Mensahe sang Unang Panguluhan, Enero 2012
Ang Pagpangabuhi sang Bugana nga Kabuhi
Sa pagsugod sang bag-o nga tuig, ginahangkat ko ang mga Santos sa Ulihing mga Adlaw sa bisan diin sa paghimo sang isa ka personal, maukod, importante nga misyon para sa ginatawag ko nga bugana nga kabuhi—isa ka kabuhi nga napun-an sang kabuganaan sang kadalag-an, kaayuhan, kag mga bugay. Pareho sang aton pagtuon sang ABC sa eskuwelahan, ginatanyag ko ang akon kaugalingon nga tig-una nga mga prinsipyo agud buligan kita tanan nga makaangkon sing bugana nga kabuhi.
Mag-angkon sing Positibo nga Panglantaw
Una sa akon listahan sang mga prinsipyo amo ang panglantaw. Si William James, isa sa pionero nga psychologist kag philosopher sa Amerika, nagsulat, “Ang pinakadako nga pagbag-o sang aton henerasyon amo ang pagkatukib nga ang mga tawo, paagi sa pagbag-o sang nasulod nga mga panglantaw sang ila kaisipan, sarang magbag-o sang panggwa nga aspeto sang ila mga kabuhi.”1
Madamo kaayo [nga mga butang] sa kabuhi ang nagadepende sa aton panglantaw. Ang pamaagi naton sa pagpili sa pagtan-aw sang mga bagay-bagay kag pagsabat sa iban nagahimo sang tanan nga kinalain. Ang paghimo sang aton pinakamaayo kag dayon pagpili nga mangin malipayon parte sa aton mga sirkumstansya, bisan ano man ini, sarang magdala sang paghidaet kag pagkakontento.
Si Charles Swindoll—isa ka tagsulat, manunudlo, kag Kristyano nga pastor—nagsiling: “Ang panglantaw, para sa akon, mas importante sangsa … nagliligad, … sangsa kuwarta, sangsa mga sirkumstansya, sangsa mga kapaslawan, sangsa mga kadalag-an, sangsa kon ano ang ginapensar ukon ginahambal ukon ginahimo sang iban nga tawo. Mas importante pa ini sangsa dagway, talento, ukon ikasarang. Mabug-os sini ukon mawasak ang isa ka kompanya, isa ka simbahan, isa ka puluy-an. Ang manami nga butang amo nga makapili kita kada adlaw kon ano nga panglantaw ang aton sundon sa sina nga adlaw.”2
Indi naton madiktahan ang hangin, pero sarang naton ipauyon ang mga layag. Para sa lubos nga kalipayan, paghidaet, kag pagkakontento, kabay nga kita magpili sang isa ka positibo nga panglantaw.
Magpati sa Inyo Kaugalingon
Ika-duha magpati—sa inyo kaugalingon, sa ila nga yara sa inyo palibot, kag sa wala’y katapusan nga mga prinsipyo.
Mangin tampad sa inyo kaugalingon, sa iban, kag sa inyo Amay nga Langitnon. Ang isa nga indi tampad sa Dios tubtob ulihi na ang tanan amo si Cardinal Wolsey nga, suno kay Shakespeare, naghinguyang sang malawig nga kabuhi sa pagserbisyo sa tatlo ka hari kag nag-angkon sing manggad kag gahum. Sang ulihi, ginkuhaan sia sing gahum kag mga pagkabutang sang isa ka indi pasensyoso nga hari. Si Cardinal Wolsey nagtangis:
Kon gin-alagaran ko lang kuntani ang akon Dios bisan katunga
Sang pag-alagad ko sa akon hari, indi Niya ako pagpabay-an sa akon katigulangon
Nga hublas sa atubang sang akon mga kaaway.3
Si Thomas Fuller, isa ka Ingles nga relihiyoso kag tagsulat sang kasaysayan nga nagkabuhi sang ika-17 nga siglo, nagsulat sining kamatuoran: “Wala nagapati ang isa nga wala nagapangabuhi suno sa iya ginapatihan.”4
Indi paglimitahi ang inyo kaugalingon kag indi pagtugoti ang iban nga kumbinsihon kamo nga limitado lamang ang inyo masarangan. Magpati sa inyo kaugalingon kag magpangabuhi agud malab-ot ninyo ang inyo potensyal.
Malab-ot ninyo ang inyo ginapatihan nga masarangan ninyo. Magsalig kag magtuo kag mag-angkon sing pagtuo.
Atubanga ang mga Hangkat nga may Kaisog
Ang K para sa kaisog. Ang kaisog mangin isa ka mapuslanon kag makahuluganon nga kinaiya kon kabigon ini indi bilang ang kahanda nga mapatay sing maisog kundi bilang isa ka determinasyon nga magkabuhi sing desente.
Siling sang Amerikano nga tagsulat kag mamalaybay nga si Ralph Waldo Emerson: “Ano man ang himuon mo, kinahanglan mo sing kaisog. Ano man nga dalan ang imo sundon, may isa gid pirme nga magasiling sa imo nga sala ka. May yara gid pirme sing mga kabudlayan nga nagatuhaw nga nagasulay sa imo sa pagpati nga ang imo mga kritiko husto. Ang magplano sang isa ka buluhaton kag sundon ini tubtob katapusan nagakinahanglan sing pareho nga kaisog nga kinahanglanon sang isa ka soldado. Ang paghidaet may iya nga mga kadalag-an, pero nagakinahanglan ini sang maisog nga mga lalaki kag babayi agud daugon ini.”5
May mga tion nga mahadlukan kag mangluya kamo. Mahimo nga makabatyag kamo nga nalutos. Ang tsansa sa pag-angkon sing kadalag-an mahimo nga makahalawhaw. Kon kaisa mahimo nga makabatyag kamo nga daw si David nga nagapakig-away kay Goliat. Pero panumduma —si David ang nagdaog!
Kinahanglanon ang kaisog agud himuon ang una nga tikang padulong sa ginahandom nga lalab-uton, pero kinahanglanon ang mas dako nga kaisog kon ang isa ka tawo nasandad kag kinahanglan maghimo sing ika-duha nga pagtinguha agud magmadinalag-on.
Mag-angkon sing determinasyon agud himuon ang masarangan, sing pagtutok sa pagtrabaho padulong sa isa ka mapuslanon nga lalab-uton, kag sang kaisog indi lamang sa pag-atubang sang mga hangkat nga indi malikawan nga nagaabot kundi subong man sa paghimo sang ika-duha nga pagtinguha, kon kinahanglanon ini. “Kon kaisa ang kaisog amo ang gamay nga tingug sa katapusan sang adlaw nga nagasiling, ‘Tilawan ko liwat buas.’”6
Kabay nga madumduman naton ining tig-una nga mga prinsipyo sa aton pagsugod sa pagpanglakaton padulong sa bag-ong tuig, nga nagapatubo sing isa ka positibo nga panglantaw, isa ka pagpati nga sarang naton lab-uton ang aton mga handum kag mga promisa, kag sing kaisog sa pag-atubang sang bisan ano nga mga hangkat nga mahimo mag-abot sa aton. Dayon ang bugana nga kabuhi mangin aton.
© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Linubad sang First Presidency Message, January 2012. Hiligaynon. 10361 861
Pagtudlo gikan sa Sining Mensahe
Binagbinaga ang pag-agda sa mga miyembro sang pamilya sa pagpaambit sang personal nga mga eksperiyensya sang ang isa ka positibo nga panglantaw, pagpati sa ila kaugalingon, ukon kaisog nakabulig sa ila. Ukon agdaha sila sa pagpangita sang mga halimbawa sining tatlo ka mga prinsipyo sa balaan nga mga kasulatan. Mahimo ka nga maghanda sa pagtudlo paagi sa pagpanumdom sing mainampuon sang balaan nga mga kasulatan ukon imo mismo nga mga eksperiyensya.