Rongorongo n Reirei ni Kakawari, Ritembwa 2011
Te Mwakuri ae Raababa Nako
Kamatebwaia te karaki aio ao, n angaraoina, maroroakinna ma tenaan tiitita ake ko kawariia. Kabonganai titiraki bwa e aonga ni buokiko ni kakorakoraia am tiitita ao ni karaoa te Bootaki n Aine bwa iteran maium ae kakammwakuri
Onimaki • Utu • Ibuobuoki
Te Uea, Ana Ekaretia, utu, ao ana botanaomata a kainanoa aia mwakuri aine aika tamaroa. Ni koauana, Unimwaane M. Russell Ballard n te Kooram n Abotoro are Tengaun ma Uoman e anga reirei bwa “aine n tatabemaniia n te Ekaretia aio ake a tia ni karaoa aia berita ae tabu ma te Uea iai tabeia mairoun te Atua ni buokiia ni kamaiuia aomata, ni kairiia ainen te aonaaba, ni kakorakorai mweengan Tion, ao ni katea abanuean te Atua.”1
Tabeman tiitita a na kona n nanououa ngkana a na kona ni karaoii kouru aika rietaata aikai. Ma n aron are e kabwarabwaraa Eliza R. Snow (1804–87), te kauoman ni beretitenti ni kabuta n te Bootaki n Aine, “Akea te aine ae e katukaki n tii ngaia, ao ana mwakuri e rangi n tianaki n te aro are e rangi ni uarereke are e kona ni karaoia nakon katean Abanuean te Atua iaon te aba.”2 Titita Snow e taekinna naba bwa te Bootaki n Aine e barongaki “ibukin kakoroan bukin mwakuri ni kabane aika tamaroa ao ni kakannato.”3
Iriirakin te Bootaki n Aine e kabuburaa korakoran ara mwakuri n anganakiia n tatabeman nako aine te tai ae angaraoi ni katea te onimaki, ni kakorakoraia utu ao mweenga, ao ni karekea te mwakuri n ibuobuoki n te mweenga ao ni kabutaa te aonaaba. Ao ni bon arona, ara kekeiaki n arora n tatabemaniira nako ao n aron te Bootaki n Aine e aki tangiraki bwa e na buubura man rangi n rawawata, ma a riai n iai bukiia ao man teimatoa. Mwakuri aika tamaroa n aron te tataro ibon iroum ao te utu, kamatebwaian booki aika tabu ni katoa bong, ao n teimatoa ni kabuburai weteakira man te Ekaretia e na buokiira ni karikirakea te onimaki ao ni katea abanuean te Uea.
Nakoia aine ake a nanououa ngkana ibuobuoki aika a uarereke aikai a kona ni karekea te kaokoro, Unimwaane Ballard e kakoaua: “Ni kabane tiitita ake a tei ibukin te koaua ao te tamaroa a kauarerekea ana mwakuri te buakaka. Ni kabane titita ake a kakorakora ao ni kamanoia aia utu a bon karaoa ana mwakuri te Atua. Ni kabane tiitita ake a maiu n aroia ana aine te Atua a na riki bwa biikan ibukiia tabeman bwa a na iiria ao n uniki koraan te mwakuri ae tamaroa are a na taiaki ibukin bwi n ririki aika a na roko.”4
Man Booki Aika Tabu
1 I-Korinto 12:4–18; 1 Timoteo 6:18–19; Motiaea 4:27; Taekan te Onimaki 1:13
Man Ara Rongorongo ni Kawai
Eliza R. Snow, are e a tia ni mwakuri bwa te tia koroboki ngke te Bootaki n Aine e kateaki i Nauvoo, e weteaki iroun Beretitenti Brigham Young (1801–77) ni mwamwananga rinanon nako te Ekaretia, ni buokiia bitiobi ni katei Bootaki n Aine inanon aia Uoote.
Titita Snow e anga ana reirei: “Ngkana iai naati aine ao tiina i Iteraera aika a [tianaki] n aia tabo ake a mwakuri iai, a na kona ngkai ni kunea te konabwai ae tau ibukin te mwaaka nako ao te konabwai ibukin karaoan te mwakuri ae tamaroa ake a bati irouia ibukin karaoan te mwakuri ae tamaroa. … Beretienti Young e a tia ni kauka te kawai ae bati ibukin karaoan te mwakuri ae bati man bongana.”5
© 2011 iroun Intellectual Reserve, Inc. A bane n tauaki mwiin taian kariaia ibukin katotongana. Boretiaki n te USA. Kariaiakaki n te Ingiriti: 6/10. Kariaiakaki rairana: 6/10. Rairakin te Visiting Teaching Message, December 2011. Kiribati. 09772 859
Tera ae I Kona ni Karaoia?
-
N na kanga ni buokiia tiitita ake I kawariia bwa a na kinaa ao ni mwakuri iaon aia konabwai n riki bwa taan karaoa ae tamaroa?
-
N na kanga ni kamanena au bwai n tangira ao au tarena aika onoti ni kakabwaiaia tabeman?