibukiia tabeman Ibukina—ai moararariki inanon te ririki aio ngkana ti bukamarua ana bong ni bung te Tia Kamaiu. Te Atua te Tama e anga Natina te mwaane, ao Iesu Kristo e anganiira te Mwakuri ni Kamaiu, te kabanea ni kakannato ni bwaintangira ibuakon bwaintangira nako (taraa D&C 14:7).
Kanakoan te kakaaitau rinanon te tataro e kona ni kariaira n noori tian kakabwaia aikai ao ni kabane ara kakabwaia ake tabeua ao n te aro aio are ti na karekea te bwaintangira ibukin te nano ae kakaitau riki.
© 2011 iroun Intellectual Reserve, Inc. A bane n tauaki mwiin taian kariaia ibukin katotongana. Boretiaki n te USA. Kariaiakaki n te Ingiriti: 6/10. Kariaiakaki rairana: 6/10. Rairan te First Presidency Message, December 2011. Kiribati. 09772 859
Anga reirei man te Rongorongo Aei
Koreakin bwaai aika ti rinanoi ao kakabwaia e kona ni buokiira n uringii ao n anganiira te bwai are ti kona n oki rikaaki nako iai. Iangoia n titirakiniia te koraki are ko reireiniia ni korei bwaai ake a kakaaitau ibukina—ni buokiia n uringii taian kakabwaia ake a tia ni karekei, ao ni kinai kakabwaia n taai aikai, man kantaningai kakabwaia ibukin taai aika ana roko.
Ko kona naba ni kaungaia te koraki ake ko reireiniia n iira ana katooto Beretitenti Eyring ni butiia Tamara are i Karawa ni kairiia nakon temanna are a kona ni buokia ke ni karaoa te mwakuri n ibuobuoki.