2012
Karihngihnyuck ac Luti ke Forfor Luti
January 2012

Pweng ke Forfor Luti, Jacnweri 2012

Karihngihnyuck ac Luti ke Forfor Luti

Lutlutkihn kuhfa inge, ac ke pacl fal, sramsramkihn yurin tahmtahel ma kom muhtwacta nuh yohroh an. Orekmakihn kihsen siyuck an in kahsrwe kom ahkkweye tahmtahel wiyom an ac in orwaclah ip fokoko se ke U in Kahsruh luhn Muhtwacn ke moul lom sifacna an.

Luhlahlfongi, Sucu, Kahsruh

“Luhngse pwacye [kalmac pa] yohk liki puhla in kuhlwacng,” lutiyuck sel Prestuhn Henry B. Eyring, Mwet in Kahsruh Se Met ke Prestuhnsi Se Met. “Luhngse pwacye isuslac ke luhlahlfongi ke Leum Jisus Kraist ac pa kahlwem ke Iwaclah Lal.”1 Nuh sin tahmtahel ke U luhn Muhtwacn in Kahsruh an, forfor luti uh kuh in oruh mukwikwi ke luhngse pwacye, inkacnek yohk srihpac se in ahsrosr luhlahlfongi lasr ke Mwet Lahngo.

Ke forfor luti uh, kuht sang karihngihnyuck in ohsun nuh yurin kais sie tahmtahel, akacsruhi ke pweng se ke wosasuc, ac suk in etuh enenuh lal ac sucu lal uh. “Forfor luti uh oruh orekma se luhn Leum ke pacl liye lasr uh oasr yurin mwet uh liki na luhpah se,” ahkuhtweyac sel Julie B. Beck, prestuhn luhlahp ke U luhn Muhtwacn in Kahsruh. “Ke ma pwacye uh, forfor luti uh wacngihn sahflahiyac. Oruh inkacnek in moul se liki na orekma se. Luhlahlfongi kuh in kuhlwacnsap oacna sie mwet forfor luti pa ma kahlwem se ke mwet tuhma lutlut lasr uh.”2

Ke kuht sang ke pacl nuh kwewa ac pruhe in karihngihn uh, kuht lutlutkihn ohiyacn luti wowo kac ac sun enenuh luhn kais sie tahmtahel ac sucu lal an. Luti uh kuh in oruh kain atac pucspucs—kuhtuh yohk ac kuhtuh tiac arlac yohk. “Kwacna mukwikwi srihsrihk ke kuhlwacnsap uh pa enenweyuck in tahpuhk ac ahkinsewowoye mwet sahyac uh: kihsen siyuck soko ke sucu luhn mwet se, kahs in ahkkweye sa, sie kahs in kaksahkihn pwacye, kihtin pwepuh in sang kuloh se, pahng fototo se,” lutiyuck sel Prestuhn Thomas S. Monson. “Kuht fin liye ac elyah, ac kuht fin mukwikwi ke moklweyuck ma tuhkuh nuh sesr uh, kuht kuh in orwaclah ma wo yohk. … Puhkantwen na pwacye mukwikwi in kuhlwacnsap oreklac sin mwet forfor luti ke u yohk ke U luhn Muhtwacn in Kahsruh.”3

Ke Ma Suhmuhslah uh

Jon 13:15, 34–35; 21:15; Mosiah 2:17; Doctrine and Covenants 81:5; Moses 1:39

Ke Ma Mahtuh Lasr

Ke 1843, mwet ke Alu uh fin acn Nauvoo, Illinois, kihtakatwelihk nuh ke ward ahkosr. Ke Julahe ke yac sac, mwet kol ke U luhn Muhtwacn in Kahsruh uh srihsrngiyac mwet ahkosr ke sie kihmiti luhn kais sie ward. Ma kunen kihmiti forfor se weacng tahfuh enenuh ac orwacni mwe kahsruh orekwacni uh. U luhn Muhtwacn in Kahsruh an orekmakihn ma orekwacni inge in sang nuh sin mwet enenuh.4

Ke pacl ma mwet forfor luti uh tilac orwacni ma orekwacni uh, elos sruok na kunohkohn in tahfuh enenuh uh—ke ip luhn nguhn ac ip luhn mahno—ac in orekma in sun enenuh ingacn. Eliza R. Snow (1804–87), prestuhn luhlahp ahkluo ke U luhn Muhtwacn in Kahsruh, el ahkuhtweyac lah: “Mwet luti se … enenuh in yohk na pwacye ke Nguhn luhn Leum, ke el ac utyak nuh lun sie lohm in etuh lah nguhn fuhkah el sun we uh. … Ngihsre ye muhtuhn God ac Nguhn Muhtahl in eis [Nguhn] kom in kuh in sun nguhn se ma oasr lun lohm sacn uh … ac kom kuh in puhla in fahk kahs in mihs ac ahkwoye, ac kom fin sokwack sie tahmtahel in puhla srwenglah, esacl ke insiom oacna ke kom oruh nuh sin sie tuhlihk lun insiom an ac ahkfucsrfucsryaclwack.”5

© 2012 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/11. Ahkkweyeyucklac ke lweng: 6/11. Lwenglah luhn Visiting Teaching Message, January 2012. Kosraean. 10361 868

Mwe kahsruh

  1. Henry B. Eyring, “Ohiyen Muhtwacnglah luhn U luhn Muhtwacn in Kahsruh,” Liahona, Nohfohmpuh 2009, 121.

  2. Julie B. Beck, “Relief Society: A Sacred Work,” Liahona, Nohfohmpuh. 2009, 114.

  3. Thomas S. Monson, “Three Goals to Guide You,” Liahona, Nohfohmpuh 2007, 120–21.

  4. Liye Daughters in My Kingdom: The History and Work of Relief Society (2011), 105.

  5. Eliza R. Snow, ke Daughters in My Kingdom, 108.

Meac Nga Kuh In Oruh?

  1. Meac nga oruh in kahsruh tahmtahel wiyuck uh in puhla lah nga pa kawuck se ma luhngse ac elyah selos uh?

  2. Nga oruh fuhkah in wo na pwacye in karihngihn ac fosrngahkihn mwet sahyac uh?