Tāpuekina e Kau Palesiteni Fakamisiona Foʻoú ʻi hono Moʻui ʻAki e Tuí
Naʻe fakaafeʻi ʻi Sune ha kau palesiteni fakamisiona foʻou ʻe toko 128 mo honau uaifí ki he MTC ʻi Polovo, ʻIutā, ʻAmeliká, ke maʻu ha fakahinohino kimuʻa pea nau mavahe atu ki honau uiuiʻí.
Naʻe pehē ʻe Palesiteni Tōmasi S. Monisoni ʻi hono fakaava e ako ʻaho ʻe fā, ne fai mei he ʻaho 22 ki he 26 Sune 2011, “Kuo fili kimoutolu mei he kau faivelenga taha ʻo e Siasí, pea ʻoku mou maʻu ʻeni e faingamālie ke laka atu ʻo kau he ututaʻú ʻi he ngoueʻanga ʻa e ʻEikí. … ʻOku ʻikai ke u ʻilo ha toe malaʻe ʻokú ne ʻomai ha ngoue lose ʻalaha manongi mo taʻefaʻalaua ʻe hangē ko e malaʻe ʻo e ngāue fakafaifekaú ʻa ia ʻoku uiuiʻi kimoutolu ki aí.”
ʻOku omi ha ngaahi hoa mali mei he tapa kehekehe ʻo e māmaní—fonua kehekehe ʻe 22—pea te nau ngāue ʻi he māmaní ʻi ha lea fakafonua kehekehe ʻe 18. ʻOku kehekehe honau puipuituʻá, ka ʻoku ʻi ai ha meʻa ʻoku nau faitatau ai.
ʻI he feilaulau ko ʻeni ʻa kinautolu ne toki uiuiʻi foʻou ko ha kau palesiteni fakamisioná mo honau ngaahi uaifí ke teuteu fakatuʻasino mo fakalaumālié, ʻoku meimei ke nau mamata leva ai ki he tāpuaki ʻo ʻenau moʻui ʻaki e tuí.
Fakahoko ʻo e Feilaulaú
ʻOku fakatou faingataʻa mo fakafiefia fakalaumālie ʻa e uiuiʻi ko ia ke ngāue ko ha palesiteni fakamisiona ʻi ha taʻu ʻe tolú. ʻI heʻenau tukupā ko ia ki he uiuiʻí ni, ʻoku lahi ha ngaahi hoa mali ʻoku nau kiʻi tuku fakatatali ai e moʻui ne nau ʻi ai kimuʻá, kau ai ʻenau ngaahi ngāue maʻuʻanga moʻuí mo e fāmilí.
ʻI he taimi ʻe niʻihi ko ha mole fakapaʻanga ia ʻa hono fakatatali ko ia ʻa e ngāue maʻuʻanga moʻuí. Neongo ʻoku ʻoange ʻe he Siasí ha kiʻi paʻanga feʻunga ke moʻui ʻaki ʻe he kau palesiteni fakamisioná, ka ʻoku faʻa ʻi ai pē ha maʻuʻanga paʻanga ʻa e ongo meʻa malí ke tānaki atu ki he paʻanga ko ʻeni ʻoku ʻoange ʻe he Siasí.
ʻI hono maʻu ko ia ʻe Mākisi Mātini mo hono uaifi ko Milaní ʻa hona uiuiʻi ki he Misiona Palāsila Sao Paulo Noaté, ne akonaki ai ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, ki he ongo mātuʻa Hauaiʻí ni kuo pau ke fai ha feilaulau, ka naʻá ne tala ange ke ʻoua ʻe fuʻu tōtuʻa ʻena feilaulaú.
Naʻe ʻalu ʻa e fāmili Mātiní ki ʻapi peá na lotua ke ʻilo e founga te na lava ai ke tali ʻa e faingamālié ni. Naʻá na fakatau atu e meʻa kotoa. Naʻe pehē ʻe Sisitā Mātini, “Ko e tāpuaki—ne ma fakatau atu e meʻa kotoa he ʻaho pē ʻe taha. Ko ha mana ia kiate kimaua.”
ʻE ʻikai ke tau feilaulau kotoa he tafaʻaki fakapaʻangá, ka ʻe fehangahangai ʻa e palesiteni fakamisiona kotoa mo hono uaifí mo ha faʻahinga feilaulau ki hono siviʻi ʻo e tuí.
ʻI hono tali ʻe Keli mo Pāmela Lasimūseni ʻo Tūsoni, ʻAlesona, ʻi he USA, ʻa e uiuiʻi ki he Misiona Siapani Senitaí naʻá na mavahe ai mei heʻena fānau ʻe toko onó mo e makapuna ʻe toko 23.
Naʻe pehē ʻa Sisitā Lasimūseni, “ʻOku ou ʻilo ʻe lelei ange ʻa hono tokangaʻi ʻe he Tamai Hēvaní ʻa e fānaú ʻiate au, ko ia ʻokú ma fiefia ke fai ʻeni mo ongoʻi ko ha tāpuaki maʻongoʻonga ia kiate kinautolu.”
ʻOku fakahaaʻi ʻe ha tokolahi ʻoku nau tali ʻa e uiuiʻi ko ia ke ngāue ko e kau palesiteni fakamisiona mo e hoa ki he kau palesiteni fakamisioná ʻa e ʻulungāanga ʻo e loto ʻaki e feilaulaú.
Naʻe pehē ʻa Palesiteni Mātini, “ʻOku ou faʻa fakakaukau pe ko e hā koā ʻa e feilaulau, he ʻoku ʻi ai e meʻa ʻoku faingataʻa ki he niʻihi kae faingofua ia ki he niʻihi. ʻI he taimi lahi ʻi heʻetau moʻuí … ʻoku tau pehē te tau fakamuʻomuʻa ʻa e ʻEikí pea te tau fai ha meʻa pē, pe ʻalu ki ha feituʻu pē maʻá e ʻEikí. Ko ia ʻoku ʻikai ke tau fuʻu fakakaukau ki he feilaulaú. … Ko ha faingamālie; ko ha lāngilangi ke tukuange ʻa e meʻa kotoa pē.”
Ko ʻEte Mateuteú
ʻOku lahi ha teuteu fakalaumālie mo fakatuʻasino ʻa e kau palesiteni fakamisioná mo honau uaifí kimuʻa pea kamata ʻa honau uiuiʻi fakafaifekaú. ʻOku anga ʻaki ʻa hono uiuiʻi ʻo e kau palesiteni fakamisioná ʻi ha māhina ʻe ono kimuʻa, ka ʻi ha taimi ʻe niʻihi ʻoku faʻa fakasiʻisiʻi e taimi ko ia ke teuteú. Naʻe uiuiʻi ʻa Peleni mo Ane Sikoti ʻo ʻĪteni, ʻIutā, USA, ke tokangaʻi ʻa e Misiona Kānata Tolonitoó ʻi ha uike ʻe taha kimuʻa he ako ʻa e kau palesiteni fakamisioná pea ko e māhina ia ʻe ua kimuʻa pea kamata ʻa ʻena ngāué.
Makehe mei hono fakahoko ki hona ngaahi kaungāmeʻá mo e fāmilí pea mo e feinga ke aleaʻi ʻa hona ʻapí, naʻá na ako e ngaahi tohi lēsoní, fanongo ki he ngaahi CD, mo fai ha ngaahi teuteu fakalaumālie kehe. Ka naʻá na pehē ko ʻena teuteu lelei tahá naʻe fai ia ʻi he ako he MTC.
Naʻe pehē ʻa Palesiteni Sikoti, “Ko ha maʻuʻanga ʻilo fakalaumālie moʻoni ia, ke kau fakataha mo ha falukunga kakai kuo nau [feilaulau ke ngāue maʻá e ʻEikí] pea ke akoʻi ʻe ha kau palōfita, kau tangata kikite, mo e kau tangata maʻu fakahā … pea ko e taha ia ʻo e ngaahi aʻusia maʻongoʻonga taha ʻi heʻetau moʻuí.”
ʻAko ʻa e Potó
ʻI he ako ʻaho ʻe fā ʻi Suné, ne fafanga fakalaumālie ʻaki e kau palesiteni fakamisioná mo honau uaifí e ngaahi pōpoaki mei he Kau Palesitenisī ʻUluakí mo e niʻihi e kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá.
Naʻe pehē ʻa Sisitā Sikoti, “ʻI heʻemau fakafanongo ki heʻenau akoʻi kimautolú, [naʻa mau ongoʻi] naʻe ʻi ai ʻa e ʻEikí, ʻokú Ne tokanga mai, ko ʻEne ngāué ʻeni, pea ko ʻEne kau tamaioʻeikí ʻeni, pea ʻoku tau maʻu ʻa e faingamālie ke ō atu ʻo fakafofongaʻi hotau Fakamoʻuí.”
Naʻe fakahā mai ʻe ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e konga ʻo ʻene ngaahi ʻamanaki ki he kau palesiteni fakamisioná mo honau ngaahi hoá.
Naʻá ne pehē, “Fakatauange ke mou maʻu ha moʻui lelei fakaesino, fakaeloto, mo fakalaumālie [pea] lavameʻa ʻi he akó, akoʻí, pea mo hono moʻui ʻaki e tokāteline ʻo Sīsū Kalaisí. ʻOku ou fakaʻamu ange ʻe lava ke fakatahatahaʻi e mālohi ʻo e kāingalotú; ke nofotaha ʻi he ngaahi ouaú; [pea] ke hoko ʻo taha mo e ʻEikí, kau mēmipa ʻo e Siasí, mo e kau faifekau pelepelengesi kuo fakafalala atu ke mou tokangaʻí.”
Ne kau atu e kau palesiteni fakamisiona ne uiuiʻi foʻoú ki ha fakataha ako ʻaho ʻe fā ʻi he MTC ʻi Polovo, ʻIutā, USA, ʻi ha kiʻi taimi nounou kimuʻa pea nau hū ki he malaʻe ʻo e ngāue fakafaifekaú.
© IRI