Feia apî

Te itoito i te faarururaa i te vero

Na Maddison Morley

I te piti o te pô no te puhaparaa a te Feia Apî Tamahine no ta’u tĭtĭ, ua faaruru matou i te ua vero rahi e te mata‘i puahiohio. E 24 feia apî tamahine no ta’u paroita tei tae mai i te puhaparaa e e piti na tuahine faatere, e ua titauhia ia matou ia faaô ia matou paatoa i roto i te hoê piha iti na‘ina‘i no te paruru ia matou. E mea puai roa te ua e te puai noa’tu ra â te mata‘i. Ua haamana‘o tamau noa vau i te pure ta to matou peresideni tĭtĭ i pûpû na mua’tu no te paruru ia matou. Ua pure atoa te pŭpŭ o ta matou iho paroita i roto i to matou fare na‘ina‘i e ua pure au i ta’u iho mau pure.

E rave rahi tamahine tei ri‘ari‘a, e mea ohie ia ite i te tumu no te reira. E ere to matou fare na‘ina‘i i te mea pautuutu roa, e tei piha‘i iho matou i te hoê anavai pape. I roto i te area e 20 minuti i muri mai, no te puai ino o te vero, ua horo te taatoaraa o te tĭtĭ mai to ratou mau fare no te paroita i te mau fare o te mau tauturu, tei te hoê vahi teitei a‘e. Ua pure faahou to’u peresideni tĭtĭ i te tahi â pure, e ua himene matou i te mau himene, te mau himene no te Paraimere, e te mau himene no te puhaparaa no te tamata i te tamahanahana ia matou iho. Oia mau, ua ri‘ari‘a roa matou, ua ite râ matou e, e afaro te mau mea atoa. Hoê afa hora i muri iho ua nehenehe ia matou ia ho‘i atu i roto i to matou fare na‘ina‘i no te paroita.

I muri a‘e ua ite matou te mea i tupu i te mata‘i puahiohio i taua pô ra. Ua vahihia te reira i roto e piti vero. Ua haere te hoê na piha‘iho ia matou na te pae atau e te tahi na te pae aui. E ere ïa te vero ta matou i faaruru i te mea ino roa‘e !

Ua ite au e ua faaroo mai te Atua i ta matou mau pure i taua pô ra e ua paruru Oia ia matou i te ino o te vero. No te aha te hoê vero e vahi ai maori râ ua hinaaro te Atua ia na reira ? Ua ite au e, i roto i te mau vero no te oraraa, e nehenehe ta tatou e pure i te mau taime atoa i te Metua i te Ao ra e e faaroo e e pahono Oia ia tatou, ma te horo‘a mai ia tatou i te itoito e te parururaa e hinaarohia e tatou no te tapae ma te pe‘ape‘a ore.