Thawj Pawg Thawj Tswj Hwm tsab Xov, LUB Ib Hlis Ntuj 2012
Txoj Kev Ua Neej Nyob kom Vam Meej
Xws li xyoo no nyuam qhuav pib, kuv yaum ib Tsoom Haiv Neeg Ntseeg nyob txhua qhov txhia chaw kom rau siab nrhiav kom tau qhov uas kuv hu ua lub neej vam meej—ib lub neej uas puv nkaus muaj raws li yus lub siab xav, muaj qhov zoo, thiab muaj koob hmoov ntau nplua mias. Ib yam li peb tau kawm tej niam ntawv ABC thaum peb kawm ntawv, kuv muaj kuv cov niam ntawv txiv ntawv ABC uas yuav pab peb ncav tau ib lub neej uas vam meej kawg li.
Coj Cwj Pwm Zoo Kom Thiaj Pom Tau qhov Zoo
Tus tsiaj ntawv A hauv kuv cov niam ntawv ABC hais txog yus tus cwj pwm. William James, ib tug neeg Amelikas uas txawj kho sab paj hlwb thiab paub tawm tswv yim zoo, tau sau hais tias, “Qhov zoo tshaj plaws rau peb tiam no yog qhov uas paub hais tias, yog tias tib neeg hloov tus cwj pwm hauv lawv tej siab, ces qhov no yuav hloov tau lawv lub neej.”1
Muaj ntau yam hauv lub neej uas peb ua tau yeej nyob ntawm saib peb tus cwj pwm zoo li cas xwb. Qhov uas peb pom tau zoo li cas thiab qhov uas peb ho coj tau zoo li cas yuav yog qhov zoo thiab tsis zoo. Ua zoo li peb ua tau thiab xaiv los muaj kev zoo siab txog tej yam uas muaj hauv peb lub neej, txawm hais tias yog dab tsi los xij peem, ces thiaj li muaj tau kev thaj yeeb thiab kev zoo siab.
Charles Swindoll—ib tug kws sau, ib tug kws qhia ntawv, thiab ib tug xib hwb qhia Kev Ntseeg—tau hais tias: “Rau kuv ces, yus tus cwj pwm, haj yam tseem ceeb tshaj … tej uas muaj los yav nram ntej, … tshaj nyiaj txiag, tshaj saib yus ua neej nyob li cas, tshaj tej kev tau raws li lub siab xav, thiab tshaj tej yam uas lwm tus neeg xav los sis hais los sis ua huv tib si. Haj yam tseem ceeb tshaj yus lub cev zoo li cas, yus tej kev txawj, los yog tej txuj ci. Yus coj cwj pwm li cas yuav txhim tsa tau los yog ua kom puas tsuaj tau ib lub tsev lag luam, ib lub koom txoos, ib lub tsev. Qhov xav tsis thoob yog txhua hnub peb xaiv tau saib peb yuav coj cwj pwm zoo li cas nyob rau hnub ntawd.”2
Peb kav tsis tau tej cua, tiam sis peb kho tau daim ntaub thaiv cua ntawm lub nkoj. Kom peb thiaj muaj kev zoo siab, kev thaj yeeb, thiab kev kaj siab heev, mas pebyuav tsum xaiv los coj tus cwj pwm zoo.
Tso Siab rau Nej tus Kheej
Tus tsiaj ntawv B yog rau lo lus tso siab—rau nej tus kheej, rau cov neeg nyob ntawm nej ib ncig, thiab rau tej ntsiab cai uas nyob mus ib txhis.
Ua siab ncaj rau nej tus kheej, rau lwm tus neeg, thiab rau nej Leej Txiv Saum Ntuj Ceeb Tsheej. Muaj ib tug uas ua siab tsis ncaj rau Vajtswv mus txog rau thaum twb lig lig lawm, tus ntawd yog Cardinal Wolsey uas, raws li Shakespeare tau hais mas, tau ua neej nyob ntev ua hauj lwm rau peb tug vaj ntxwv thiab nws muaj nyiaj txiag thiab hwj chim. Thaum kawg, ib tug vaj ntxwv uas siab luv tau tshem Cardinal Wolsey tej hwj chim thiab tej ntiag tug tawm ntawm nws mus. Cardinal Wolsey quaj hu hais tias:
Kheev lam kuv tau siv ib nrab kuv lub zog los ua hauj lwm rau kuv tus Vajtswv
Kuv tau ua hauj lwm rau kuv tus vaj ntxwv, Ces thaum kuv twb laus li no lawm los Vajtswv
Yeej yuav tsis tso kuv tseg rau kuv cov yeeb cuab es tsis muaj dab tsi hlo li.3
Thomas Fuller, uas yog ib tug neeg As Kiv uas yog neeg ntseeg thiab neeg kawm txog keeb kwm uas tau ua neej nyob rau thaum tiam 17, tau sau hais tias: “Ib tug neeg yeej yuav tsis ua lub neej raws li txoj kev ua nws tsis ntseeg.”4
Tsis txhob txiav nej txoj hau kev thiab txhob cia lwm tus neeg txiav nej txoj hau kev txog ntawm saib nej yuav muaj peev xwm npaum li cas. Tso siab rau nej tus kheej thiab ua lub neej kom ncav tau nej tej yam uas yog rau siab ces yeej ncav tau xwb.
Nej yeej yuav ncav tau qhov uas nej tso siab rau nej tus kheej hais tias nej yeej ua tau. Cia siab thiab tso siab thiab muaj kev ntseeg.
Ua Siab Loj Tiv tej Kev Cov Nyom
Kev ua siab loj rais los mus ib qho txiaj ntsim uas muaj nuj nqis thiab tsim nyog ua thaum peb saib nws ua ib txoj kev txiav txim siab kiag kom ua siab loj ua neej raws li qhov zoo, es tsis yog ua siab loj tuag theej lwm tus neeg.
Tus neeg Asmelikas uas yog kws sau ntawv thiab paj huam tau hais tias: “Txawm koj ua dab tsi, los koj yuav tsum muaj siab loj. Txawm koj txiav txim siab taug txoj kev twg, los yeej yuav muaj ib tug hais rau koj hais tias koj mus yuam kev lawm. Yeej yuav muaj tej yam nyuab heev uas ntxias kom koj ntseeg hais tias yog li cov neeg tsis nyiam koj hais lawm tiag. Kom thiaj li npaj tau ib txoj kev taug thiab taug mus kom kawg mas yuav tsum muaj siab loj npaum li ib tug tub rog. Kev thaj yeeb yog tej kev kov yeej lawm, tab sis yuav tsum yog muaj cov poj niam thiab txiv neej uas muaj siab loj mas thiaj yuav yeej taus.”5
Yeej yuav muaj tej lub sij hawm uas nej yuav ntshai thiab poob siab. Tej zaum nej yuav xav hais tias nej swb lawm. Qhov uas yuav yeej zoo li nyuab heev. Qee zaum nej yuav zoo li Daviv uas sim tua Kaulias. Tab sis nco ntsoov tias—Daviv twb yeej lawm!
Twb yuav tsum muaj siab loj los pib ncav tej hom phiaj uas nej xav ncav kom cuag, tab sis tseem yuav tsum muaj siab loj dua los mus rau siab ua ntxiv tiag thaum uas twb sim ua ib zaug lawm es ua tsis tau ces tseem yuav rov qab ua zaum thib ob thiab.
Yuav tsum siv zog, rau siab tiag tiag saib ncav puas tau lub hom phiaj, thiab ua siab loj txawm hais tias muaj kev cov nyom thiab npaj siab tias yuav rov qab ua dua zaum ob thiab yog tias thawj zaug ncav tsis tau. “Qee zaum kev muaj siab loj yog lub suab yau yau uas thaum yuav tsaus ntuj es hais tias, ‘tag kis kuv mam li rov qab sim ua dua.’”6
Thov kom peb nco ntsoov cov ABC thaum peb pib taug peb txoj kev mus rau xyoo tshiab, coj cwj pwm zoo, tso siab hais tias peb yeej yuav ncav tau peb tej hom phiaj, thiab ua siab loj tiv peb tej kev tej kev cov nyom. Ces txoj kev ua neej nyob kom kev vam meej thiaj li yuav yog peb li.
© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11 Kev txhais First Presidency Message, January 2012. Hmong. 10361 295
Qhia los ntawm tsab Xov No
Xav saib puas tsim nyog caw ib tug neeg hauv tsev neeg los qhia txog ib lub sij hawm twg uas kev coj cwj pwm zoo, kev tso siab rau lawv tus kheej, los sis kev ua siab loj tau pab lawm. Los sis caw kom lawv nrhiav tej qhov piv txwv txog peb zaj ntsiab cai no hauv cov vaj lug kub. Tej zaum thaum koj npaj qhia koj yuav tsum ua tib zoo thov Vajtswv thiab xav saib koj puas tau muaj tej yam zoo li no hauv koj lub neej thiab.