Mensahe sa Visiting Teaching, Enero 2012

Pagbantay kag Pag-alagad paagi sa Visiting Teaching

Tun-i ining materyal kag, sa nagakaigo, hambali ini upod sang mga sister nga inyo ginabisita. Gamita ang mga pamangkot agud buligan kamo sa pagpabakod sang inyo mga sister kag himuon ang Relief Society nga aktibo nga bahin sang inyo mismo kabuhi.

Pagtuo, Panimalay, Bulig

“Ang gugma sa isigkatawo [nagakahulugan] sing mas masobra pa sangsa pagbatyag sing kaalwan,” gintudlo ni Pangulong Henry B. Eyring, Unang Manuglaygay sa Unang Panguluhan. “Ang gugma sa isigkatawo naggikan sa pagtuo kay Ginuong Jesucristo kag isa ka epekto sang Iya Pagpasag-uli (Atonement).”¹ Para sa mga sister sa Relief Society, ang visiting teaching sarang mangin gugma sa isigkatawo sa buhat, isa ka importante nga paagi sa pagpakita sang aton pagtuo sa Manluluwas.

Paagi sa visiting teaching, nagahatag kita sing pagbantay paagi sa pagpakighambal sa tagsa ka sister, pagpaambit sang mensahe sang ebanghelyo, kag paghimulat sa paghibalo sang mga kinahanglanon niya kag sang iya pamilya. “Ang visiting teaching mangin buluhaton sang Ginuo kon ang aton ginatutukan amo ang mga tawo sangsa numero,” paathag ni Julie B. Beck, pang-kabilugan nga pangulo sang Relief Society. “Sa matuod-tuod, wala sing katapusan ang visiting teaching. Ginakabig ini nga pagginawi sangsa buluhaton. Ang matutom nga pagserbisyo bilang isa ka visiting teacher isa ka ebidensya sang aton pagka-disipulo.”²

Sa aton paghatag sing tayuyon kag mainampuon nga pagbantay, matun-an naton kon paano mahikot kag masabat sing pinakamaayo ang mga panginahanglan sang tagsa ka sister kag sang iya pamilya. Ang pag-alagad sarang makita sa madamo nga dagway—ang iban dinalagko kag ang iban indi gid tama ka dalagko. “Sa masami ang magagmay nga buhat sang pag-alagad amo lamang ang kinahanglanon agud mabayaw kag mabugayan ang isa ka tawo: isa ka pamangkot parte sa pamilya sang isa ka tawo, malip-ot nga mga pulong sang pagpaisog, isa ka sinsero nga pagdayaw, isa ka malip-ot nga sulat sang pagpasalamat, isa ka malip-ot nga tawag sa telepono,” gintudlo ni Pangulong Thomas S. Monson. “Kon kita nagapanilag kag sensitibo, kag kon maggiho kita suno sa mga pagpadasig nga nagaabot sa aton, sarang kita makahimo sing dako nga kaayuhan. … Indi maisip ang mga buhat sang pag-alagad nga ginahatag sang madamo kaayo nga panong sang mga visiting teacher sa Relief Society.”³

Gikan sa Balaan nga mga Kasulatan

Juan 13:15, 34–35; 21:15; Mosias 2:17; Doctrine and Covenants 81:5; Moses 1:39

Gikan sa Aton Kasaysayan

Sang tuig 1843, ang mga miyembro sang Simbahan sa Nauvoo, Illinois, natunga sa apat ka mga ward. Sang Hulyo sina nga tuig, ang mga lider sa Relief Society nagpili sang isa ka komitiba sa pagbisita nga may apat ka sister para sa tagsa ka ward. Ang mga responsibilidad sang komitiba sa pagbisita nagalakip sang paghibalo sang mga panginahanglan kag pagkolekta sang mga donasyon. Gingamit sang Relief Society ining mga donasyon agud hatagan ang mga nagakinahanglan.⁴

Samtang wala na nagapangolekta ang mga visiting teacher sang mga donasyon, sa gihapon ginapadayon nila ang responsibilidad sa paghibalo sang mga panginahanglan—espirituhanon kag temporal—kag sa pagbulig nga masabat ining mga panginahanglan. Eliza R. Snow (1804–87), ika-duha nga pangkabilugan nga pangulo sang Relief Society, nagpaathag: “Ang isa ka manunudlo… dapat gid nga ginaupdan sing lubos sang Espiritu sang Ginuo, sa iya pagsulod sa isa ka balay agud mahibaluan kon ano nga kahimtangan ang iya masalapuan didto. … Mag-ampo sa atubang sang Dios kag sang Balaan nga Espiritu nga makaupod [ang Espiritu] agud inyo maintiendihan inang kahimtangan nga nagapangibabaw sa sinang balay … kag mahimo ninyo mabatyagan ang paghambal sing mga pulong sang paghidaet kag kaumpawan, kag kon makakita kamo sing isa ka sister nga ginatugnawan, haksa sia pareho sang himuon ninyo sa isa ka bata kag painiti [sia].”⁵

© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang Visiting Teaching Message, January 2012. Hiligaynon. 10361 861

Ano ang Sarang Ko Mahimo?

Ano ang himuon ko agud buligan ang akon mga sister nga mabatyagan nga isa ako ka abyan nga nagapalangga kag nagaulikid sa ila?
Paano bala ako mangin mas maayo sa pagbantay kag pag-atipan sa iban?