Mensahe ti Umuna a Panguluen, Disiembre 2011
Ti Pili nga Agbalin a Managyaman
Bilinennatayo ti Amatayo iti Langit nga agbalin a managyaman iti amin a banag (kitaen iti 1 Taga Tesalonica 5:18), ken idawatna a kasapulan nga agyamantayo kadagiti bendision nga awatentayo (kitaen iti DkK 46:32). Ammotayo a naisangrat amin dagiti bilinna a mangparagsak kadatayo, ken ammotayo pay a ti manglabsing kadagiti bilinna ket mangiturong kadatayo iti kinaay-ay-ay.
Isu a tapno agbalin a naragsak ken malapdan ti kinaay-ay-ay, nasken a maaddaantayo iti managyaman a puso. Nakitatayon iti biagtayo ti pagnaigan ti panagyaman ken kinaragsak. Amintayo ket agtarigagay a makarikna iti panagyaman, ngem saan a nalaka ti agtalinaed a managyaman iti amin a banag kadagiti pannubok ti biag. Sumangbay ti sakit, pannakaupay, ken ti ipupusay dagiti tattao nga ipatpategtayo kadagiti panawen ti panagbiagtayo. Dagiti ladingittayo ti mangparigat tapno makitatayo dagiti bendisiontayo ken agyaman kadagiti bendision nga italtalimeng ti Dios para kadatayo iti masakbayan.
Maysa a karit ti mangbilang kadagiti bendisiontayo gapu ta addaantayo iti ugali nga umawat nga awanan iti panagyaman kadagiti nasayaat a banag. No maawanantayo iti balay a pagtaengan, taraon a makan, wenno ti pammateg dagiti gagayyem ken pamilia, mautobtayo nga anian a panagyamantayo no addaantayo kadagitoy.
Kangrunaan ti amin, no dadduma narigat para kadatayo ti agbalin a naan-anay a managyaman para kadagiti kapatgan a sagut nga awatentayo: ti pannakayanak ni Jesucristo, ti Pannubbotna, ti kari ti panagungar, ti gundaway a mangsagrap iti agnanayon a biag a kadenna dagiti pamiliatayo, ti Pannakaisubli ti ebanghelio nga adda ti priesthood ken dagiti tulbekna. Babaen laeng ti tulong ti Espiritu Santo a mairugitayo a marikna no ania ti kaipapanan dagita a bendision kadatayo ken kadagiti patpatgentayo. Ket iti dayta laeng a manamnamatayo a makapagbalintayo a managyaman iti amin a banag ket malapdan ti kinainggrata a mamagladingit iti Dios.
Nasken nga ikararagantayo a ti Dios, babaen ti bileg ti Espiritu Santo, tulongannatayonto a mangkita a silalawag kadagiti bendisiontayo uray iti baet dagiti pannuboktayo. Matulongannatayo babaen ti bileg ti Espiritu a mangbigbig ken agbalintayo a managyaman kadagiti bendision a ditay pagyamyamanan. No ania ti kangrunaan a makatulong kaniak ket ti pangikararagak iti Dios, “Iturongnak koma iti maysa a tao a matulongak para Kenka?” Iti panangtulong iti Dios a mangbendision kadagiti dadduma nga ad-adda a nakitak dagiti bukodko a bendision.
Naminsan a nasungbatan ti kararagko idi adda agassawa a diak am-ammo a nangawis kaniak a mapan iti ospital. Sadiay a nasarakak ti maysa a bassit a maladaga a bassit unay ta apagisu laeng isuna iti dakulapko. Iti sumagmamano laeng a lawas a panagbiag, naglasaten isuna iti adu a pannakaoperar. Imbaga dagiti doktor kadagiti nagannak a kasapulan ti narigrigat pay a pannakaoperar para iti puso ken dagiti bara tapno mapagtalinaed ti biag iti dayta bassit nga anak ti Dios.
Iti kiddaw dagiti nagannak, inikkak ti maladaga iti bendision ti priesthood. Nairaman iti bendision ti maysa a kari ti biag a nayatiddog. Ad-adu pay ngem iti panangted iti maysa a bendision, naawatko a mismo ti bendision ti ad-adda a managyaman a puso.
Babaen ti tulong ti Amatayo, mabalintayo amin a pilien ti mangrikna iti ad-adu pay a panagyaman. Mabalintayo a kiddawen Kenkuana a tulongannatayo a makakita a nalawlawag kadagiti bendisiontayo, ania man dagiti kasasaadtayo. Para kaniak iti dayta nga aldaw, nagyamanak a kas di kaano man idi datdatlag a naggaraw ti pusok ken dagiti barak. Iti dalanko a nagawid, nagyamanak kadagiti bendision a naited kadagiti annakko ta makitak a nalawlawag dagiti milagro ti kinasayaat a naggapu iti Dios ken manipud kadagiti nasayaat a tattao iti aglawlawda.
Kangrunaan ti amin, nariknak ti panagyaman iti pammaneknek ti Pannubbot nga adda iti biag dagidiay naregget a nagannak ken iti biagko. Nakitakon ti namnama ken ti natarnaw nga ayat ni Cristo a rumimrimat kadagiti rupada, uray iti nakaro a pannubokda. Ket nariknak ti pakakitaan a mabalinyo a marikna no idawatyo iti Dios nga ipakitana kadakayo a ti Pannubbot ket mapalugodannakayo a mangrikna iti namnama ken ayat.
Makaaramidtayo amin iti pili a mangted iti panagyaman iti kararag ken agdawat iti Dios iti panangiturong tapno agserbi kadagiti dadduma para Kenkuana—nangnangruna daytoy a panawen ti tawen a panangrambaktayo iti pannakayanak ti Mangisalakan. Inted ti Dios Ama ti Anakna, ket inted ni Jesucristo kadatayo ti Pannubbot, ti kapatgan ti amin a sagut ken ti amin a panangted (kitaen iti DkK 14:7).
Ti panagyaman iti kararag ket makapalugod kadatayo a mangkita iti kinadakkel dagitoy a bendision ken amin dagiti dadduma pay a bendisiontayo ket iti kasta maawatayo ti sagut ti ad-adda pay a managyaman a puso.
© 2011 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/10. Pannakaanamongna a maipatarus: 6/10. Pannakaipatarus ti First Presidency Message, December 2011. Ilokano. 09772 864
Panangisuro manipud iti Daytoy a Mensahe
Ti panangisurat kadagiti padas ken bendisiontayo ket makatulong kadatayo a manglaglagip kadagitoy ken mangted kadatayo iti maysa a banag a pagibasaran. Ibilangyo ti panangidawat kadagiti suruanyo nga isuratda no ania ti pagyamyamananda—a tumulong kadakuada a manglaglagip kadagiti bendision a naawatdan, mangilasin kadagiti bendision ti agdama, ken mangpasungad kadagiti bendision ti masakbayan.
Mabalinyo pay nga allukoyen dagiti suruanyo a mangsurot iti pagwadan ni Presidente Eyring iti panagdawat iti Nailangitan nga Ama a mangiturong kadakuada iti maysa a tao a matulongan wenno mapagserbianda.