2012
Saib xyuas thiab Kev Ua Hauj Lwm los ntawm kev Mus Saib Xyuas Tom Tsev
January 2012

Cov Mus Saib Xyuas Tom Tsev tsab Xov, LUB Ib Hlis Ntuj 2012.

Saib Xyuas thiab Kev Ua Hauj Lwm los ntawm kev Mus Saib Xyuas Tom Tsev

Cia li kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej.

Kev Ntseeg, Tsev Neeg, Kev Pab

“Kev siab hlub [txhais tau tias] ntau tshaj qhov uas ua siab zoo xwb,” Thawj Tswj Hwm Henry B. Eyring, tus Pab Cuam thib Ib hauv Thawj Pawg Thawj Tswj Hwm, qhia. “Kev siab hlub yog muaj los ntawm kev muaj siab ntseeg tus Tswv Yexus Khetos thiab twb yog vim muaj Nws txoj Kev Theej Txhoj.”1 Rau cov viv ncaus hauv lub Koom Haum Niam Tsev, txoj kev mus saib xyuas tom tsev yog kev ua hauj lwm raws li kev siab hlub, uas yog ib qho tseem ceeb ntawm kev qhia tias peb muaj siab ntseeg peb tus Cawm Seej.

Los ntawm kev mus saib xyuas tom tsev, peb saib xyuas tau thaum peb tiv tauj txhua tus viv ncaus, qhia txoj moo zoo, thiab saib seb tus viv ncaus thiab nws tsev neeg xav tau kev pab li cas. “Kev mus saib xyuas tom tsev yuav rais los mus ua tus Tswv tej hauj lwm thaum peb txhawj txog cov neeg es tsis yog txhawj hais tias ua tag lawm los tsis tau no xwb,” Julie B. Beck, Koom Haum Niam Tsev tus tuam thawj tswj hwm, piav. “Tiag tiag mas, kev mus saib xyuas tom tsev yeej tsis muaj hnub tag li. Qhov no yog ib txoj kev ua neej tsis yog ib txoj hauj lwm xwb. Txoj kev rau siab ua ib tug mus saib xyuas tom tsev yuav qhia tau tias peb yog ib tug thwj tim tiag tiag.”2

Thaum peb rau siab ntso thiab thov Vajtswv saib xyuas, peb thiaj yuav paub hais tias yuav pab thiab yuav txhawb nqa txhua tus viv ncaus thiab nws tsev neeg li cas. Yuav muaj ntau yam kev pab—ib txhia yuav loj heev thiab ib txhia ho yuav tsis tshua loj heev. “Feem ntau tej kev pab rau lwm tus yuav yog me me xwb ces yeej txhawj nqa thiab foom tau koob hmoov rau lawv lawm: nug txog lawv tsev, hais ob peb lo lus zoo kom lawv zoo siab, hais ib lo lus zoo txog lawv, sau ib daim ntawv me me mus ua tsaug, hu xov tooj mus nrog lawv tham ib pliag,” Thawj Tswj Hwm Thomas S. Monson tau qhia li no. “Yog hais tias peb ua zoo saib thiab tsa qhov muag pom, thiab yog peb ua raws li kev tshoov siab, ces peb yuav ua tau ntau yam zoo. … Tej kev pab ntawm lub Koom Haum Niam Tsev cov mus saib xyuas tom tsev mas yeej suav tsis txheeb li.”3

Los ntawm cov Vaj Lug Kub

Yauhas 13:15, 34–35; 21:15; Mauxiyas 2:17; Lus Qhuab Qhia thiab Kev Khi Lus 81:5; Mauxes 1:39

Los ntawm Peb zaj Keeb Kwm

Thaum 1843, cov mej zeej hauv lub Koom Txoos nyob hauv Nauvoo, Illinois, tau muab faib ua plaub pawg ntseeg. Thaum lub Xya Hli Ntuj xyoo ntawd, lub Koom Haum Niam Tsev tau xaiv plaub tug viv ncaus mus saib xyuas ib tug viv ncaus rau ib pawg ntseeg. Cov mus saib xyuas tom tsev no lub luag hauj lwm yog saib xyuas seb leej twg xav tau kev pab li cas thiab mus sau cov nyiaj los sis khoom uas lwm tus muab pub los mus pab cov neeg ntawd. Lub Koom Haum Niam Tsev siv tej khoom los sis nyiaj pub no los pab rau cov neeg uas xav tau kev pab.4

Txawm hais tias cov mus saib xyuas tom tsev tsis tas mus sau tej nyiaj los sis khoom pub lawm, los lawv tseem ua qhov uas saib xyuas seb leej twg xav tau kev pab—ntawm sab ntsuj plig thiab lub cev—thiab yuav tsum pab kom tau raws li tej kev xav tau no. Eliza R. Snow (1804–87), lub Koom Haum Niam Tsev tus tuam thawj tswj hwm thib ob, tau piav hais tias: “Ib tug nai khu … yuav tsum muaj tus Tswv tus ntsuj plig puv npo, kom thaum nws mus rau hauv ib lub tsev nws thiaj paub hais tias hauv lub tsev ntawd nws yuav ntsib tus ntsuj plig zoo li cas. … Thov Vajtswv thiab tus Vaj Ntsuj Plig Dawb Huv kom muaj [tus Ntsuj Plig] kom nej thiaj li yuav ntsib tau tus ntsuj plig uas nyob hauv lub tsev ntawd … kom nej thiaj li paub hais lus zoo thiab lus nplij siab, thiab yog nej pom tias ib tug viv ncaus ho ua dub muag txig rau nej, los cia li ua siab zoo hlo rub nws los ntawm nej li uas rub ib tug me nyuam los kom thiaj li pab tau nws xav nrog nej sib tham.”5

© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11 Kev txhais Visiting Teaching Message, January 2012. Hmong. 10361 295

Lus Cim

  1. Henry B. Eyring, “The Enduring Legacy of Relief Society,” Liahona, Kaum Ib Hlis Ntuj 2009, 121.

  2. Julie B. Beck, “Relief Society: A Sacred Work,” Liahona, Kaum Ib Hlis Ntuj 2009, 114.

  3. Thomas S. Monson, “Three Goals to Guide You,” Liahona, Kaum Ib Hlis Ntuj 2007, 120–21.

  4. Saib Daughters in My Kingdom: The History and Work of Relief Society (2011), 105.

  5. Eliza R. Snow, hauv Daughters in My Kingdom, 108.

Kuv Yuav Pab Li Cas?

  1. Kuv tab tom ua dab tsi kom thiaj pab kuv cov viv ncaus paub hais tias kuv yog ib tug phooj ywg uas hlub thiab hmov tshua lawv?

  2. Kuv yuav ua li cas thiaj saib xyuas thiab pab lwm tus neeg zoo dua?

Luam