Mensahe sa Visiting Teaching, Disyembre 2011

Isa ka Dako nga Ikasarang sa Pagbuhat

Tun-i ining materyal kag, sa nagakaigo, hambali ini upod sang mga sister nga inyo ginabisita. Gamita ang mga pamangkot agud buligan kamo sa pagpabakod sang inyo mga sister kag himuon ang Relief Society nga aktibo nga bahin sang inyo kaugalingon nga kabuhi.

Pagtuo, Pamilya, Bulig

Ang Ginuo, Iya Simbahan, mga pamilya, kag mga komunidad nagakinahanglan sang impluwensya sang matarong nga mga babayi. Sa pagkamatuod, si Elder M. Russell Ballard sang Korum sang Napulo’g Duha ka mga Apostoles nagtudlo nga, “ang tagsa ka sister sa sining Simbahan nga naghimo sang mga kasugtanan sa Ginuo may diosnon nga mando sa pagbulig luwas sang mga kalag, sa paggiya sang kababayin-an sang kalibutan, sa pagpabakod sang mga puluy-an sang Sion, kag sa pagpasad sang ginharian sang Dios.”¹

Ang pila sang mga sister mahimo maghunahuna kon sarang nila lab-oton ang amo katayog nga mga tinutuyo. Apang subong nga si Eliza R. Snow (1804–87), ika-duhang pangkabilugan nga pangulo sang Relief Society, nagpaathag, “Wala sing sister nga tuman nga nagaisahanon, kag ang iya ikasarang nga tuman ka limitado nga wala sia masyado sing mahimo sa pagpahamtang sang Ginharian sang Dios sa duta.”² Si Sister Snow nagtudlo man nga ang Relief Society gin-organisar “para sa katumanan sang tagsa ka maayo kag dungganon nga buluhaton.”³

Ang pagpartisipar sa Relief Society nagapadako sang aton mga ikasarang sa pag-impluwensya paagi sa paghatag sa tagsa ka sister sang mga oportunidad sa pagpatubo sang pagtuo, sa pagpabakod sang mga pamilya kag mga puluy-an, kag sa paghatag sang serbisyo alangay sa puluy-an kag sa bug-os nga kalibutan. Kag mapalaron kita nga ang aton mga pagpangabudlay bilang mga indibidwal kag bilang mga Relief Society indi kinahanglan mangin dako kag makahalawhaw, kundi ang mga ini dapat mangin mahunahunaon kag masaligan. Ang matarong nga mga panggawi subong sang adlaw-adlaw nga personal kag pang-panimalay nga pangamuyo, adlaw-adlaw nga pagtuon sang balaan nga mga kasulatan, kag dalayon nga pagpatin-ad sang mga calling sa Simbahan magabulig sa pagdugang sang pagtuo kag pagpasad sang ginharian sang Ginuo.

Sa mga sister nga nagahunahuna kon ining daw magamay nga mga kontribusyon nagahimo sang kinalain, si Elder Ballard nagapahayag: “Ang tagsa ka sister nga nagatindog para sa kamatuoran kag pagkamatarong nagabuhin sang impluwensya sang kalainan. Ang tagsa ka sister nga nagapabakod kag nagaamlig sang iya pamilya nagahimo sang buluhaton sang Dios. Ang tagsa ka sister nga nagapangabuhi bilang isa ka babayi sang Dios mangin isa ka nagagiya nga kasanag agud sundon sang iban kag nagatanom sang mga liso sang matarong nga impluwensya nga pagaanihon sa maabot nga mga dekada.”⁴

Gikan sa Balaan nga mga Kasulatan

1 Mga Taga-Corinto 12:4–18; 1 Timoteo 6:18–19; Mosias 4:27; Mga Artikulo sang Pagtuo 1:13

Gikan sa Aton Kasaysayan

Si Eliza R. Snow, nga nag-alagad bilang sekretarya sang ang Relief Society gin-organisar sa Nauvoo, gintawag ni Pangulong Brigham Young (1801–77) agud magbiyahe sa bug-os nga Simbahan nga ginabuligan ang mga bishop sa pag-organisar sang Relief Society sa ila mga ward.

Si Sister Snow nagtudlo: “Kon ang bisan sin-o sa mga anak nga babayi kag mga iloy sa Israel nagabatyag nga medyo limitado sa ila karon nga ikasarang sa pagbuhat, ila na karon masalapuan ang supisyente nga ikasarang para sa tagsa ka gahum kag kapasidad para sa paghimo sang maayo sa diin sila labi gid nga nadulotan. … Si Pangulong Young nagliso sang yabi para sa mas dako kag masangkad nga ikasarang sa pagbuhat kag kapuslanan.”⁵

© 2011 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/10. Petsa sang pagtugot sa paglubad: 6/10. Paglubad sang Visiting Teaching Message, December 2011. Hiligaynon. 09772 861

Ano ang Sarang Ko Mahimo?

Paano ko mabuligan ang mga sister nga akon ginabisita nga makilala kag magbuhat sa ila ikasarang nga mangin isa ka matarong nga impluwensya?
Paano ko magamit ang akon pinasahi nga mga dulot kag mga talento sa pagpakamaayo sang iban?