Parau poro‘i na te mau tuahine hahaere, Titema 2011
Hoê vahi ohiparaa aano
A tai‘o i teie haapiiraa, e mai te mea e tano, a aparau i te reira i te mau tuahine o ta outou e hahaere ra. A faa‘ohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa.
Te Faaroo • Te Utuafare • Te Totauturu
E hinaaro te Fatu, Ta’na Ekalesia, te mau utuafare e te mau pŭpŭ taata i te faaûruraa o te mau vahine parau-ti‘a. Oia nei, ua haapii o Elder M. Russell Ballard no te Pŭpŭ no te Tino Ahuru ma Piti Aposetolo e « te mau tuahine atoa i roto i teie Ekalesia tei rave i te mau fafauraa e te Fatu, e tonoraa hanahana ïa ta ratou no te tauturu i te faaora i te mau varua, no te arata‘i i te mau vahine o te ao nei, no te haapuai i te mau utuafare no Ziona, e no te patu i te basileia o te Atua ».1
E mana‘o vetahi mau tuahine e nehenehe anei ta ratou e faaoti i teie huru opuaraa faahiahia. Mai ta Eliza R. Snow (1804–87), te piti o te peresideni rahi o te Sotaiete Tauturu, i faataa, « Noa’tu tei te hiti oia, e noa’tu te iti o to’na anaana, e nehenehe ta te tuahine hoê e faatae i te maita‘i rahi i te paturaa i te Basileia o te Atua i te fenua nei ».2 Ua haapii atoa te tuahine Snow e, ua faati‘ahia te Sotaiete Tauturu « no te faaotiraa i te ohipa maita‘i atoa e te faahiahia ».3
E faarahi te ohiparaa i roto i te Sotaiete Tauturu i to tatou anaana na roto i te horo‘araa i te tuahine tata‘itahi i te mau rave‘a no te patu i te faaroo, no te haapuai i te mau utuafare e te mau nohoraa e no te horo‘a i te taviniraa i te fenua iho e na te ao nei. E aua‘e, aita ta tatou mau tautooraa ei tuahine e ei Sotaiete Tauturu e ti‘a i te riro i te mea rahi roa e te teimaha, ia ti‘a râ i te riro i te mea tano e te tu‘ati. Te mau ohipa parau-ti‘a mai te pure o te taata iho e te pure utuafare, te tuatapaparaa i te mau papa‘iraa mo‘a i te mau mahana atoa, e te rave-tamau-raa i te mau piiraa i roto i te Ekalesia, e tauturu ïa te reira i te faarahi i te faaroo e i te patu i te basileia o te Fatu.
No te mau tuahine o te uiui nei e horo‘a mai anei teie mau titauraa iti i te maita‘i, ua haapapû o Elder Ballard e : « Te tuahine tata‘itahi o te ti‘a nei no te parau mau e te parau-ti‘a, ua faaiti ïa i te faaûruraa o te ino. Te tuahine tata‘itahi o te haapuai nei e o te paruru nei i to’na utuafare, te haa ra ïa i te ohipa a te Atua. Te tuahine tata‘itahi o te ora ra mai te hoê vahine no te Atua, te riro nei ïa oia ei hoê mori no vetahi ê ia pee e te tanu atoa nei oia i te mau huero no te faaûruraa ti‘a e ootihia ia ma‘iri a‘e na ahururaa o te matahiti ».4
No roto mai i te mau Papa‘iraa mo‘a
1 Korinetia 12:4–18 ; 1 Timoteo 6:18–19 ; Mosia 4:27 ; Te Mau Hiro‘a Faaroo 1:13
No roto mai i to tatou aamu
Eliza R. Snow, o tei tavini na ei papa‘i parau a haamauhia ai te Sotaiete Tauturu i Nauvoo, tei piihia e te Peresideni Brigham Young (1801–77) no te ratere na roto i te Ekalesia, no te tauturu i te mau episekopo ia haamau i te Sotaiete Tauturu i roto i ta ratou paroita.
Ua haapii te tuahine Snow e : « Mai te mea te ite ra te hoê o te mau tamahine e te mau metua vahine e ua taoti‘a-rii-hia ratou i roto i to ratou iho oraraa, e ite ïa ratou i teie nei i te hoê hi‘oraa ateatea no te mau puai e te mau ite tata‘itahi no te rave i te maita‘i ta ratou i farii hua. … Ua faa‘ohipa te Peresideni Young i te taviri no te iriti i te hoê vahi aano e te ateatea no te ohiparaa e te haafaufaaraa ».5
© 2011 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/10. Parau faati‘a no te iritiraa : 6/10. Iritiraa no Visiting Teaching Message, December 2011. Tahitian. 09772 895
Eaha ta’u e nehenehe e rave ?
-
Nahea vau i te tauturu i te mau tuahine ta’u e hahaere ra ia ite atu e ia faa‘ohipa i to ratou aravihi no te riro ei hoê faaûruraa parau-ti‘a no vetahi ê?
-
Nahea vau i te faa‘ohipa i ta’u mau horo‘a e mau taleni no te haamaita‘i ia vetahi ê ?