Parau poro‘i a te Peresideniraa Matamua, Tenuare 2012
Te oraraa i te oraraa auhune
I te omuaraa o teie matahiti apî, te titau nei au i te feia mo‘a i te mau mahana hopea nei i te mau vahi atoa ia rave i te hoê tutavaraa, itoito e te faufaa rahi no’na iho no ni‘a i te mea ta’u e pii e, te oraraa auhune—te hoê oraraa tei auhune i te manuïa, i te maitai, e i te mau haamaitairaa. Mai ia tatou i haapii i te ABC (piapa) i te fare haapiiraa, te pûpû atu nei au i ta’u iho ABC (haapiiraa i te piapa) no te tauturu ia tatou paatoa ia noaa te hoê oraraa auhune.
A faaite i te hoê huru maitai
Te A i roto i ta’u ABC o te huru ïa. Ua papa‘i o William James, te hoê feruri parau e taote hi‘opo‘a atoa i te feruriraa taata no te fenua Marite i tahito ra, « te iteraa rahi roa‘e tei noaa mai i to tatou u‘i o te iteraa ïa e, e nehenehe ta te taata e taui i te hi‘oraa rapae o to ratou oraraa, na roto i te tauiraa i te huru roto o to ratou mau feruriraa ».1
Ua rahi roa te mau mea e tupu nei i roto i te oraraa no to tatou ho‘i huru. Na te huru o ta tatou ma‘itiraa ia hi‘o atu i te mau mea e ia pahono atu ia vetahi ê, e faatupu i te taa-ê-raa atoa. Te raveraa i te mea maitai roa‘e ta tatou e nehenehe e rave e te ma‘itiraa i muri iho ia oaoa i te mau mea atoa e tupu mai i ni‘a iho ia tatou, noa’tu te huru o taua mau mea ra, e nehenehe ïa te reira e afa‘i mai i te hau e te oaoa.
Ua parau o Charles Swindoll, e taata papa‘i buka, e orometua haapii e e orometua keresetiano e : « No’u nei, e mea faufaa a‘e te huru… i te mau mea i tupu… i te moni, i te huru oraraa, i te mau manuia-ore-raa i te mau manuïaraa, i te mea ta te tahi atu mau taata e feruri aore râ e parau aore râ e rave. E mea faufaa a‘e te reira i te mau hi‘oraa, i te aravihi aore râ i te ite. Na te reira e faatupu e aore râ e vavahi i te hoê taiete, te hoê ekalesia, te hoê utuafare. Te mea faahiahia râ maori râ ïa, tei ia tatou ïa te ma‘itiraa i te mau mahana atoa i te huru ta tatou e rave no taua mahana ra ».2
Eita ta tatou e nehenehe e arata‘i i te tereraa o te mata‘i, e nehenehe râ ta tatou e faatano i te vairaa o te mau ‘ie. No te hoê oaoa rahi, te hau e te poupou, e mata na tatou i te ma‘iti i te hoê huru maitai.
A ti‘aturi ia outou iho
Te B no te ti‘aturi ïa— outou iho, i te feia e haati nei ia outou, e i te mau ture mure ore.
Eiaha outou e haavare ia outou iho, ia vetahi ê e i to outou Metua i te Ao ra. Te hoê taata tei haavare i te Atua e tae noa’tu e, ua maoro roa, o te Karatino Wolsey ïa, tei ora na, mai te au i te papa‘iraa a Shakespeare, i te hoê oraraa roa i te taviniraa e toru arii e tei fana‘o i te tao‘a rahi e i te mana. I te pae hopea, ua faaerehia oia i to’na mana e ta’na mau tao‘a na te hoê arii faaoroma‘i ore. Ua parau te karatino Wolsey ma te ta‘i :
Ahani a‘e au i tavini i to’u Atua i te afaraa o te haapa‘o maitai
o ta’u i tavini i to’u arii, eita roa ïa Oia, i teie tau o to’u oraraa
e vaiiho vaitaha noa ia’u i mua i to’u ra mau enemi.3
Ua papa‘i o Thomas Fuller, te hoê taata peretane arata‘i Ekalesia, e e taata papa‘i aai atoa tei ora na i te tenetere 17, i teie nei parau mau : « Te taata o te ore i ora mai te au i to’na faaroo, aita ïa oia e ti‘aturi ra ».4
Eiaha e ta‘oti‘a ia outou iho, e eiaha e vaiiho ia vetahi ê ia parau mai ia outou e, ua ta‘oti‘ahia outou i roto i te mea ta outou e nehenehe e rave. A ti‘aturi ia outou iho e i muri iho, a ora mai te reira te huru, ia tae‘ahia ia outou to outou faito mau. E nehenehe ta outou e faaoti i te mea ta outou e ti‘aturi e, e nehenehe ta outou e rave.
A ti‘aturi e a mau i te faaroo.
A ti‘a i mua i te mau titauraa ma te itoito
E riro mai te itoito ei viretu hoona e te faufaa rahi ia ore ana‘e te reira e faarirohia mai te hoê hinaaro o te hoê taata ia pohe, mai te hoê râ faaotiraa ia ora maitai.
Ua parau te taata papa‘i buka Marite o Ralph Waldo Emerson : « Noa’tu te mea ta outou e rave, ei itoito to outou e ti‘a ai. Noa’tu te huru o te e‘a ta outou e rave, te vai ra ihoa te hoê taata o te parau mai ia outou e, ua hape outou. E vai noa mai â te mau fifi o te tupu mai no te faahema ia outou ia ti‘aturi e, ua tano te mau faahaparaa. No te faanaho i te hoê tereraa e, no te haapa‘o i te reira e tae roa’tu i te hopea, e titauhia ïa te itoito mai to te hoê faehau te huru. Te vai ra te mau upooti‘araa no te hau, e titauhia râ te mau tane e te mau vahine itoito no te faatupu i te reira ».5
Te vai ra te mau taime e ri‘ari‘a e e paruparu outou. E mana‘o paha outou e, ua pau outou. E au ra e, e ohipa iti rahi te noaaraa te upooti‘araa. I te tahi mau taime e feruri outou mai ia Davida i te tamataraa i te aro ia Golia. A haamana‘o râ, ua upooti‘a o Davida !
E titauhia te itoito no te tuu i te taahiraa matamua e tae atu ai i te fâ ta te hoê taata e titau ra, tera râ, e itoito rahi atu te titauhia ia marua ana‘e te hoê taata i raro e ia tapiti faahou te tutavaraa e oti ai.
A faaoti papû te mana‘o ia tutava, ia haa ma te rotahi te mana‘o i ni‘a i te hoê fâ maitai, e ia roaa te itoito eiaha no te faaruru noa i te mau titauraa o te tae papû mai, no te rave atoa râ i te piti o te tutavaraa, mai te mea e titauhia. « I te tahi taime, te itoito, o te reo ha‘iha‘i ïa e faaroohia i te hopea o te mahana o te parau mai e, ‘ e tamata faahou â vau ananahi ».6
E mata na tatou i te haamana‘o i teie mau ABC a omua‘i tatou i to tatou tere i roto i te matahiti apî, ma te faatupu i te hoê huru maitai, te hoê ti‘aturiraa e, e nehenehe ta tatou e faaoti i ta tatou mau fâ e i ta tatou mau faaotiraa, ei reira te itoito no te faaruru i te mau tamataraa atoa e tae mai ai i ni‘a i to tatou e‘a. I reira ïa e roaa ai ia tatou te oraraa auhune.
© 2012 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/11. Parau faati‘a no te iritiraa : 6/11. Iritiraa no First Presidency Message, January 2012. Tahitian. 10361 895
Haapiiraa no roto mai i teie parau poro‘i
A ani i te mau melo o te utuafare ia faaite mai i te mau mea tei tupu i ni‘a ia ratou i te taime a tauturu ai te hoê huru maitai, te ti‘aturiraa ia ratou iho, aore râ te itoito, ia ratou. Aore râ a ani ia ratou ia imi i te mau hi‘oraa no teie nei na parau tumu e toru i roto i te mau papa‘iraa mo‘a. E ti‘a ia outou ia faaineine no te haapii na roto i te feruriraa na roto i te pure, i te mau papa‘iraa mo‘a e aore râ, i te mau mea tei tupu i ni‘a ia outou iho.