Pweng sin Prestuhnsi Se Met, Jacnweri 2012
Moulkihn Moul Muht
Ke muhtwacwacyacn sie yac sasuc, nga kwacfe Mwet Luhlahlfongi ke Lwen-sahflah acn nuh kwewa in oruh, oaru, ohiyac yohk srihpac la nuh ke ma nga pahngon moul muht—moul se ma sesseslah ke muht luhn pihsrlac, ma wowo, ac insewowo uh. Oacna ke kuht lotwelah ABC uh ke lutlut ah, nga usot ABC luhk sifacna in kahsrwe kuht nuh kwewa in eis moul muht.
Eis sie Elah Wowo
A ke ABC luhk uh pa elah. William James, sie pioneer psychologist ac philosopher Macrike, suhmuhslah, “Ma eklac yohk se ke fihl lasr pa sukokyak se ma mwet uh, in ekuhllah elah lun mwe nuhnak lalos uh, kuh in ekuhllah ma kahlwem ke moul lalos uh.”1
Puhs suhna ke moul uh wiwi na elah lasr uh. Ohiyacn sulaclah lasr in liye ma uh ac topuk mwet sahyac uh orwaclah eklac uh nuh kwewa. In oruh kuhiyacsr ac sulaclah in engan ke ohiyac sikyak lasr uh, oacna sie ma e siyak uh, kuh in use mihs ac mwe engan.
Charles Swindoll—mwet sihm puk, mwet orekma ke luti, ac pahstuh Kristin se—el fahk: “Elah, nuh sihk, yohk srihpac liki na … pacl somlah, … na mani, na ohiyac sikyak uh, na tiac orwaclah uh, na pihsrlac uh, na ma mwet sahyac nuhnkuh kuh fahk kuh oruh uh. Yohk srihpac liki na atac, moniyuck, kuh fwacfa. Ac fah oruh kuh kuhnahoslah sie u in orekma, sie alu, sie lohm. Ma etweyuck se uh pa oasr sulaclah lasr lwen nuh kwewa ke elah kuht ac fah tahpuhk ke lwen sac uh.”2
Kuht tiac kuh in kihfucs eng uh, tuhsruhk kuht kuh in mokle nes in kal uh. Nuh ke luhpah yohk ke engan, mihs, ac mwe engan uh, kuht kuh in sulaclah sie elah wowo.
Luhlahlfongi Keim Sifacna
B pa luhlahlfongi—keim sifacna, ke ma raunikomyak an, ac ke ip yohk ma pahtpaht an.
Oruh in suwohswohs nuh sum sifacna, nuh sin mwet sahyac, ac nuh sin Pahpah Lucng. Sie mwet ma tiac suwohswohs nuh sin God nwe ke na pahtlaclac pa Cardinal Wolsey suc, Shakespeare el fahk, sislah moul loeloes se in kuhlwacnsap nuh sin tohkohsrah tolu ac engankihn kahsruhp ac kuh. Sahflahiyac ah, el itucklac kuh ac ma lal sin sie tohkohsrah semuhtweng. Cardinal Wolsey el tuhngiyac:
Nga fuhnuh kuhlwacnsapuh God luhk ke tahfuhn oasrasr luhk
Nga kuhlwacnsapuh tohkohsrah luhk, El tiac oasr ke matwuck
Fihliyuclac in kohflohfohl yurin mwet lokoalok luhk.3
Thomas Fuller, mwet luhn alu se England ac mwet lutlut ke ma mahtuh suc moul ke yac 1600 somlah ah, suhmuhslah ma pwacye se inge: “El tiac luhlahlfongi ke ma el tiac moulkihn ke luhlahlfongi lal.”4
Nimet ikolyac kuhiyom ac nimet lwelah mwet sahyac in fahk nuh sum lah kom ikolyucki ke ma kom kuh in oruh uh. Luhlahlfongi keim sifacna ac oruh moul an in kuh in sun kuhiyom.
Kom kuh in eis ma kom luhlahlfongi muh kom kuh nuh kac an. Luhlahlfongi ac eis luhlahlfongi.
Sun Ma Upac an ke Puhlaik
Puhlaik uh orwaclah ma oasr srihpac se ac moul nwacsnwacs oasr kalmeyac ke pacl ac tiac luhngkihnyuck yohk in oacna sie ma kihsackihnyucklac kac se tuhsruhk in oacna ma moklweyuck ke moul wo ac fal se.
Ralph Waldo Emerson mwet oruh kain in sihm Macrike se el fahk: “Kom enenuh in puhlaik ke kain ma kom oruh an. Oacna sie inkacnek kom sulaclah kac an, pacl nuh kwewa oasr mwet se ac fahk nuh sum lah kom tahfonglac. Pacl nuh kwewa oasr ma upac sikyak ma srihfe kom in luhlahlfongi lah mwet ahkkolukye kom an pwacye. In orwaclah se inkacnek in mukwikwi ac ukwe nuh ke sahflahiyac enenuh kuhtuh kain puhlaik se na ma solse uh enenuh an. Oasr kuhtanglah luhn mihs uh, tuhsruhk enenuh mukul ac muhtwacn watwen in kuhtanglah.”5
Oasr pacl ma kom ac sahngweng ac ahkmuhnahsyeyucklac. Kom ac kuh in puhla lah kom kuhtangyucklac. Ma kuh in orek in eis kuhtanglah kuh in sikyak upac. Oasr pacl kom ac kuh in puhla oacna David srihke in laenuhl Goliath. Tuhsruhk esam—David el kuhtanglah!
Puhlaik pa enenuh in oruh sie ma in sun finsrak rahpkuh luhn sie mwet, tuhsruhk finne puhlaik yohk enenweyuck nuh ke pacl mwet se tikuclkucl ac enenuh in oruh kuhiyac ahkluo in eis.
Eis moklweyuck in oruh kuhiyac, nuhnak se in oruh nuh ke finsrak wowo se, ac puhlaik in tiac sun muhkwena ma upac ma ac tuhkuh na pwacye tuhsruhk oacyacpac in oruh kuhiyac ahkluo se, kuh in enenweyuck. “Kuhtuh pacl uh puhlaik pa puhsra srihsrihk ke sahflahiyacn lwen uh ma fahk, ‘Ngwac srihke pac lutu.’”6
Kuht kuh in esam ABC inge ke kuht muhtwacwacack ke fuhfahsryucsr lasr nuh ke yac sasuc se, pihkihn elah wowo, luhlahlfongi se ma kuht kuh in eis finsrak ac akwuck lasr, ac puhlaik in sun ma upac nuh kwewa ma tuhkuh nuh yohrohsr uh. Na moul muht fah ma na lasr.
© 2012 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/11 Ahkkweyeyucklac ke lweng: 6/11. Lwenglah luhn First Presidency Message, January 2012. Kosraean. 10361 868
Luti ke Pweng Se Inge
Nuhnkuh in suli mwet ke sucu an in akacsruhi ke puhla la ke pacl elah wowo se, luhlahlfongi kaclos sifacna, kuh puhlaik uh kahsrwelos. Kuh solwaclos in sokwack mwe srihkasrak ke ip yohk tolu inge ke ma suhmuhslah uh. Kom ac kuh in ahkolah in luti ke pruhe in nuhnkuh ke ma suhmuhslah kuh puhla lom sifacna.