Mensahe iti Visiting Teaching, Disiembre 2011

Maysa a Dakkel a Kabaelan ti Tignay

Adalenyo daytoy a material, ken no maitutop, paglilinnawaganyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag.

Pammati • Pamilia • Tulong

Kasapulan ti Apo, ti Simbaanna, dagiti pamilia, ken dagiti komunidad ti impluensia dagiti nalinteg a babbai. Kinapudnona, insuro ni Elder M. Russell Ballard ti Korum dagiti Sangapulo-ket-dua nga Apostol, a “tunggal kabsat a babai iti daytoy a Simbaan a nangaramid iti katulagan iti Apo ket addaan iti nadiosan a bilin a tumulong a mangisalakan kadagiti kararua, mangidaulo kadagiti babbai iti lubong, mangpapigsa kadagiti pagtaengan ti Zion, ken mangbangon iti pagarian ti Dios.”¹

Mabalin a masdaaw ti sumagmamano a kakabsat a babbai no mabalinda nga ipatungpal dagiti kasta a nangangato a panggep a tun-oyen. Ngem kas iti impalawag ni Eliza R. Snow (1804–87), maikadua a sapasap a presidente ti Relief Society, “Awan ti kabsat a babai a maidaddaduma, ken limitado unay ti impluensiana tapno dina kabaelan ti agaramid iti adu iti panangipasdek iti pagarian ti Dios iti rabaw ti daga.”² Insuro pay ni Sister Snow a nabukel ti Relief Society “para iti pannakaileppas ti tunggal nasayaat ken natakneng nga aramid.”³

Ti pannakiraman iti Relief Society ket mangpadakkel kadagiti kabaelan ti impluwensiatayo babaen ti panangted iti tunggal kabsat a babai kadagiti gundaway a mangbangon iti pammati, mangpapigsa kadagiti pamilia ken pagtaengan, ken mangted iti serbisio nga agpada iti pagtaengan ken iti intero a lubong. Ken nagasat ta, dagiti panagagawatayo a kas maysa a tao ken kas Relief Society ket saan a kasapulan a dakkel ken aglablabes, no di ketdi nasken a natallugod ken saan nga agbalbaliw. Dagiti nalinteg a nakaugalianen nga aramid kas iti inaldaw a panagkararag a bukod ken sangapamiliaan, inaldaw a panagadal iti nasantuan a kasuratan, ken agtultuloy a panangaramid a naimbag kadagiti takem [calling] iti Simbaan ket makatulongto a mangpapigsa iti pammati ken mangbangon iti pagarian ti Apo.

Kadagiti kakabsat a babbai nga agtarigagay a mangammo no dagitoy kasla babassit wenno di madmadlaw nga aramid ket makaaramidda iti pakaidumaan, impanamnama ni Elder Ballard: “Tunggal kabsat a babai a mangitakder iti kinapudno ken kinalinteg ket mangpaawan iti impluensia ti dakes. Tunggal kabsat a babai a mangpapigsa ken mangsaluad iti pamiliana ket mangar-aramid iti trabaho ti Dios. Tunggal kabsat a babai nga agbibiag a kas maysa a babai ti Dios ket agbalin a maysa a silaw para kadagiti dadduma tapno surotenda ken mangimulmula kadagiti bukel ti nalinteg nga impluensia a maapitto kadagiti umay a dekada.”⁴

Manipud kadagiti Nasantuan a Kasuratan

1 Taga Corinto 12:4–18; 1 Timoteo 6:18–19; Mosiah 4:27; Pagannurotan ti Pammati 1:13

Manipud iti Pakasaritaantayo

Ni Eliza R. Snow, a nagserbi a kas sekretaria idi nabukel ti Relief Society idiay Nauvoo, ket inawagan ni Presidente Brigham Young (1801–77) tapno agbaniaga iti intero a Simbaan, a mangtulong kadagiti obispo a mangbukel iti Relief Society kadagiti wardda.

Insuro ni Sister Snow: “No adda man kadagiti annak a babbai ken inna iti Israel a makarikrikna iti limitasion kadagiti agdama a kabaelanda, makabirokda itan iti makaanay nga abilidad para iti tunggal bileg ken kabaelan para iti panagaramid iti nasayaat a kawayaan a pakaitalugadinganda. … Niluktan ni Presidente Young ti posibilidad para iti dakkel a kabaelan ti tignay ken pakaaramatan.”⁵

© 2011 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/10. Pannakaanamongna a maipatarus: 6/10. Pannakaipatarus ti Visiting Teaching Message, December 2011. Ilokano. 09772 864

Ania ti Maaramidko?

Kasano a matulongak dagiti kakabsat a babbai a sarungkarak a mangbigbig ken mangaramat iti kabaelanda tapno agbalinda a nalinteg nga impluensia?
Kasano a mausarko dagiti naidumduma a sagutko ken talentok a mangbendision kadagiti dadduma?