Mensahe iti Visiting Teaching, Enero 2012

Panangaywan ken Panagserbi babaen ti Visiting Teaching

Adalenyo daytoy a material, ken no maitutop, paglilinnawaganyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag.

Pammati, Pamilia, Tulong

“Ti ayat [kaipapananna] ket dakdakkel nga amang ngem iti rikna ti kinamanangngaasi,” insuro ni Presidente Henry B. Eyring, Umuna a Mammagbaga iti Umuna a Panguluen. “Ti ayat [charity] ket agtaud iti pammati ken ni Apo Jesucristo ken bunga daytoy ti Pannubbotna.”¹ Para kadagiti kakabsat a babbai iti Relief Society, ti visiting teaching ket mabalin a tignay ti ayat, maysa a napateg a wagas a pakaaramatan iti pammatitayo iti Mangisalakan.

Babaen iti visiting teaching, mangtedtayo iti panagaywan babaen ti panangsarungkar iti tunggal kabsat a babai, panangibinglay iti ebanghelio, ken panagkalikagum a mangam-ammo kenkuana ken mangammo kadagiti kasapulan ti pamiliana. Ti visiting teaching ket agbalin nga aramid ti Apo no dagiti tao ti ipamaysatayo imbes a ti porsiento, inlawlawag ni Julie B. Beck, sapasap a presidente ti Relief Society. “Iti kinapudnona, ti visiting teaching ket di kaano man aggibus.” Daytoy ken ad-adda pay a wagas ti biag ngem iti maysa nga aramid. “Ti sipapasnek a panagserbi a kas maysa a visiting teacher ket pakakitaan ti kinadisipulotayo.”²

Bayat ti panangtedtayo iti agtultuloy ken nainkararagan a panangaywan, masursurotayo no kasano ti kasayaatan a panagserbi ken panangipaay kadagiti kasapulan ti tunggal kabsat a babai ken ti pamiliana. Ti panagserbi ket mabalin a maaramid iti adu a kita—adda dakkel ken adda saan unay a dakkel. “Masansan a dagiti babassit nga aramid ti panagserbi ket umanayen a kasapulan tapno maparegta ken mabendisionan dagiti dadduma: maysa a saludsod maipanggep iti pamilia ti maysa a tao, dagiti naregget a balikas ti panangpapigsa iti pakinakem, maysa a napudno a pammadayaw, maysa nga ababa a surat ti panagyaman, maysa nga ababa nga awag iti telepono,” insuro ni Presidente Thomas S. Monson. “No managpaliiw ken naalibtaktayo, ken no agtignaytayo kadagiti parikna nga umay kadatayo, mabalin nga adu a nasayaat ti maileppastayo. … Saan a mabilang dagiti aramid ti serbisio nga it-ited ti dakkel a buyot dagiti visiting teacher ti Relief Society.”³

Manipud kadagiti Nasantuan a Kasuratan

Juan 13:15, 34–35; 21:15; Mosiah 2:17; Doktrina ken atulagan 81:5; Moises 1:39

Manipud iti Pakasaritaantayo

Idi 1843, dagiti miembro ti Simbaan idiay Nauvoo, Illinois, ket nabingay iti uppat a ward. Idi Hulio iti dayta a tawen, nangdutok dagiti lider ti Relief Society iti visiting committee a buklen ti uppat a kakabsat a babbai para iti tunggal ward. Iraman dagiti responsibilidad ti visiting committee dagiti panangamiris kadagiti kasapulan ken panangkolekta kadagiti donasion. Inusar ti Relief Society dagitoy a donasion tapno matulongan dagiti agkasapulan.⁴

Nupay saanen nga agkolkolekta dagiti visiting teacher iti donasion, pinagtalinaedda ti responsibilidad a mangamiris kadagiti kasapulan—naespirituan ken temporal—ken agtrabahoda a mangted kadagita a kasapulan. Inlawlawag ni Eliza R. Snow (1804–87), maikadua a sapasap a presidente ti Relief Society: “Ti maysa a mannursuro … ket nasken nga adda kenkuana ti Espiritu ti Apo, bayat ti iseserrekna iti maysa a balay tapno ammuenna no ania nga espiritu ti makitana sadiay. … Agpakaasikayo iti Dios ken iti Espiritu Santo a manggun-od [iti Espiritu] tapno kabaelanyonto ti mangkita iti dayta nga espiritu nga agnanaed iti dayta a balay … ket mabalin a mariknayo ti mangisao kadagiti balikas a mangpakapia ken mangliwliwa, ket no makitayo ti maysa a kabsat a babai a malamlammin, arakupenyo daytoy a kas iti panangarakupyo iti maysa nga ubing ket pabaraenyo [isuna].”⁵

© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti Visiting Teaching Message, January 2012. Ilokano. 10361 864

Ania ti Maaramidko?

Ania ti ar-aramidek tapno matulongak dagiti kakabsatko a babbai a makarikna a maysaak a gayyem a mangipatpateg ken mangay-aywan kadakuada?
Kasano a makapagbalinak a nasaysayaat iti panangaywan ken panangipateg kadagiti dadduma?