Agtutubo
Tured a Sumaranget iti Bagyo
Iti maikadua a rabii ti kamping ti Young Women iti stakeko, nagtudo iti napigsa ken nagalipugpog. Agarup 24 a young women iti wardko ti dimmar-ay iti kamping nga idauluan ti dua a lider, ken nasken nga umanaykami amin iti maysa a bassit a kalapaw tapno masalakniban. Napigsa ti bayakabak ti tudo ken ad-adda a pimmigsa ti angin. Nasken a kanayon a laglagipek ti kararag para iti talged nga indiaya ti stake presidentmi iti nasapsapa. Insawang met ti wardmi iti bukodmi a sangagrupuan a kararag iti kalapawmi, ken nagkararagak met iti bukodko.
Adu a babbai ti nagbuteng, ket nalaka a makita no apay. Saan unay a natibker ti kalapawmi, ken addakami laeng iti igid ti karayan. Iti agarup 20 a minuto ad-adda a pimmigsa ti bagyo isu a nasken a tumaray ti sibubukel a stake manipud kadagiti kalapaw ti wardda a napan kadagiti kalapaw dagiti counselor, nga adda iti nangatngato a lugar. Nangisawang ti stake presidentko iti sabali pay a kararag, ken nagkantakami kadagiti himno, kankanta ti Primary, ken kankanta ti kamping tapno mangliwliwa iti bagbagimi. Wen, napabutngankami, ngem nariknami nga agsayaatto ti amin a banag. Kalpasan ti kagudua ti oras mabalinen ti agsubli kadagiti kalapawmi iti ward.
Iti saan a nabayag naammuanmi no ania ti napasamak iti alipugpog iti dayta a rabii. Nagbalin daytoy a dua a bagyo. Maysa kadagitoy ti nangpulpuligos iti makanawanmi ket nagpulpuligos ti maysa pay iti makanigidmi. No ania ti napasaranmi ket saan a daytoy ti kakaruan!
Ammok a dinengngeg ti Dios dagiti kararagmi iti dayta a rabii ket sinaluadannakami iti karungsotan ti bagyo. Apay a magudua koma ti alipugpog malaksid no nasken nga aramiden daytoy ti Dios? Ammok a kadagiti bagyo ti biag, makapagkararagtayo a kanayon iti Nailangitan nga Ama ket dumngeg ken sungbatannatayo, a mangted kadatayo iti tured ken saluad a kasapulantayo tapno masalaknibantayo.