Ko e Lea ʻi he ʻAho ní

ʻOku toutou ʻaʻahi ʻa e Kau Taki Māʻolungá ki he kāingalotu ʻo e Siasí ʻi he funga ʻo e māmaní. ʻE maʻu atu ʻi he news.lds.org ha ngaahi fakamatala ki heʻenau ngaahi ngāué, pehē foki ki he Prophets and Apostles Speak Today (Lea he ʻAhó ni ʻa e Kau Palōfitá mo e Kau ʻAposetoló) ʻi he prophets.lds.org ʻi he lea faka-Pilitāniá, Falanisē, Siamane, ʻĪtali, Potukali, mo e faka-Sipeini. Ko ha kiʻi fakamatala nounou ʻeni ki he ngaahi folau fakamumuitahá.

• ‘I he ‘aho 26 ʻo Mē 2011 ne lea ai ʻa Palesiteni Tieta F. ʻUkitofa, ko e Tokoni Ua ʻi he Kau Palesitenisī ʻUluakí, ki ha toko 800 ko e kakai ʻo e koló, kau pisinisi, mo ha kau taki lotu ne nau kau atu ki he Los Angeles World Affairs Council, ko ha kautaha tauʻatāina ʻoku fakatefito ki hono fakamahinoʻi e ngaahi meʻa fakaemāmanilahí. Naʻe talanoa ʻa Palesiteni ʻUkitofa ki he tupulaki ʻo e Siasí talu mei he 1830 ki he ʻahó ni. Fekumi ʻi he news.lds.org ki he “Uchtdorf, Los Angeles.”

• ʻI he ʻaho 5 ʻo Sune 2011, naʻe fokotuʻu ai ʻe ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ʻuluaki siteiki ʻi Lūsiá—ʻa e Siteiki Mosikou Lūsiá pea ko e fika ua ʻi he ʻēlia naʻe tokangaʻi ʻe he Sovieti ʻIunioní (Soviet Union). Naʻe tokolahi hake he toko 1,100 e kakai ne kau maí. Fekumi ʻi he news.lds.org ki he “Nelson, Moscow.”

• ʻI Meé, naʻe ʻaʻahi ai ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ki ʻInitia, Hongo Kongo (ʻa ia ne kau fakataha ai mo ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá), pea ki Mongokōlia. Fekumi ʻi he news.lds.org ki he “Holland, India.”

• ʻI he ʻaho 15 ʻo Sune 2011, naʻe ʻaʻahi ai ʻa e Pisope Pulé, ʻa H. Tēvita Pētoni ki Hikasi Matisūsima, Siapani, ke vakaiʻi e tuʻunga ʻo e fonuá hili e mofuike mo e peaukula ʻo e ʻaho 11 Māʻasí pea vakaiʻi e tokoni ʻoku fakahoko atu ʻe he Siasí. Fekumi ʻi he news.lds.org ki he “Burton, Japan.”