Cov Hluas
Ua Siab Loj Tiv Kom Dhau Kob Nag Xob Nag Cua
Hmo thib ob uas kuv ceg txheem ntseeg lub Koom Haum Ntxhais Hluas mus pw hav zoov, los ib kob nag thiab muaj khaub lig cua loj heev li. Peb pawg ntseeg muaj li 24 tug ntxhais hluas thiab ob tug thawj coj tuaj mus pw hav zoov, thiab peb sawv daws yuav tsum los mus nyob hauv lub tsev me me hauv hav zoov kom thiaj tau kev tiv thaiv. Los nag hlob heev, thiab cov cua hlob heev tuaj. Kuv pheej hais rau kuv tus kheej hais tias nco ntsoov ceg txheem ntseeg tus thawj tswj hwm zaj lus thov Vajtswv puag tas uas hais kom peb muaj kev nyab xeeb. Peb pawg ntseeg twb thov Vajtswv ua ke hauv peb lub tsev hauv hav zoov, thiab kuv kuj thov Vajtswv lawm thiab.
Kuv pom tau hais tias cov ntxhais hluas feem coob ntshai heev. Peb lub tsev hauv hav zoov tsis tshua khov, thiab peb nyob kiag ntawm ib tug dej. Li 20 na this xwb ces kob nag xob nag cua no loj hlob heev ces tag nrho ceg txheeg ntseeg yuav tsum tau khiav los mus nkag rau hauv cov thawj coj cov tsev hauv hav zoov uas nyob siab me ntsis. Kuv tus thawj tswj hwm ntawm ceg txheem ntseeg rov qab thov Vajtswv dua, thiab peb hu nkauj, hu cov nkauj hauv lub Koom Haum Me Nyuam Yaus, thiab cov nkauj pw hav zoov kom peb sawv daws thiaj tau kev nplij siab me ntsis. Peb yeej ntshai heev, tab sis peb muaj qhov xav hais tias yeej yuav tsis ua li cas. Peb caug na this tom qab ntawd ces peb sawv rov qab mus rau peb pawg ntseeg cov tsev hauv hav zoov tau lawm.
Tom qab ntawd peb mam li paub hais tias lub khaub lig cua ua li cas lawm. Nws faib ua ob lub khaub lig cua. Ib lub los dhau ib ncig ntawm peb sab xis thiab lub thib ob los dhau ib ncig ntawm peb sab laug. Cov cua uas los nplawm peb twb tsis yog lub khaub lig cua kiag!
Kuv paub hais tias Vajtswv hnov peb cov lus thov hmo ntawd thiab Nws tiv thaiv peb ntawm cov kob nag xob nag cua. Yog vim li cas es lub khaub lig cua thiaj li faib ua ob lub li ntawd yuav tsum yog Vajtswv faib xwb? Kuv paub hais tias thaum peb muaj tej nag xob nag cua hauv peb lub neej, peb yeej thov tau peb Leej Txiv Saum Ntuj Ceeb Tsheej thiab Nws yuav hnov peb tej lus thov thiab yuav teb peb, yuav ua kom peb muaj siab loj thiab pab tiv thiav peb kom peb nyob nyab xeeb.