Ne ʻIkai ha Meʻa ke Ma Kai
Estilita Chacin Hart, ʻIutā, USA
Ne u ʻā hengihengia hake ʻi he ʻaho kimuʻa he Kilisimasí mo hohaʻa he naʻe ʻikai haʻama meʻakai efiafi ki he pō Kilisimasi ko iá; pea ʻikai foki haʻama paʻanga ke fakatau ʻaki ha meʻakai. Ne u lolotonga nofo mo hoku tokoua ko ʻEtikaá ʻi Malakaipo, ʻi Venesuela.
ʻI heʻeku tuʻu hake mei mohengá, ne u tūʻulutui ʻo kamata fai ʻeku lotu. Ne u kole ki heʻeku Tamai Hēvaní ke manatuʻi muʻa kimaua. Ne u kole ange ke Ne ʻomai pē ā haʻama meʻakai ki he ʻaho makehe ko iá la Noche Buena (Efiafi kimuʻa he ʻaho Kilisimasí).
Ne u ongoʻi nonga ʻi heʻeku lotú. Hangē ne u fanongo ki ha leʻo naʻe pehē mai kiate aú, “ʻE lelei e meʻa hono kotoa. ʻOua naʻá ke hohaʻa.”ʻI he ʻosi ʻeku lotú, ne u ʻiloʻi ʻe hoko ha meʻa lelei he ʻaho ko iá.
ʻI he ʻosi ʻeku fafangu hoku tokouá, ne u ʻalu ʻo tafi e tafaʻaki fale ki muʻá. Ne sio mai e kaungāʻapi he tafaʻaki hala ʻe tahá peá ne haʻu ʻo ʻomai kiate au ha bolívares ʻe 1,000 ko e totongi ʻo ha tupenu ʻufiʻufi tēpile mo e ngaahi meʻa teuteu faka-Kilisimasi ne u tui maʻana. Naʻá ku ʻohovale he naʻe ʻikai ke u manatuʻi naʻe totonu ke ne totongi mai ha paʻanga kiate au.
Ne u lele ki he loki hoku tokouá ʻo fakaʻaliʻali ange e paʻanga ne u maʻú. Naʻá ne ʻohovale ʻo ʻeke mai pe naʻá ku maʻu ia mei fē. Ne u tali ange, “ʻOku faʻa fai ʻe he ʻOtuá ʻa e meʻa kotoa pē” (Mātiu 19:26).
Hili ha ngaahi miniti siʻi mei ai ne ma fanongo atu ki ha taha naʻá ne ui hoku tokouá mei tuʻa. ʻI heʻema ʻilo ko e kaungāʻapi tatau peé, ne ma hū atu ki tuʻa ke talanoa mo ia. Naʻá ne totongi ange ki hoku tokouá ha bolívares ʻe 1,000 ki he meʻa naʻá ne tuitui maʻana. Ne u fiefia lahi mo hoku tokouá he ʻe lava ʻeni ke ma fakatau ha meʻakai ki he kai pongipongí, hoʻataá, mo e kai efiafí.
ʻI heʻema foki mai mei he falekoloa meʻakaí, ne talitali ange hama kaumeʻa. Naʻá ne kole mai pe ʻe lava ke haʻu ke mau fakataha he la Noche Buena he naʻe ʻikai te ne fie nofo toko taha ia he Efiafi kimuʻa he Kilisimasí. Naʻá ma talaange naʻe siʻisiʻi pē ʻema meʻakai efiafí ka naʻá ma fiefia ke haʻu ke mau kai. Naʻá ne ʻomai ha bolívares ʻe 2,000 ke tokoni ki heʻemau meʻakai efiafí. Naʻe ʻikai ke ma meimei tui ki he fuʻu tāpuaki lahi kuo foaki ʻe he ʻOtuá maʻamauá.
Ne telefoni mai kimui hoku ʻilamutú ʻo talamai ʻe haʻu he pō ko iá mo ha kakanoʻi pulu pauni ʻe 33 (kk ʻe 15) kuó ne ʻosi fakavai soosi. Pea naʻe aʻu ange he hoʻataá hoku fakafotú mo hono malí mo ʻena fānaú. Naʻa nau kole mai pe ʻe lava ke nau ō mai he efiafi ko iá mo ha meʻakai ke mau fakamanatu ʻa e Efiafi kimuʻa he Kilisimasí.
Ne ma taliange, “He ʻikai ke fēfē fau ʻetau kai efiafí, ka ʻe ʻi ai e meʻakai feʻunga maʻá e tokotaha kotoa pē.”
ʻI he efiafi ko iá, naʻá ma taʻo mo ʻEtika ha moa, ngaohi mo e sālati pateta, hikingaua lēmani, mo e majarete, ko ha hikingaua puteni niu tukufakaholo, ʻa ia ne mau ifoʻia kotoa ai mo kinautolu naʻa nau ō angé. Ka naʻa mau ʻuluaki tuku ha fakamālō ki he Tamai Hēvaní koeʻuhi ko e ngaahi tāpuaki maʻongoʻonga kuó Ne foaki kiate kimautolú. Naʻe fakamanatuʻi mai ʻe he ʻaho ko ʻení kiate kimautolu kapau te mau tui pea ʻikai veiveiua, te Ne tāpuakiʻi kimautolu ʻi he taimi te mau kole ai ke Ne tokoni maí.