Mensahe sang Unang Panguluhan, Disyembre 2011
Ang Pagpili nga ManginMapinasalamaton
Ang aton Amay sa Langit nagamando sa aton nga magpasalamat para sa tanan nga mga butang (tan-awa sa 1 Mga Taga-Tesalonica 5:18), kag ginahingyo Niya nga magpasalamat kita para sa mga bugay nga aton ginabaton (tan-awa sa D&C 46:32). Nakahibalo kita nga ang tanan sang Iya mga kasuguan ginatuyo sa pagpalipay sa aton, kag nakahibalo man kita nga ang paglapas sang mga kasuguan nagapadulong sa kalisod.
Gani agud mangin malipayon kag malikawan ang kalisod, kinahanglan may ara kita sang mapinasalamaton nga tagipusuon. Nakita naton sa aton mga kabuhi ang koneksyon sa tunga sang pagpasalamat kag sang kalipayan. TanT Tanan kita luyag makabatyag nga mapinasalamaton, apang indi mahapos nga magpasalamat pirme sa tanan nga mga butang sa tunga sang mga pagtilaw sang kabuhi. Ang pagbalatian, kapaslawan, kag ang pagtaliwan sang mga tawo nga aton pinalangga nagaabot kon kaisa sa aton mga kabuhi. Ginapabudlay sang aton mga kalisod nga makita ang aton mga bugay kag maapresyar ang mga bugay nga gintigana sang Dios para sa aton sa palaabuton.
Isa ka hangkat ang isipon ang aton mga bugay tungod may tendensiya kita nga magbaton sang manami nga mga butang nga wala ginaapresyar. Kon mawad-an kita sang puluy-an, kalan-on, ukon sang pag-ulikid sang mga abyan kag pamilya, marealisar naton kon ano kontani kita dapat kamapinasalamaton sang yara pa ang mga ini sa aton.
Labi sa tanan, kon kaisa mabudlay para sa aton nga mangin mapinasalamaton kaayo para sa pinakadalagko nga mga regalo nga aton ginabaton: Ang pagkabun-ag ni Jesucristo, Iya Pagpasag-uli ukon Atonement, ang promisa sang pagkabanhaw, ang oportunidad nga magkalipay sa kabuhi nga wala’y katapusan upod ang aton mga pamilya, ang Pagpanumbalik sang ebanghelyo upod ang priesthood kag ang mga yabi sini. Sa bulig lamang sang Balaan nga Espiritu kita makasugod sa pagbatyag kon ano ang kahulugan sadtong mga bugay para sa aton kag para sadtong aton mga pinalangga. Kag sa amo lamang kita makalaum nga magpasalamat sa tanan nga mga butang kag likawan ang pagsaklaw sang Dios tungod sa pagkaingrato.
Kinahanglan kita magpangabay sa pangamuyo nga ang Dios, paagi sa gahum sang Balaan nga Espiritu, magabulig sa aton nga makita ang aton mga bugay sing maathag bisan pa sa tunga sang aton mga pagtilaw. Mabuligan Niya kita paagi sa gahum sang Espiritu nga makilala kag magpasalamat para sa mga bugay nga wala naton ginaapresyar. Ang labi gid nga nakabulig sa akon amo ang magpangabay sa Dios sa pangamuyo, “Puede Mo bala ako lihog itudlo sa isa nga akon mabuligan para sa Imo?” Sa pagbulig mismo sa Dios sa pagpakamaayo sang iban nga nakita ko sing mas maathag ang akon kaugalingon nga mga bugay.
Ang akon pangamuyo kis-a ginsabat sang ang isa ka mag-asawa nga indi ko sadto kakilala nga nagpangabay sa akon nga magkadto sa isa ka ospital. Didto nakita ko ang isa ka diutay nga lapsag nga tuman ka gamay nga makaigo sia sa akon kamot. Sa pila lamang ka semana sang iya kabuhi, napaidalom na sia sa madamo nga mga operasyon. Ang mga doktor naghambal sa mga ginikanan nga kinahanglan sing mas komplikado nga operasyon para sa korason kag mga baga agud masustinir ang kabuhi sa sinang diutay nga anak sang Dios.
Sa pangabay sang mga ginikanan, ginhatagan ko ang lapsag sang bendisyon sang priesthood. Ang bendisyon naglakip sang promisa sang kabuhi nga maglawig pa. Labi pa sa paghatag sang isa ka bendisyon, nakabaton ako sa akon kaugalingon sang bugay sang isa ka mas mapinasalamaton nga tagipusuon.
Sa bulig sang aton Amay, tanan kita makapili nga magbatyag sing dugang nga kapasalamatan. Sarang kita magpangabay sa Iya nga buligan kita nga makita ang aton mga bugay sing mas maathag, ano man ang aton mga sirkumstansya. Para sa akon sina nga adlaw, amo ko pa lang gid naapresyar ang milagro sang akon kaugalingon nga korason kag mga baga nga nagagana. Nagpasalamat ako sang nagapauli na ako para sa mga bugay sa akon mga kabataan nga makita ko sing mas maathag amo ang mga milagro sang pagkamaluluy-on gikan sa Dios kag gikan sa maayong mga tawo sa palibot nila.
Labi sa tanan, nakabatyag ako sang kapasalamatan para sa ebidensya sang Pagpasag-uli nga nangin epektibo sa mga kabuhi sadtong di-mapahamtang nga mga ginikanan kag sa akon. Nakita ko ang paglaum kag ang putli nga gugma ni Cristo nga nagabanaag sa ila mga nawong, bisan pa sa ila makalilisang nga pagtilaw. Kag nabatyagan ko ang ebidensya nga inyo mabatyagan kon inyo pangabayon ang Dios nga ipabutyag sa inyo nga ang Pagpasag-uli makatugot sa inyo nga makabatyag sang paglaum kag paghigugma.
Tanan kita sarang makahimo sang pagpili nga magpasalamat sa pangamuyo kag magpangabay sa Dios para sa direksyon sa pag-alagad sa iban para sa Iya—labi na sining tion sang tuig sa pagsaulog naton sang pagkabun-ag sang Manluluwas. Ang Dios nga Amay naghatag sang Iya Anak, kag si Jesucristo naghatag sa aton sang Pagpasag-uli, ang pinakadako sa tanan nga mga dulot (tan-awa sa D&C 14:7).
Ang pagpasalamat sa pangamuyo sarang magtugot sa aton nga makita ang kaimportante sining mga bugay kag tanan sang iban pa naton nga mga bugay kag gani magbaton sang dulot nga may mas mapinasalamaton nga tagipusuon.
© 2011 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/10. Petsa sang pagtugot sa paglubad: 6/10. Paglubad sang First Presidency Message, December 2011. Hiligaynon. 09772 861
Pagtudlo gikan sa Sining Mensahe
Ang pagsulat sang aton mga eksperiyensya kag mga bugay makabulig sa aton nga madumduman ang mga ini kag para may ara kita sang mabalik-balikan. Binagbinagon ang pagpangabay sadtong inyo ginatudloan nga isulat kon ano ang ila ginapasalamatan—agud buligan sila nga madumduman ang mga bugay nga ila nabaton, makilala ang mga bugay sa karon, kag magpaabot sang mga bugay sa palaabuton.
Sarang n’yo man paisogon yadtong inyo ginatudloan nga sundon ang halimbawa ni Pangulong Eyring sa pagpangabay sa Amay nga Langitnon nga itudlo sila sa isa nga sarang nila mabuligan ukon maalagaran.