Klumech ra First Presidency, Ongeteruich ma Ongerung el Buil 2011
Melilt el Mo Oureng a Saul
A Demad er a Babeluades a mla kmung er kid me bo doureng a saul er a rokui el tekoi (mesang a 1 Thesalonika 5:18), el dirrek el Ngii a mengerechir er kid el mo oureng a saul el kirel a klengeltengat el dengai (mesang a D&C 46:32). Kede medengei el kmo a rokui el Llechul a di kirel a deourreng el mei er kid, e kid a dirrek el medengei el kmo sel lak doltirakl a llechul eng mo uchul a klengit el reng.
A mo ngara deourreng e mo cheroid er a klengit el reng, eng kirel mo er ngii omereng el saul er a rengud. Kede mla mesang er a chelsel a klengar kid a rael ra delongelel omereng el saul ma deourreng. Kid el rokui el soad el mo ngara omereng el saul, eng di ng diak el beot el bo de blechoel mereng a saul ra rokui el tekoi er a chelsel aikel ringel er a klechad. A secher, ringel, ma kodall er a rebetik er a rengud a duubech er a chelsel a klengar kid. A klengit el reng el de ngara chelsel a rullii meng mo meringel er kid el mereng a saul el kirel aikel klengeltengat el Dios a mla kudmokl el kired er a ngara medad.
Ng meringel el domechur a klengeltengat ele ngarngii a kse er kid el diak desal omtab aikel ungil tekoi el ngarngii er kid. Sel bo lak a delengchekled, kall el dongang, malechub a ungil deleuill er a resechelid ma rechad er a telungalk er kid, e kid a mo medengei el kmo ng mle kired el mereng a saul el kirel aikaikid.
E sel kmal ngaruchei, ea lebebil er a taem eng diak desal mereng a saul el kirel aikel kot el meklou el sengk el dengai: cherellel a Jesus Kristo, Tngakireng er Ngii, yaksok er a okiis er a kodall, me a techall el bo dedak el telungalk el ngara diak a ulebengelel klengar, Olutel ebangkelio lobengkel a kiis er a priesthood. Ng di sel dultuil er a ngelseuil Chedaol Reng e kid a mo sebeched el mo omelchesiu a belkul aikaikid el klengeltengat el mei er kid me tirkel betik er a rengud. Me ngokiu tiaikid e kid a sebeched el mo mereng a saul er a rokui el tekoi meng diak de temellii a rengul a Dios el diak doureng a saul a uchul.
Ng kired el mo ngara nglunguuch el olengit er a Dios, lokiu a klisichel Chedaol Reng, me lengesukid el mo ungil mes a klengeltengat el uldimukl a dengara chelsel a ringel. Ngii a sebechel ngosukid lokiu a klisichel a Reng me kede mtab e mo mereng a saul er aikel klengeltengat el ngii a diak er a rengud. Sel kot el ngaruchei el mla ngosukak a oker er a Dios lokiu a nglunguuch, “Kau Ng Diak mokrolak el mora kmong techang el sebechek el ngoseuir el Kirem?” Me ngokiu sel dolngeseu er a Dios el omekngeltengat er a rebebil ea kmla mes aikel kuk klengeltengat el mei er ngak.
Ng mle tal knguu a nger er a nglunguchek er a tal diak kudengelterir lobekel er a lolengit er ngak el mora ospitar. Tiaikid eak milsang a kekerei el tolechoi el ngalek el kmal iimis el kekerei el sebechek el telekoel er ngii er a chimak. El chelsel aikal sesei el sandei er a klengar ngii, eng kmal betok el botk a blal leborngii. A retoktang a mla subedeterir a rechad er a blil el kmo a lmuut el chetituokel el botk a kirel mor ngii meng mo sebechel a chaidirengul me a olmedel el oureor er a klengar er ngikal kekerei el ngelekel a Dios.
Me ngultuil er ongterir a rechad er a blil, eak milsang ngikal ngalek a klengeltengat er a priesthood. Tial klengeltengat a mle uldimukl er ngii a yaksok el komengetii a klengar ngii. E sel ngaruchei er tial klengeltengat, e ngak a ngiluu a klengeltengat el mlo klou omereng el saul er a chelsel a renguk.
Ngultuil er a ngesou er a Demad, e kid el rokui a sebeched el melilt el mo ngara omereng el saul. Ng sebeched el olengit er Ngii me ngosukid el bleketakl el mes a klengeltengat, er a chelsel a ngii dil teletael er a klengar el dengarngii. Tiaikid el sils, ea kmal mlo ngara omereng el saul el kirel a ongasireng el urerel a chaidirenguk me a olmedek. A kurolang el mo remei ea kuluureng a saul el kirel a klengeltengat el mora rengelekek meng sebechek el mo bleketakl el mes ongasireng el blekokeuii er a Dios ma rungil chad el ngara bitar tir.
E sel kmal ngaruchei, eak mlo omelchesuar a belkul a Tngakireng sel oureor er a klengar tirkal suebek a rengrir el chedam ma chedil me ngak. Ak milsang sel urungulir ma bliochel el beltik el reng er a Kristo er osengir, luldimukl er tial taem er a ringel. E dirrek el mlo melchesuar olchotel el kmo kau meng sebechem el mo melchesuar alsekum e kolengit er a Dios me ngochotii el kmo a Tngakireng a sebechel ngosukau el mo melchesuar a beltik el reng.
Kid el rokui el sebeched el melilt el mo oureng a saul lokiu a nglunguuch e olengit er a Dios meng mekrolid el mo olngeseu er a rebebil Kirel—oumesingd er ngii tiaikid el taem er chelechal rak el doldeu er a cherellel Osobel. A Dios el Chedam a uldureklii a Ngelekel Sechal, ea Jesus Kristo a milskid a Tngakireng, el ngii a kot el ngarbab er a rokui el sengk me a ikel rokui el dengai (mesang a D&C 14:7).
Me sel doureng a saul lokiu a nglunguuch eng ngosukid el mes a iidisel aikal klengeltengat ma ikel rokui el klengeltengat el dengai meng mo sebeched el nguu a sengk er a omereng el saul.
© 2011 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/10. Kengei er a oidel: 6/10. Oidel a First Presidency Message, December 2011. Palauan. 09772 881
Osischeklel Tial Klumech
Sel deluches aikel tekoi el mla duubech el mei er kid ma klengeltengat eng ngosukid el mo ngara omelbedebek e meskid a kmo ngerang el bo dolatk er ngii. Momdasou olengit er tirkal molisechakl er tir el mo lmuches aikel tekoi el tir oureng a saul el kirel—el mo ngosuterir el dobedebek aikel klengeltengat el bla lengai, e mtab aikel klengeltengat er chelechang, e mad el dmuil el kirel a klengeltengat er medad el taem.
Ng sebechem el omeksemeriar er tirkal molisechakl er tir el mo oltirakl er a okesiu er a President Eyring el mo olengit er a Chedam er a Babeluades el mo omekrael er tir el mora chad el sebecherir el ngoseuir.