Cov Hluas
Kuv Zaj Lus Thov Vajtswv los ntawm Kev Ntseeg
Thaum kuv muaj 18 xyoo, kuv ua hauj lwm hauv ib lub khw muag rooj tog ua ib tug neeg muag khoom. Kuv cov sij hawm ua hauj lwm nyuaj kawg li. Kuv ua hauj lwm thaum 8:00 teev sawv ntxov mus txog thaum 10:00 teev tsaus ntuj, hnub Monday txog Saturday. Kuv tu siab vim kuv mus koom tsis tau kev kawm vaj lug kub thiab tej kev ua si ntawm lub Koom Txoos li.
Kuv pib thov Leej Txiv Saum Ntuj Ceeb Tsheej nrog kev ntseeg loj heev kom Nws pab kuv nrhiav ib txoj hauj lwm uas kuv tsis tas ua rau hnub Saturday kom kuv thiaj li mus koom tau kev kawm vaj lug kub thiab lwm yam kev ua si.
Muaj ib hnub tom hauj lwm kuv tab tom pab ib tug txiv neej. Wb sib tham me ntsis, thiab nws hais rau kuv tias nws ua hauj lwm rau ib lub tsev ceev nyiaj loj heev. Kuv nug nws hais tias kuv yuav ua li cas thiaj li nrhiav tau ib txoj hauj lwm hauv lub lag luam no. Nws tau muab nws lub npe thiab tus naj npawb xov tooj rau kuv thiab nws hais kom kuv hu rau tus neeg ntiav neeg ua hauj lwm thiab hais rau tus neeg ntawd hais tias kuv paub tus txiv neej no. Kuv thiaj li mus rau hauv lub tsev ceev nyiaj thiaj mus xeem raws li txoj kev xeem. Kuv xeem tau thiab pib ua hauj lwm rau xuab moo tauj ib hnub Monday txog Friday, lawv them kuv nyiaj ntau tshaj txoj hauj lwm qub peb npaug.
Kuv paub hais tias tus Tswv yuav coj peb kev thaum peb tso Nws ua ntej tshaj txhua yam tsav. Niaj hnub no Nws tseem coj kuv kev. Kuv paub hais tias txoj ntsiab cai ntawm kev thov Vajtswv yeej muaj tseeb tiag.