Pweng luhn Prestuhnsi Se Met, Tisacmpuh 2011
Sulaclah se in Sruikihn
Pahpah tuhmasr Inkuhsrao El sapkihn nuh sesr in sang kulo in ma nukwewa (liye 1 Mwet Tessalonika 5:18), ac El enenuh kuht in sang kuloh nuh ke mwe insewowo ma kuht eis uh (liye D&C 46:32). Kuht etuh lah masap Lal nuh kwewa pa in oruh kuht in engan, ac kuht etuh pac lah kuhnahoslah masap uh orwaclah inse koluk uh.
Na in engan ac in kahingkihn inse koluk uh, enenuh in oasr srui luhn insiyacsr. Kuht liye ke moul lasr uh kuhpahsr se inmahsrlon tarilacna ac engan. Kuht nuh kwewa enenuh in puhla tarilac, tuh tiac na fihsracsr in sruikihn ma nuh kwewa in pacl nuh kwewa ke ma upac luhn moul uh. Mas, inse koluklac, ac wacngihnlac luhn mwet kuht luhngse uh tuhkuh ke kuhtuh pacl ke moul lasr uh. Ahsor lasr uh kuh in ahkupacye in liye mwe insewowo lasr uh ac in engankihn mwe insewowo God El ac sang nuh sesr nuh ke pacl fahsruh uh.
Ma na upac se in oek mwe insewowo lasr uh ke srihpen kuht pahlah na in luksei in eis ma wo uh. Ke wacngihnlac lohm sesr, mongo, kuh luhngse luhn kawuck ac sucu lasr uh, kuht akihlen luhpan srui enenuh in oasr lasr ke ma inge oasr lasr ah.
Yohkiyac uh na, kuhtuh pacl uh upac nuh sesr in oasr sruikihnyacn mwe sang luhlahp kuht eis uh: isuslac luhn Jisus Kraist, Iwaclah Lal, olwelah luhn moulyak, pacl wowo in engankihn moul ma pahtpaht yurin sucu lasr uh, Fohlohkyak luhn wosasuc weacng pristut ac ki la an. Kahsruh luhn Nguhn Muhtahl muhkwena pa kuh in oruh kuht in puhla kalmeyacn mwe insewowo uh nuh sesr ac nuh selos suc kuht luhngse. Ac in pacl sacn pa kuht finsrak in kulohkihn ma nuh kwewa ac eslah ahktoasr nuh sin God ke tiac tarilac uh.
Kuht enenuh in siyuck ke pruhe lah God, ke kuh luhn Nguhn Muhtahl, fah kahsrwekuht liye in kahlwem mwe insewowo lasr ke infulwacn ma upac lasr uh. El kuh in kahsrwekuht ke kuh luhn Nguhn in akihlen ac sruikihn mwe insewowo ma kuht luksei uh. Ma kahsrweyuck yohk uh pa in siyuck sin God ke pruhe, “Kom kuh in nuhnak muhnahs kolyuc nuh yurin sie mwet nga kuh in kahsruh nuh Yurum?” In kahsruh God ahkinsewowoye mwet sahyac oruh nga kuh in liye wo mwe insewowo luhk sifacna uh.
Pruhe luhk uh tuh topukyucklac ke siacnyacn se ma nga tiac etuh met suliyuc in som nuh lohm ono ah. Nga liyacack kihtin ahwowo na srihsrihk se ma luhpan na lun pouk. Ke wik ekahsr emet ke moul lal ah, el laslas pacl puhkantwen. Taktuh ah fahk nuh sin pahpah ninac kiyacl ah lah oasr pac laslas upac enenuh in orek nuh ke at ac ahlollol lal ah in ahkkweye moul luhn kihtin tuhlihk se nuhtin God ah.
Ke nguhsr luhn pahpah ninac kiyacl ah, nga sang nuh sin tuhlihk sac mwe insewowo luhn pristut. Mwe insewowo weacng olwelah se ke moul sac in tuhtahflah. Yohk liki na sang se ke mwe insewowo uh, nga sifacna eis mwe insewowo sac ke insiyac yohk tarilac la se.
Ke kahsruh luhn Pahpah tuhmasr, kuht nuh kwewa kuh in sulaclah in puhla yohk srui uh. Kuht kuh in siyuck Sel in kahsrwekuht in liye wo mwe insewowo lasr uh, pacl nuh kwewa luhn ohiyac sikyak nuh sesr uh. Nga sruikihn ke lwen sac, ke nga soenna puhla met usrnguckiyacn orekma luhn at ac ahlollol luhk sifacna uh. Nga sang kuloh ke nga kahsruhsr som nuh lohm sihk ac ke mwe insewowo nuh sin tuhlihk nuhtihk ma nga kuh in liye wo ke usrnguck luhn kuhlwacng sin God ac sin mwet wowo raunweltahlwek uh.
Inkaiyacn pacl uh, nga puhla srui ke ma kahlwem ke Iwaclah ma orekma ke moul lalos pahpah ninac ma elyah ac in moul luhk uh. Nga liye finsrak ac luhngse pwacye luhn Kraist srweyac muhtahltahl, finne nuh ke ma upac yohk lalos. Ac nga puhla ma sikyak kom kuh in puhla kom fin siyuck God lacn ahkkahlwemye nuh sum lah Iwaclah uh kuh in lwelah nuh sum finsrak ac luhngse.
Kuht nuh kwewa kuh in oruh sulaclah uh in sang kuloh ke pruhe ac in siyuck sin God ke inkacnek in kuhlwacnsapuh mwet sahyac nuh Sel—yohkna nuh ke pacl se inge ke yac uh ke kuht ahkfuhlwactye isuslac luhn Mwet Lahngo uh. God Pahpah El sang nuh sin Wen Nahtuhl, ac Jisus Kraist El use nuh sesr Iwaclah, mwe sang yohk liki nuh kwewa ac sang nuh kwewa (liye D&C 14:7).
Sang kuloh ke pruhe uh kuh in lwelah kuht in liye kuhiyacn mwe insewowo inge ac mwe insewowo nuh kwewa lasr sahyac ac oacyacpac nuh ke eis mwe sang ke insiyac yohk srui la se.
© 2011 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/10. Ahkkweyeyucklac ke lweng: 6/10. Lwenglah luhn First Presidency Message, December 2011. Kosraean. 09772 868
Luti ke Pweng Se Inge
Suhmuhslah puhla lasr ac mwe insewowo lasr uh kuh in kahsrwekuht in esam kac ac use sie ma kuht in liye kac. Nuhnkuh kom in siyuck selos suc kom luti an in suhmuhslah ma elos sruikihn an—in kahsrwelos esam mwe insewowo elos eis tari an, akihlen mwe insewowo in pacl inge uh, ac in tuhpanwacng mwe insewowo nuh ke pacl fahsruh uh.
Kom kuh pac in ahkkweyaclos suc kom luti an in ukwe mwe srihkasrak lal Prestuhn Eyring in siyuck sel Pahpah Lucng in kohlohlos nuh sin sie mwet elos kuh in kahsruh kuh kuhlwacnsapuh.