Ennaan eo an Būreejtōnji eo Kein Kajuon, Tijem̧ba 2011
Jokālōt eo n̄an Kwaļo̧k Kam̧m̧oolol
Jemādwōj Ilan̄ ej kean̄ kōj n̄an kam̧m̧oolol ilo men ko otemjej (lale 1 Tessalonika 5:18), im Ej aikuj bwe jen leļo̧k kam̧m̧oolol ko kōn kōjeram̧m̧an ko jej būki (lale D&C 46:32). Jejeļā bwe aolep kien ko An rej unleplepier n̄an kōm̧m̧an bwe jen m̧ōņōņō, im jej barāinwōt jeļā bwe kakkuri kien ko rej tōl ļo̧k n̄an būrom̧ōj.
Innām bwe n̄an m̧ōņōņō im n̄an kōjekdoon būrom̧ōj, ej aikuj wōr ippād juon būruwōn kam̧m̧oolol. Em̧ōj ad loe ilo mour ko ad eketaak eo ikōtaan kam̧m̧oolol im m̧ōņōņō. Kōj wōj aolep naaj kōņaan en̄jake kam̧m̧oolol, kiiō menin ejjab pidodo n̄an kwaļo̧k kam̧m̧oolol aolep iien ilo men ko otemjej ilo mālijjon̄ ko an mour. Nan̄inmej, inepata, im jako an armej ro jej iakwe ej itok ilo iien ko ilo mour ko ad. Būrom̧ōj ko ad rej kōm̧m̧an bwe men in en pen n̄an lo kōjeram̧m̧an ko ad im n̄an kile kōjeram̧m̧an ko Anij em̧ōj an kōpooji n̄an kōj ilju im jekļaj.
Menin ej juon kōttōpar n̄an bwini kōjeram̧m̧an ko ad kōnke ewōr ippād juon m̧wil n̄an būki men ko rem̧m̧an ilo an ejjeļo̧k ļōmņak ak kam̧m̧oolol. N̄e ejako juon im̧ōd em̧, m̧ōn̄ā n̄an kan̄e, ak ro m̧ōttad raorōk im baam̧le, jej kile kōjkan kam̧oolol eo enaaj kar ippād n̄e ren kar pād ippād.
Eļaptata, jet iien epen n̄an kōj n̄an lukkuun kwaļo̧k kam̧m̧oolol kōn menin letok ko reļļap jej būki: ļotak eo an Jisōs Kraist, Pinmuur eo An, kalim̧m̧ur eo an jerkakpeje, iien eo em̧m̧an n̄an lan̄lōn̄ kōn mour indeeo ippān baam̧le ko ad, Jepļaaktok eo an ko̧jpeļ eo ippān priesthood im kii ko an. Jipan̄ eo wōt jān Jetōb Kwojarjar eo, jemaron̄ in jino en̄jake ta meļeļein kōjeram̧m̧an kein n̄an kōj im n̄an ro jej iakwe. Innām menin wōt jemaron̄ ke kōjatdikdik n̄an kwaļo̧k kam̧m̧oolol ilo men ko otemjej im joļo̧k jab kam̧m̧oolol, eo ej kalluik Anij.
Jej aikuj kajjitōk ilo jar bwe Anij, kōn kajoor eo an Jetōb Kwojarjar, naaj jipan̄ kōj lukkuun kōjeram̧m̧an ko ad iien eo jej jelm̧ae mālijjon̄ ko ad. Emaron̄ jipan̄ kōj kōn kajoor eo an Jetōb eo n̄an kile im kwaļo̧k kam̧m̧oolol kōn kōjeram̧m̧an ko jej būki im jab lukkuun ļōmņak kaki. Ta eo eļaptata ej jipan̄ eō ej n̄an kajjitōk ippān Anij ilo jar, “Kwonaaj ke jouj tōl ļo̧k eō n̄an juon armej imaron̄ jipan̄e kōn jipan̄ eo Am?” Menin ej ilo jipan̄ Anij kōjeram̧m̧an ro jet bwe elukkuun alikkar ļo̧k Aō lo kōjeram̧m̧an ko aō make.
Jar eo aō ekar uwaak juon iien ke ruo ripālele ikar jab jeļā kajjeer m̧okta kar karuwaineneik ļo̧k eō n̄an etal n̄an juon aujpitōļ. Ijo ikar lo juon nin̄nin̄ jidikdik elukkuun dik eo emaron̄ jon̄an wōt peiū. Ilowaan wōt jejjo wiik ko in an mour, ekar jelm̧ae ruo iien m̧wijm̧wij ko. Takto ro rekar jiron̄ ļo̧k jinen im jemān bwe m̧wijm̧wij eo eļap ļo̧k an pen naaj lukkuun aikuj n̄an menono eo im ār ko n̄an leļo̧k mour ippān nin̄nin̄ jiddikdik in nejin Anij.
Ilo kajjitōk eo an jinen im jemān, ikar leļo̧k n̄an nin̄nin̄ eo juon kōjeram̧m̧an an priesthood. Kōjeram̧m̧an eo me ekitbuuj juon kalim̧m̧ur an mour eo eaitok ļo̧k. Eļap ļo̧k jen leļo̧k juon kōjeram̧m̧an, ikar bōk kōjeram̧m̧an ippa make kōn juon būruwōn kam̧m̧oolol eļap ļo̧k.
Kōn jipan̄ eo an Jemād, aoleped wōj maron̄ kālōt n̄an eļap ļo̧k kam̧m̧oolol. Jemaron̄ kajjitōkin E n̄an jipan̄ kōj lukkuun lo kōjeram̧m̧an ko, mekarta jekjek rot ko ippād. N̄an n̄a raan ņe, Ikar lukkuun kam̧m̧oolol āinwōt ijjan̄in kar kōm̧m̧ane m̧okta bwilōn̄ kōn an menono eo im ār ko ārrū jerbal. Iaar leļo̧k kam̧m̧oolol ko ilo iaļ eo aō n̄an m̧weo kōn kōjeram̧m̧an ko n̄an ajri ro nejū bwe imaron̄ lukkuun kar lo kabwilōn̄lōn̄ ko kōn jouj jān Anij im jān armej ro rem̧m̧an ipeļaakier.
Eļap tata, ikar en̄jake kam̧m̧oolol kōn kam̧ool an Pinmuur eo ej jerbal ilo mour ko an jabdewōt jinen im jemān ro eļap aer kōņaan im ilo n̄a. Iar lo kōjatdikdik im iakwe eo erreo an Kraist ej romaak ilo turin mejāer, aaet men̄e ilo iien mālijjon̄ ko aer renana. Im ikar en̄jake kam̧ool eo komaron̄ in en̄jake eļan̄n̄e kwoj kajjitōk ippān Anij n̄an kwaļo̧k n̄an eok bwe Pinmuur eo emaron̄ kōtļo̧k eok n̄an en̄jake kōjatdikdik im iakwe.
Kōj aolep maron̄ kōm̧m̧an jokālōt eo n̄an leļo̧k kam̧m̧oolol ko ilo jar n̄an kajjitōk ippān Anij n̄an tōl n̄an jerbal n̄an ro jet kōn E—eļap tata ilo iien in ilo iiō in n̄e jej kaiboojoj ļotak eo an Rilo̧mo̧o̧r eo. Anij Jemād ekar letok Nejin, im Jisōs Kraist ekar letok n̄an kōj Pinmuur eo, eo eļap tata iaan aolep menin letok ko (lale D&C 14:7).
Leļo̧k kam̧m̧oolol ko ilo jar emaron̄ kōtļo̧k kōj n̄an lo jon̄an ļap in kōjeram̧m̧an kein im aolep kōjeram̧m̧an ko im innām bōk menin letok eo an juon būruwōn kam̧m̧oolol eļap.
© 2011 jen Intellectual Reserve, Inc. Aolep jim̧we rej pād ippān. Jeje ilo Amedka. Kōmālim ilo kajin English: 6/10. Kōmālim Ukook eo: 6/10. Ukook eo an First Presidency Message, December 2011. Marshallese. 09772 874
Katakin jān Ennaan In
Je en̄jake ko ad im kōjeram̧m̧an ko me remaron̄ jipan̄ kōj kememej er im letok n̄an kōj jet men ko n̄an bar lali. Ļōmņak im kajjitikin jabdewōt eo kwoj katakin n̄an je ta ko rej kam̧m̧oolol kaki—n̄an jipan̄ er kememej kōjeram̧m̧an ko rekar būki, kile kōjeram̧m̧an ko kiiō, im reilo̧k n̄an kōjeram̧m̧an ko an ilju im jekļaj.
komaron̄ barāinwōt rōjan̄ jabdewōt eo kwoj katakin n̄an ļoor waanjon̄ak eo an Būreejtōn Eyring ilo kajjitōk ippān Jemādwōj Ilan̄ n̄an tōl er n̄an juon armej er remaron̄ jipan̄ e ak jerbal n̄ane.