Ngaahi Ongoongo Nounou Mei Māmaní

Takimamata ʻi he Temipale Kuetisalatenakou, Fanongonongo Hono Fakatapuí

ʻE kau atu e toʻu tupu ʻo e Siasí ʻi he fonuá ki hono kātoangaʻi e fakatapui ʻo e Temipale Kuetisalatenakou Kuatemalá, ʻi ha hiva mo e faiva fakafonua ʻi he ʻaho Tokonaki 10 Tīsema 2011.

Pea ʻe fakatapui leva ʻa e temipalé ʻi he ʻaho Sāpate, 11 Tīsema 2011 ʻi ha fakatahaʻanga ʻe tolu, ʻa ia ʻe fakamafola ki he ʻiuniti kotoa ʻi Kuatemalá.

Hili e fakatapuí, ʻe ʻatā leva e temipalé ki hono fakahoko ʻo e ngaahi ouaú ʻi he ʻaho Tūsite 13 Tīsema 2011.

ʻAmanaki ʻa e Siasí ke Langa ha Temipale ʻi Falanisē

Naʻe fanongonongo ʻe Palesiteni Tōmasi S. Monisoni ʻi Siulai ʻoku ʻamanaki ke langa ʻe he Siasí e fuofua temipale ʻi Falaniseé ʻi ha konga kelekele ʻi he fakaʻuta ʻo Pālesí.

Kuo ngāue fakataha e Siasí ʻi ha ngaahi māhina lahi mo e kau maʻu mafai fakalotofonuá.

Kuo ʻi ai ha ngaahi feinga kimuʻa ke maʻu ha feituʻu lelei ki ha temipale ʻi Falanisē, ka ne ʻikai fakapapauʻi. Ko e siʻi kāingalotu ko ia ʻo e Siasí ʻi Falanisē ʻoku fie ʻalu ki he temipalé ʻoku nau faʻa ō pē ki he ngaahi fonua kaungāʻapi ʻi ʻIulopé.

Lahi Ange Hono Maʻu e Faʻunga Foʻou ki he Folofolá ʻi he Ongó

Kuo fakaʻatā mai ʻe he Siasí e ngaahi folofola ʻa e LDS ʻi he ongó ke lava ʻo download ʻi he iTunes ʻi he audiobook (ʻoku ui ko e “enhanced audio content” ʻi he iTunes) pe MP3.

ʻOku maʻu atu e tuʻunga kakato ʻo e ngaahi tohi folofola kuo fakamafaiʻi ʻe he Siasí ʻi he ongó ʻi he lea faka-Pilitāniá mo e faka-Sipeiní, pea maʻu atu foki mo e ngaahi folofola ʻe tolu kuo fakatahaʻí, ʻi he lea faka-Siapaní, Potukali, mo e faka-Kōleá.

Ke maʻu atu e nāunau foʻoú ni, vakai ki he tafaʻaki ki he ngaahi folofolá ʻi he sēnolo ʻa e Siasí ʻi he iTunes.lds.org.

ʻOku maʻu atu e ngaahi tatau ʻo e ngaahi folofola kuo fakamafaiʻi ʻe he Siasí ʻi he ongó ʻi ha ngaahi lea fakafonua ʻi he iTunes.lds.org.