Parau poro‘i na te Peresideniraa Matamua, Titema 2011
Te ma‘itiraa i te aau mehara
Ua faaue mai to Tatou Metua i te Ao ra ia tatou ia haamauruuru no te mau mea atoa (a hi‘o 1 Tesalonia 5:18) e ua titau Oia e ia haamauruuru tatou no te mau haamaitairaa ta tatou i farii (a hi‘o PH&PF 46:32). Ua ite tatou e, teie mau faaueraa atoa Ta’na, ua faataahia ïa no te faaoaoa ia tatou, e ua ite atoa tatou e, te ofatiraa i te faaueraa e arata‘i ïa te reira i te ati.
No reira, no te oaoa e no te ape i te ati, e mea ti‘a ia tatou ia vai te aau mehara. Ua ite tatou i roto i to tatou oraraa i te tuatiraa i rotopu i te aau mehara e te oaoa. Te hinaaro nei tatou tata‘itahi ia farii i te aau mehara, e ere râ i te mea ohie ia faaite tamau noa i te aau mehara no te mau mea atoa i roto i te mau tamataraa o te oraraa. Te ma‘i, te mauruuru ore, e te faaru‘eraa o te feia here, e tae mai ïa i te mau taime o to tatou oraraa. No to tatou oto, e ere i te mea ohie ia ite i ta tatou mau haamaita‘iraa e ia mauruuru i te mau haamaita‘iraa ta te Atua i e faaherehere nei no tatou no te mau tau i muri.
E tafifiraa te tai‘oraa i ta tatou mau haamaita‘iraa no te mea, e au e, e mea tau‘a ore rii tatou i te mau mea maitata‘i. Ia mo‘e ana‘e râ i te tafare i ni‘a a‘e i to tatou upoo, te maa no te amu, aore râ te mahanahana o te mau hoa e te utuafare, e feruri ïa tatou e, ahani ihoa tatou i mauruuru i te mea ta tatou i fana‘o na.
E rahi roa’tu, i te tahi mau taime e ere i te mea ohie no tatou ia mauruuru maita‘i i te mau horo‘a rahi o ta tatou i farii : te fanauraa o Iesu Mesia, Ta’na Taraehara, te fafauraa no te ti‘a-faahou-raa, te rave‘a no te farii i te ora mure ore e to tatou utuafare, e te faaho‘i-raa-hia mai i te evanelia e te autahu‘araa e to te reira mau taviri. Na roto noa i te tauturu a te Varua Maitai tatou e haamata ai i te ite i te auraa mau o teie mau haamaita‘iraa no tatou e no te feia ta tatou e here nei. E i reira noa tatou e nehenehe e haamata ia haamauruuru no te mau mea atoa e ia haapae i te haamauiui i te Atua no te aau mehara ore.
E mea ti‘a ia ani tatou i te Atua na roto i te pure, na roto i te mana o te Varua Maitai, ia tauturu mai ia tatou ia ite maramarama maita‘i i ta tatou mau haamaita‘iraa noa’tu ta tatou mau tamataraa. E nehenehe Ta’na e tauturu ia tatou na roto i te mana o te Varua ia ite e ia mauruuru no te mau haamaita‘iraa o ta tatou i ore i tau‘a. Te mea o tei tauturu rahi ia’u o te aniraa ïa i te Atua na roto i te pure, « A arata‘i mai na Oe ia’u i te taata ta’u e tauturu atu no Oe ? » Na roto i te tautururaa i te Atua i te haamaita‘i ia vetahi ê i ite ai au i ta’u iho mau hamaita‘iraa.
I te hoê taime, ua pahonohia ta’u nei pure na roto i te titauraa manihini a te hoê nau taata faaipoipo ia haere i te fare ma‘i, aita ho‘i au i matau ia raua. I reira ua ite atura vau i te hoê aiû tamahine na‘ina‘i roa, e riro e, e ô roa oia i roto i to’u nei apu rima. Na roto noa i te tahi tau hepetoma no te ora, ua farii oia e rave rahi mau tapuraa. Ua parau te mau taote i na metua e, e hinaarohia i te hoê tapuraa fifi roa no te mafatu e te mahaha no te tape‘a i te ora i roto i te tino o taua tamarii iti a te Atua.
I te aniraa a na metua, ua horo‘a vau i te aiû i te hoê haamaita‘iraa autahu‘araa. Tei roto i te haamaita‘iraa i te hoê fafauraa no te hoê ora maoro. Hau atu i te horo‘araa i te hoê haamaita‘iraa, ua farii au i te haamaita‘iraa no te hoê aau mehara hau atu.
E te tauturu a to tatou Metua, e nehenehe ta tatou paatoa ia ma‘iti ia farii i te aau mehara hau atu. E nehenehe ta tatou ia ani Ia’na ia tauturu mai ia tatou ia ite maramarama maita‘i i ta tatou mau haamaita‘iraa, noa’tu te huru o to tatou oraraa. No’u i taua mahana ra, ua faahiahia roa vau i te semeio o to’u iho mafatu e te mau mahaha o te maita‘i nei. I to’u ho‘iraa, ua haamauruuru noa vau i te mau haamaita‘iraa o ta’u mau tamarii, o ta’u ïa i hi‘o na mai te semeio o te maita‘i no ô mai i te Atua e te mau taata e ati nei ia ratou rai.
Hau atu râ ua farii au i te aau mehara no te papû o te ohipa o te Taraehara i roto i te oraraa o na metua i roto i te pe‘ape‘a ra e i roto i to’u iho nei oraraa. Ua ite au i te ti‘aturi e te here mau o te Mesia e anaana ra i ni‘a i to ratou hoho‘a mata, noa’tu te mau tamataraa hanohano. E ua farii au i te aau i te papû e nehenehe e tae mai na roto i te aniraa i te Atua ia heheu mai i te ti‘aturi e te here no roto mai i te Taraehara.
E nehenehe ta tatou paatoa ia haamauruuru na roto i te pure e ia ani i te Atua i te arata‘iraa no te tavini ia vetahi ê ei mono No‘na—i teie ihoa râ tau o te matahiti no te faahanahanaraa i te fanauraa o te Faaora. Ua horo‘a te Atua te Metua i Ta’na Tamaiti, e ua horo‘a Iesu Mesia i te Taraehara no tatou, te horo‘a rahi a‘e o te mau horo‘araa atoa (a hi‘o PH&PF 14:7). Na te pure haamauruururaa e faati‘a
ia tatou ia ite i te aano o teie mau haamaita‘iraa e te tahi atu o ta tatou mau haamaita‘iraa atoa, e na roto i te reira e farii tatou i te horo‘a o te hoê aau mehara hau atu.
© 2011 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/10. Parau faati‘a no te iritiraa : 6/10. Iritiraa no First Presidency Message, December 2011. Tahitian. 09772 895
Haapiiraa no roto mai i teie parau poro‘i
Papa‘i i to tatou mau iteraa rau e o te mau haamaita‘iraa, na te reira e tauturu ia tatou ia haamana‘o noa i te reira e ia hi‘o pinepine atoa. A opua i te ani i te feia ta outou e haapii ra ia papa‘i i te mea ta ratou e mauruuru nei—no te tauturu ia ratou ia haamana‘o i te mau haamaita‘iraa ta ratou i farii, ia ite mai i te mau haamaita‘iraa i teie nei, e ia oaoa no te mau haamaita‘iraa i muri nei.
E nehenehe atoa ta outou e faaitoito i te feia ta outou e haapii ra ia pee i te hi‘oraa o te Peresideni Eyring na roto i te aniraa i te Metua i te Ao ra ia arata‘i ia ratou i te hoê taata o ta ratou e nehenehe e tauturu e aore râ e tavini.